រាជធានីភ្នំពេញ ៖ ដើម្បីកាត់បន្ថយការប្រើប្រាស់អគ្គិសនី សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបញ្ជាឲ្យអភិបាលរាជធានី-ខេត្ត បន្ដប្រើប្រាស់អំពូលវ័យឆ្លាត សម្រាប់ដាក់តាមដងផ្លូវសាធារណៈនានា ដោយធ្វើការបញ្ជាទិញពីក្រុមហ៊ុនក្នុងស្រុក ។
ថ្លែងក្នុងឱកាសអញ្ជើញអបអរសាទរ ខួប១១ឆ្នាំ នៃប្រតិបត្តិការរបស់ក្រុមហ៊ុនមីនេបៀ Minebea (Cambodia) នាព្រឹកថ្ងៃទី១ ខែធ្នូ ឆ្នាំ២០២២ សម្ដេចតេជោ ហ៊ុន សែន បានឱ្យដឹងថា ក្រុមហ៊ុនមីនេបៀ ជាក្រុមហ៊ុនមួយផលិតអំពូលភ្លើងវ័យឆ្លាត ហើយត្រូវបានប្រទេសមួយចំនួន ជុំវិញលើពិភពលោក បញ្ជាទិញអំពូលភ្លើងវ័ឆ្លាតនេះ យកទៅប្រើប្រាស់ផងដែរ ។
សម្ដេចតេជោបានគូសបញ្ជាក់ថា ៖ «ខ្ញុំសូមជម្រាបជូនទៅ អភិបាលរាជធានី-ខេត្ត បន្ដការប្រើប្រាស់នូវអំពូលវ័យឆ្លាត សម្រាប់ដាក់បំភ្លើតាមដងផ្លូវនានា ដោយទទួលការបញ្ជាទិញពីរោងចក្រ ដោយផលិតនៅក្នុងប្រទេសរបស់យើង មានស្រាប់» ។
សម្ដេចតេជោ ក៏បាមពន្យល់ថា នៅតាមលើដងផ្លូវមួយដ៏វែង ប្រសិនបើពុំមានរថយន្ដឆ្លងកាត់នោះទេ អំពូលវ័យឆ្លាតនេះ នឹងកាត់បន្ថយពន្លឺ នឹងធ្វើឱ្យចំណេញដល់អគ្គិសនី ផងដែរ ។ សម្ដេច បន្ដថា អគ្គិសនី ជាផ្នែកមួយពាក់ព័ន្ធទៅនឹងការវិនិយោគនានា ។
សម្ដេចតេជោ បន្ថែមថា រហូតមកដល់ពេលនេះ កម្ពុជាមានប្រភពថាមពលស្អាតច្រើនជាងគេ ក្នុងបណ្តាប្រទេសមួយចំនួនក្នុងតំបន់។ សម្ដេច ថា ការវិនិយោគណាក៏ដោយ ក៏ត្រូវគិតពីផងប៉ះពាល់ផងដែរ។
ជាមួយគ្នានោះដែរសម្ដេច នាយករដ្ឋមន្ដ្រី បានបង្ហើបឱ្យដឹងថា ឯកឧត្តមកែវ រតនៈ អគ្គនាយកអគ្គិសនីកម្ពុជា ក៏បាននាំក្រុមហ៊ុនមីនេបៀ ទៅពិនិត្យលទ្ធភាពបើម្បីបង្កើតរោងចក្រអគ្គិសនី នៅខេត្តពោធិ៍សាត់ ដើរដោយថាមពលពន្លឺព្រះអាទិត្យ៕
ចែករំលែកព័តមាននេះ