ខេត្តកំពង់ស្ពឺ ៖ ជនសង្ស័យដែលធ្វើសកម្មភាពកាប់ប្លន់ជនរងគ្រោះប្លន់យកម៉ូតូត្រូវសមត្ថកិច្ចចាប់ខ្លួនបានម្នាក់ទៀតហើយ បន្ទាប់ពីជននេះសម្ងំលាក់ខ្លួននៅក្នុងផ្ទះខ្លួនឯង ក្រោយធ្វើសកម្មភាពរួចមក។ ជនសង្ស័យត្រូវបានរកឃើញថាមានផ្ទុកទៅដោយសារធាតុញៀនពេញខ្លួនតែម្តង។ ប្រភពពីមន្ត្រីនគរបាលស្រុកបសេដ្ឋបានឲ្យដឹងថា ជនសង្ស័យដែលឃាត់ខ្លួននេះមានឈ្មោះ ជា ពិសិដ្ឋ ភេទប្រុស អាយុ២០ឆ្នាំរស់នៅភូមិឈូកកៀប ឃុំភក្តី ស្រុកបសេដ្ឋ ខេត្តកំពង់ស្ពឺ ចាប់ខ្លួនកាលពីរសៀលថ្ងៃ២២ ឧសភា ២០១៧តាមចម្លើយរបស់ជនសង្ស័យជាមុខសញ្ញា ឈ្មោះ ស៊ូ សុខនៅ (ហៅព្រីង) ភេទប្រុស អាយុ២០ឆ្នាំ នៅភូមិដំបូកខ្ពស់ ឃុំផុង ស្រុកបសេដ្ឋ ខេត្តកំពង់ស្ពឺ។
នៅចំពោះមុខសមត្ថកិច្ចជនសង្ស័យ ជា ពិសិដ្ឋ បានឆ្លើយបដិសេធថា ខ្លួនមិនបានប្រព្រឹត្រដូចការលើកឡើងរបស់ឈ្មោះ ស៊ូ សុខនៅ នោះទេ ហើយខ្លួនក៏មិនដែលស្គាល់ឈ្មោះ ស៊ូ សុខនៅ នេះដែរ។ បើទោះជាជននេះមិនព្រមសារភាពក៏ដោយយោងតាមចម្លើយសារភាពរបស់ជនសង្ស័យ ស៊ូ សុខនៅ សមត្ថកិច្ចបានកសាងសំណុំរឿងបញ្ជូនជនសង្ស័យទាំង២នាក់ទៅកាន់ស្នងការដ្ឋាននគរបាលខេត្តចាត់ការបន្ត។ ទោះជាយ៉ាងនេះក្តីសមត្ថកិច្ចបានធ្វើតេស្តទឹកនោមរបស់ជនសង្ស័យឃើញថាមានផ្ទុកទៅដោយសារធាតុញៀនពេញបន្ទុកតែម្តង។ បើតាមការឆ្លើយសារភាពពីសំណាក់ជនសង្ស័យឈ្មោះ ស៊ូ សុខនៅ គឺរូបគេរួម និងឈ្មោះ សិដ្ឋ បានធ្វើសកម្មភាពកាប់ជនរងគ្រោះហើយយកម៉ូតូដោះស្លាកលេខចេញ ជិះយកទៅកន្លែងលក់ម៉ូតូមួយកន្លែងនៅផ្សារត្រពាំងអណ្តើក ដោយសុំដូរយកម៉ូតូនិចពីអ្នកលក់ដោយកុហក់ថា កាតគ្រីនៅម្តាយរបស់គេ។
