ខេត្តស្វាយរៀង ៖ ចាប់តាំងពីរាជរដ្ឋាភិបាលសម្រេចបង្កើតតំបន់សេដ្ឋកិច្ចពិសេសក្នុងខេត្តស្វាយរៀងនៅឆ្នាំ២០០៥មក ប្រជាពលរដ្ឋក្នុងខេត្តរាប់ម៉ឺននាក់ទទួលអត្ថប្រយោជន៍ពីតំបន់នេះ ដោយយុវជនពេញកម្លាំងបានចូលបម្រើការជាកម្មករ កម្មការិនីនៅក្នុងរោងចក្រ ដើម្បីរកចំណូលផ្គត់ផ្គង់គ្រួសារ និងមិនចាំបាច់ធ្វើចំណាកស្រុកទៅខេត្តផ្សេង ឬក្រៅប្រទេសឡើយ ។
បើតាមលោក ខេន លី (Kan Lee) អ្នកគ្រប់គ្រងតំបន់សេដ្ឋកិច្ចមេនហាតធេន នៅក្រុងបាវិត ខេត្តស្វាយរៀង ឲ្យដឹងថា ចាប់ពីតំបន់សេដ្ឋកិច្ចពិសេសនេះបង្កើតឡើងក្នុងខេត្តស្វាយរៀង បានផ្ដល់ឱកាសការងារជាច្រើនដល់ប្រជាពលរដ្ឋក្នុងតំបន់ និងប្រែក្លាយមុខមាត់ខេត្ត ក៏ដូចប្រទេសកម្ពុជាទាំងមូលផងដែរ ។ លោកនិយាយថា ៖ « បើប្រៀបធៀបកាលពីមុននិងឥឡូវ មានភាពខុសគ្នាឆ្ងាយណាស់ ។ កាលពីមុន តំបន់នេះគឺជាវាលស្រែ និងកន្លែងស្ងាត់ជ្រងំ តែពេលនេះ វាបានផ្លាស់ប្តូរទៅជាតំបន់ឧស្សាហកម្មដ៏សំខាន់មួយសម្រាប់ផ្ដល់ចំណូលដល់ពលរដ្ឋក្នុងខេត្តស្វាយរៀង និងខេត្តផ្សេងដែលមកធ្វើការនៅទីនេះ » ។
លោកបន្តថា សព្វថ្ងៃនេះ នៅក្នុងតំបន់សេដ្ឋកិច្ចមេនហាតធេន មានរោងចក្រកំពុងដំណើរការផលិតជាង៣០រោងចក្រ ក្នុងនោះភាគច្រើនជាការវិនិយោគពីក្រៅប្រទេសដូចជា ៥០%មកពីតៃវ៉ាន់, ៣០%មកពីចិន ក្រៅពីនោះមកពីហុងកុង វៀតណាម និងសហរដ្ឋអាមេរិកជាដើម ។ នៅក្នុងតំបន់សេដ្ឋកិច្ចពិសេសនេះ បានផ្ដល់ឱកាសការងារជូនកម្មករ កម្មការិនីប្រមាណជាង៣ម៉ឺននាក់កំពុងបម្រើការរាល់ថ្ងៃនេះ ។ លោកនិយាយថា ៖ «ក្រៅពីរោងចក្រដែលកំពុងដំណើរការសព្វថ្ងៃនេះ តំបន់សេដ្ឋកិច្ចពិសេសមេនហាតធេន គ្រោងនឹងវិនិយោគបន្ថែមទៀតសម្រាប់ផ្ទៃដីដែលនៅសេសសល់ ដូចជា វិនិយោគរោងភាពយន្ត សួនកម្សាន្ត និងមជ្ឈមណ្ឌលផ្ដល់ការងារជូនប្រជាពលរដ្ឋជាដើម » ។
លោក ម៉ែន វិបុល អភិបាលខេត្ត មានប្រសាសន៍ថា ចាប់តាំងពីរាជរដ្ឋាភិបាលកម្ពុជាបានបង្កើតតំបន់សេដ្ឋកិច្ចពិសេសនៅខេត្តស្វាយរៀងមក រហូតមកដល់ពេលនេះ មានតំបន់សេដ្ឋកិច្ចពិសេសចំនួន៧ ដែលមានរោងចក្រសហគ្រាសសរុបជាង១៥០ និងផ្ដល់ការងារជូនប្រជាពលរដ្ឋទាំងក្នុង និងក្រៅខេត្ត ជាង៦ម៉ឺននាក់ ។ លោកថា ៖ « ក្រៅពីតំបន់សេដ្ឋកិច្ចពិសេសទាំង៧ ដែលដំណើរការសព្វថ្ងៃនេះ ក៏មានគម្រោងធំៗមួយចំនួនទៀត នឹងមកវិនិយោគនៅក្នុងខេត្តស្វាយរៀងផងដែរ។ ជាក់ស្ដែង គម្រោងវិនិយោគរាប់ពាន់លានដុល្លារអាមេរិក នឹងលេចឡើងនៅខេត្តស្វាយរៀង ក្នុងនោះដែរនឹងមានរោងចក្រផលិតរថយន្តនិងម៉ូតូ គ្រោងដំណើរការនៅខេត្តស្វាយរៀងទៀតផង។ ដូចនេះ វាជាឱកាសដ៏ល្អមួយសម្រាប់ខេត្ត ក៏ដូចជាប្រទេសកម្ពុជាទាំងមូល » ។
លោកបន្តថា ដើម្បីឱ្យការសាងសង់រោងចក្រផលិតរថយន្ត និងម៉ូតូដំណើរការឆាប់ៗ គណៈគ្រប់គ្រងខេត្តទាំងអស់នឹងជួយសហការសម្រួលដល់ការលំបាកនានាជាមួយក្រុមហ៊ុនវិនិយោគ ដើម្បីជំរុញឱ្យការផលិតបានឆាប់រហ័ស ។ ជាក់ស្ដែង កាលពីខែមុននេះ ខាងខេត្តបានណែនាំក្រុមហ៊ុន សហការជាមួយសាកលវិទ្យាល័យស្វាយរៀង សម្រាប់ជ្រើសរើសធនធានមនុស្ស និងបណ្ដុះបណ្ដាលបន្ថែមលើបច្ចេកទេសផលិតរថយន្ត និងម៉ូតូ ។
លោកបន្ថែមថា កាលពីមុន ខេត្តស្វាយរៀងបានតបណ្ដាញអគ្គិសនីពីប្រទេសវៀតណាម ដែលជាបញ្ហាមួយសម្រាប់វិនិយោគិន ប៉ុន្តែនៅពេលនេះ ដោយសារតែកម្ពុជាបានផលិតអគ្គិសនីប្រើប្រាស់ផ្ទាល់ខ្លួន និងតបណ្ដាញពីរាជធានីភ្នំពេញរួចនោះ វាជាសញ្ញាមួយផ្ដល់ទំនុកចិត្តដល់វិនិយោគិន ព្រោះរាល់ការផលិតទាំងអស់ តម្រូវការចាំបាច់ គឺអគ្គិសនីនេះឯង ៕
ចែករំលែកព័តមាននេះ