រាជធានីភ្នំពេញ ៖ ក្រសួងពាណិជ្ជកម្ម នៅព្រឹកថ្ងៃទី២៥ ឧសភា បានដាក់ឲ្យប្រើប្រាស់ជាផ្លូវការនូវប្រព័ន្ធស្នើសុំចុះបញ្ជីម៉ាកតាមអេឡិចត្រូនិកជាលើកដំបូង ដែលជាយន្តការថ្មីមួយសម្រួលការធ្វើពាណិជ្ជកម្មនៅកម្ពុជា ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម មានប្រសាសន៍ថា នៅក្នុងប្រទេសកម្ពុជា ម៉ាកគឺជាផ្នែកមួយនៃកម្មសិទ្ធិបញ្ញា ដែលត្រូវបានការពារដោយច្បាប់ស្តីពីម៉ាកពាណិជ្ជនាម និងការប្រកួតប្រជែងមិនស្មោះត្រង់ ដែលរដ្ឋសភាជាតិអនុម័តឲ្យប្រើប្រាស់លើកដំបូងនៅក្នុងឆ្នាំ២០០២ ។ បច្ចុប្បន្ននេះ ក្រសួងពាណិជ្ជកម្មបានចុះបញ្ជីប្រមាណ៧ម៉ឺនម៉ាករួចហើយ ។ យ៉ាងណាក៏ដោយ ការទទួលស្គាល់សារសំខាន់នៃម៉ាកបានកើនឡើងយ៉ាងខ្លាំង ក្រោយពេលដែលកម្ពុជាក្លាយជាសមាជិកផ្លូវការនៃអង្គការពាណិជ្ជកម្មពិភពលោក WTO នៅឆ្នាំ២០០៤ ។
លោកបន្តថា ៖ « ការចុះបញ្ជីម៉ាកផលិតផលណាមួយ មិនត្រឹមតែអាចការពារផលប្រយោជន៍អាជីវកម្មប៉ុណ្ណោះទេ ប៉ុន្តែបានផ្តល់លទ្ធភាពសម្រាប់សហគ្រាសធុនតូច និងមធ្យម ក្នុងការពង្រីកសក្តានុពលអាជីវកម្ម តាមរយៈការនាំចេញទៅកាន់ទីផ្សារអន្តរជាតិថែមទៀតផង»។ លោកបន្តថា ៖ « ដោយមើលឃើញពីសារសំខាន់នៃការចុះបញ្ជីម៉ាកសម្រាប់ការអភិវឌ្ឍវិស័យឯកជន និងពង្រីកកំណើនសេដ្ឋកិច្ច ក្រសួងពាណិជ្ជកម្មបានប្រើប្រាស់ថវិការបស់កម្មវិធីគាំទ្រកិច្ចអភិវឌ្ឍន៍ពាណិជ្ជកម្ម TDSP រៀបចំហេដ្ឋារចនាសម្ព័ន្ធស្វ័យប្រវត្តិកម្ម ដើម្បីបង្កលក្ខណៈងាយស្រួលដល់ការគ្រប់គ្រងការចុះបញ្ជីម៉ាក » ៕
ចែករំលែកព័តមាននេះ