ក្នុងការដូរនេះដែររូបគេបានសុំឲ្យម្ចាស់កន្លែងទិញលក់ថែមលុយដល់គេចំនួន៧០០ដុល្លារទៀតផង តែឲ្យបាន១០០ដុល្លារប៉ុណ្ណោះ រូបគេក៏ត្រូវចាប់ខ្លួនតែម្តង។ បើតាមមន្ត្រីនគរបាលប៉ុស្តិ៍រដ្ឋបាលត្រពាំងអណ្តើក ស្រុកត្រាំកក់ ខេត្តតាកែវ ដែលមានព្រំប្រទល់ជាប់គ្នាបានឲ្យដឹងថា ដោយមានការស្នើសុំសហការពីលោកអនុសេនីយ៍ឯក ឃុន សុផលអធិការរងនគរបាលស្រុកបសេដ្ឋ កម្លាំងជំនាញបានចុះជាប់ជាប្រចាំនៅកន្លែងលក់ម៉ូតូរហូតប្រទះឃើញជនសង្ស័យយកម៉ូតូសេ១២៥មកសុំដូរយកម៉ូតូនិច ហើយតម្រូវឲ្យខាងអ្នកទិញម៉ូតូថែមលុយឲ្យគេទៀតផងដោយជនសង្ស័យឈ្មោះ ស៊ូ សុខនៅ នេះប្រាប់ថា កាតគ្រីនៅម្តាយរបស់គេ ចាំគេយកមកឲ្យនៅពេលក្រោយ។ ដោយដឹងច្បាស់ថាជននេះជាមុខសញ្ញាសង្ស័យហើយខាងអនុប៉ុស្តិ៍រដ្ឋបាលត្រពាំងអណ្តើកបានទាក់ទងជាមួយលោកអធិការរង ឃុន សុផល ដើម្បីយកលុយមកឲ្យជនសង្ស័យរូបនេះ ពេលនោះលោកអធិការរងបានចំណាយលុយ១០០ដុល្លារទៅឲ្យជននេះ ហើយសន្យាថានឹងឲ្យគ្រប់នៅពេលដែលយកកាតគ្រីមកប្រគល់ដល់ដៃអ្នកទិញ(សមត្ថកិច្ច)។ នៅពេលដែលកំណត់មុខសញ្ញាបានហើយខាងនគរបាលស្រុកបសេដ្ឋក៏ឃាត់ជនសង្ស័យរូបនេះនៅផ្ទះរបស់គេបានតែម្តង។
មានការសាទរពីសំណាក់មហាជនផងដែរចំពោះសមត្ថកិច្ចនគរបាលក្នុងការបំបែកករណីប្លន់សម្លាប់យកម៉ូតូដែលឈានដល់ការឃាត់ខ្លួនជនសង្ស័យបានក្នុងរយៈពេលដ៏ខ្លីបែបនេះ។ ក្នុងនោះក៏មានការលើកឡើងថា ជាធម្មតាជនសង្ស័យដែលប្រព្រឹត្តពួកគេតែងតែបដិសេធថាមិនបានប្រព្រឹត្តជារឿងធម្មតាទៅហើយ ករណីនេះសមត្ថកិច្ចបានខិតខំបំបែកបានហើយក្រោមការបញ្ជាពីលោកស្នងការនគរបាលខេត្ត មហាជនសង្ឃឹមថាព្រលឹងរបស់ជនរងគ្រោះនឹងស្ងប់សុខជាក់ជាមិនខានឡើយ។ សូមរំលឹកថា ជនសង្ស័យរួម និងបក្ខពួកបានស្ទាក់ផ្លូវជនរងគ្រោះឈ្មោះ ប៊ុត រេម ភេទប្រុស អាយុ៤៣ឆ្នាំ រស់នៅភូមិត្រពាំងលាភ ឃុំផុង ស្រុកបសេដ្ឋ ដោយធ្វើសកម្មភាពកាប់ជនរងគ្រោះជាច្រើនពូថៅសម្លាប់ប្លន់យកម៉ូតូ កាលពីយប់ថ្ងៃទី១៥ ឧសភា ២០១៧ នៅចំណុចប្រឡាយទឹកក្បែលូរ ភូមិត្រពាំងលាប ឃុំផុង ស្រុកបសេដ្ឋ ខេត្តកំពង់ស្ពឺ៕
ចែករំលែកព័តមាននេះ