ខេត្តកំពង់ឆ្នាំង ៖ រហូតមកដល់ល្ងាចថ្ងៃទី២៥ ឧសភា សមត្ថកិច្ចកងរាជអាវុធហត្ថខេត្តកំពង់ឆ្នាំងនៅមិនទាន់បង្ហាញអត្តសញ្ញាណជនសង្ស័យ៤នាក់ ដែលបានឃាត់ខ្លួនក្រោយមានការចូលបាញ់ប្រហារ ក្នុងទីស្នាក់ការសង្កាត់រដ្ឋបាលព្រៃឈើក្រាំងស្គានៅឡើយទេ ដោយគ្រាន់តែបញ្ជាក់ថា កំពុងសាកសួរយ៉ាងយកចិត្តទុកដាក់ ព្រោះតែជនសង្ស័យទាំងនោះមិនទាន់សារភាព ។
នៅថ្ងៃទី២៥ ឧសភា គេសង្កេតឃើញមានមន្ត្រីកងរាជអាវុធហត្ថលើផ្ទៃប្រទេស បានចុះមកទីបញ្ជាការដ្ឋាន កងរាជអាវុធហត្ថខេត្តដើម្បីជួយស្រាវជ្រាវក្នុងករណីនេះដែរ ព្រោះជារឿងក្តៅ ដែលមិនអាចសាកសួរស្រាវជ្រាវលំៗបានទេ ដោយសារតែការចូលបាញ់ប្រហារយ៉ាងសាហាវនេះ បណ្តាលឱ្យជីវិតមនុស្សមានមន្ត្រីរដ្ឋបាលព្រៃឈើម្នាក់ស្លាប់ និងរបួសធ្ងន់ស្រាលដល់ទៅ៣នាក់ ។
តាមប្រភពសុំមិនបញ្ចេញឈ្មោះ ពីមន្ត្រីកងរាជអាវុធហត្ថខេត្តបានឱ្យដឹងថា កាំភ្លើងអាកាចំនួន៣ដើម ដែលត្រូវបានសមត្ថកិច្ចដកហូតពីជនសង្ស័យ ក្រោយធ្វើកោសល្យវិច្ច័យមាន១ដើមត្រូវគ្នានឹងសំបកគ្រាប់ដែលប្រមូលបានពីកន្លែងកើតហេតុ ។ ប្រភពដដែលបញ្ជាក់ថា កាំភ្លើងវែងធុនអាកាទាំង៣ដើម មាន១ដើម ដែលជនដៃដល់បានយកចេញពីក្នុងស្នាក់ការ របស់សង្កាត់រដ្ឋបាលព្រៃឈើក្រាំងស្គា ក្នុងពេលធ្វើសកម្មភាពចូលបាញ់ប្រហារ ដែលមុននេះបានផ្សាយថាបានបាត់កាំភ្លើងអាកា១ដើមនៅក្នុងស្នាក់ការ ។
ដូចគ្នានេះដែរ នៅស្នងការដ្ឋាននគរបាលខេត្ត ដែលសមត្ថកិច្ចនគរបាល បានកោះហៅមនុស្ស២នាក់មកសាកសួរផងដែរ គឺស្ត្រីម្នាក់និងប្រុសម្នាក់ ដែលជំហានដំបូងថាជាអ្នកដាំបាយនៅស្នាក់ការសង្កាត់រដ្ឋបាលព្រៃឈើក្រាំងស្គា ។ ប្រភពដែលសុំមិនបញ្ចេញឈ្មោះបានប្រាប់ថា ស្ត្រីនោះធ្លាប់មានទំនាក់ទំនងស្នេហា ជាមួយមន្ត្រីរដ្ឋបាលព្រៃឈើ ហើយក្រោយមកក៏មានទំនាក់ទំនងស្នេហាជាមួយទាហានកងកាំភ្លើងធំម្នាក់ ក្នុងចំណោម៣នាក់ដែលត្រូវបានឃាត់ខ្លួន ។
ជុំវិញការឃាត់ខ្លួនជនសង្ស័យជាកម្លាំងយោធាកងកាំភ្លើងធំទាំង៣នាក់នេះ ត្រូវបានកងរាជអាវុធហត្ថប្រាប់ថា ការឃាត់ខ្លួននេះអាចនឹងសុំទៅតុលាការដើម្បីសុំពន្យារពេលឃាត់ខ្លួនបន្តទៀត ប្រសិនបើការកសាងសំណុំរឿង និងប្រមូលឯកសារភស្តុតាង នៅមិនទាន់គ្រប់គ្រាន់ និងចប់សព្វគ្រប់ ។
សូមរឭកថា កាលពីយប់ថ្ងៃទី២៣ ឧសភា មានខ្មាន់កាំភ្លើង២នាក់ ប្រដាប់ដោយកាំភ្លើងអាកា២ដើមបានចូលបាញ់ប្រហារក្នុងស្នាក់ការសង្កាត់រដ្ឋបាលព្រៃឈើក្រាំងស្គា ស្ថិតក្នុងភូមិក្តុល ឃុំក្តុលសែនជ័យ ស្រុកទឹកផុស បណ្តាលឱ្យមន្ត្រីសង្កាត់រដ្ឋបាលព្រៃឈើម្នាក់ស្លាប់ និង៣នាក់ទៀតបានរងរបួសធ្ងន់ស្រាល ក្នុងនោះមានមេបញ្ជាការងកងរាជអាវុធហត្ថស្រុកទឹកផុសម្នាក់ មន្ត្រីយោធាជាម្ចាស់ស្ថានីយប្រេងនៅមុខស្នាក់ការមេព្រៃម្នាក់ និងប្រជាពលរដ្ឋម្នាក់ដែលនៅពិសារបាយជុំគ្នា ក្នុងស្នាក់ការមេព្រៃកន្លែងកើតហេតុ ។
ក្រោយពេលកើតហេតុសមត្ថកិច្ចបានចាប់ឃាត់ខ្លួនជនសង្ស័យជាយោធាកងកាំភ្លើងធំ៣នាក់ ក្រោយមកបានឃាត់ម្នាក់ទៀត និងថ្ងៃម្សិលមិញបានឃាត់ខ្លួនម្នាក់ទៀត សរុប៥នាក់ ដែលតាមប្រភពសម្ងាត់ថា ពាក់ព័ន្ធរឿងខ្ចីកាំភ្លើងគ្នា ។ យោងតាមសមត្ថកិច្ចជំនាញផ្នែកព្រហ្មទណ្ឌ បាននិយាយថា តាមនីតិវិធីចម្លើយសារភាពគ្រាន់តែជាចំណែកមួយប៉ុណ្ណោះ សំខាន់ទៀតនោះទោះជនសង្ស័យមិនសារភាព បើផ្អែកតាមវត្ថុតាង សាក្សីដាក់បន្ទុកជាច្រើន គឺមានពិរុទ្ធភាពគ្រប់គ្រាន់ ដែលអាចតុលាការឃុំខ្លួនជាបណ្តោះអាសន្នដើម្បីបើកការស៊ើបអង្កេតជាបន្តទៀត គ្មានឱ្យជនល្មើសរួចខ្លួនទេ ៕
ចែករំលែកព័តមាននេះ