រាជធានីភ្នំពេញ ៖ តំបន់សេដ្ឋកិច្ចពិសេសភ្នំពេញ ស្ថិតនៅតាមបណ្ដោយផ្លូវជាតិលេខ៤ដែលមានចម្ងាយប្រមាណជាង២០គីឡូម៉ែត្រពីរាជធានីភ្នំពេញ ។ តំបន់សេដ្ឋកិច្ចពិសេសមួយនេះជាផ្នែកមួយយ៉ាងសំខាន់ក្នុងការទ្រទ្រង់
រាជធានីភ្នំពេញ ៖ តំបន់សេដ្ឋកិច្ចពិសេសភ្នំពេញ ស្ថិតនៅតាមបណ្ដោយផ្លូវជាតិលេខ៤ដែលមានចម្ងាយប្រមាណជាង២០គីឡូម៉ែត្រពីរាជធានីភ្នំពេញ ។ តំបន់សេដ្ឋកិច្ចពិសេសមួយនេះជាផ្នែកមួយយ៉ាងសំខាន់ក្នុងការទ្រទ្រង់កំណើនសេដ្ឋកិច្ចជាតិ និងផ្ដល់ការងារជូនកូនខ្មែររាប់សែននាក់ ។
បើតាមនាយកក្រុមហ៊ុនតំបន់សេដ្ឋកិច្ចពិសេសភ្នំពេញ លោក Uematsu Hiroshi ឲ្យដឹងថា បច្ចុប្បន្នមានក្រុមហ៊ុនសរុបប្រមាណ៨០ កំពុងប្រតិបត្តិការអាជីវកម្មរបស់ខ្លួននៅក្នុងតំបន់សេដ្ឋកិច្ចមួយនេះ ក្នុងនោះក្រុមហ៊ុនជប៉ុនមានចំនួន៤៥ ដែលអាចផ្តល់ការងារដល់ពលរដ្ឋកម្ពុជាប្រមាណ១ម៉ឺននាក់ ។
តាមការបញ្ជាក់ពីលោកនាយកក្រុមហ៊ុនតំបន់សេដ្ឋកិច្ចឲ្យដឹងថា ៖ « ការទទួលបានការងារធ្វើនៅក្នុងក្រុមហ៊ុនជប៉ុន សម្រាប់អ្នកដែលគ្រាន់តែចេះនិយាយភាសាជប៉ុន មិនទាន់អាចធ្វើជាអ្នកគ្រប់គ្រងបានទេ គឺទាមទារឱ្យចេះជំនាញអ្វីបន្ថែមទៀត ។ ប្រសិនបើពលរដ្ឋខ្មែរចេះនិយាយភាសាជប៉ុន ហើយចេះទាំងជំនាញផ្សេងៗទៀតនោះ ពួកគេនឹងទទួលបានប្រាក់បៀវត្សជាមធ្យម១ពាន់ដុល្លារក្នុងមួយខែ » ។
ឯកអគ្គរាជទូតជប៉ុនប្រចាំកម្ពុជា លោក ហូរីណូអ៊ុជិ ហ៊ីដេហ៊ីសា មានប្រសាសន៍ថា ក្រោយពីឆ្លងកាត់ដំណើរការស្វែងរកសន្តិភាពនៅកម្ពុជា រដ្ឋាភិបាលជប៉ុន និងរាជរដ្ឋាភិបាលកម្ពុជា បានកសាងទំនាក់ទំនងយ៉ាងរឹងមាំ និងមានអង្គការក្រៅរដ្ឋាភិបាលជប៉ុនមួយចំនួនបានធ្វើសកម្មភាពជួយដល់កម្ពុជាផងដែរ ។
លោកឯកអគ្គរាជទូតបញ្ជាក់ថា ៖ « ចាប់ពីឆ្នាំ២០១០មក ទំនាក់ទំនងរវាងប្រទេសយើងទាំងពីរបានពង្រីកទៅក្នុងវិស័យជាច្រើនបន្ថែមទៀត ។ តួយ៉ាង អ្នកធ្វើដំណើរពីកម្ពុជាទៅជប៉ុន កើនឡើងពី៣.៦៧៣នៅឆ្នាំ២០១២ ទៅ១២.២៣៥នាក់នៅឆ្នាំ២០១៦ ។ ទន្ទឹមនឹងនេះ ក្រុមហ៊ុនជប៉ុនជាសមាជិកសមាគមពាណិជ្ជកម្មជប៉ុននៅកម្ពុជា ក៏បានកើនឡើងពី១០ក្រុមហ៊ុននៅឆ្នាំ១៩៩២ ដល់២.៧០២ក្រុមហ៊ុន គិតមកដល់ចុងខែមីនា ឆ្នាំ២០១៧នេះ » ។
លោកបន្តថា ក្រុមហ៊ុនជប៉ុនទាំងនោះបានវិនិយោគលើវិស័យជាច្រើនដូចជា ពាណិជ្ជកម្ម សេវាកម្ម សំណង់ កាត់ដេរ និងផលិតកម្ម ដូចជាគ្រឿងបម្លាស់រថយន្ត ផ្សារទំនើប សណ្ឋាគារ និងរមណីយដ្ឋានជាដើម ហើយទំហំពាណិជ្ជកម្មរវាងប្រទេសទាំងពីរក៏កើនឡើងដែរ ។
លោកបញ្ជាក់ថា ៖ « ទំហំពាណិជ្ជកម្មរវាងជប៉ុន-កម្ពុជា នៅឆ្នាំ២០១៦កន្លងទៅ មាន១.៥១១លានដុល្លារអាមេរិក ក្នុងនោះទឹកប្រាក់នាំចេញពីកម្ពុជាទៅជប៉ុន មានរហូតទៅដល់១.២៤៥លានដុល្លារ កើនឡើង៩៦៨លានដុល្លារ បើធៀបនឹងឆ្នាំ២០១៥ » ៕
ចែករំលែកព័តមាននេះ