ប្រមុខប៉ូលិសអាហ្វហ្គានីស្ថាន និងទូរទស្សន៍អាេមរិក FOX NEWS នាពេលថ្មីៗនេះចោទប្រកាន់រុស្ស៊ីថា ជួយផ្តល់អាវុធដល់ពួកតាលីបង់ ។
យោងតាមផ្នែកការទូតរុស្ស៊ីថា ការប៉ុនប៉ងទាំងនេះ ដើម្បីមួលបង្កាច់រុស្ស៊ីជាផ្នែកមួយនៃយុទ្ធសាស្ត្រសំដៅលាក់បាំងបណ្តាបញ្ហាដែលអាមេរិកជួបប្រទះនៅអាហ្វហ្គានីស្ថាន ។
ក្រសួងការបរទេសរុស្ស៊ីថ្លែងនាថ្ងៃទី២៣ ឧសភា ថា បណ្តាសេចក្តីថ្លែងការណ៍ដែលថារុស្ស៊ីជួយទ្រទ្រង់ដល់ពួកតាលីបង់គឺសំដៅបិទបាំងបរាជ័យខាងយោធាជាច្រើនរបស់អាមេរិក និងរបស់អូតង់នៅអាហ្វហ្គានីស្ថាន ។ ក្រសួងនេះគូសបញ្ជាក់ថា គេប៉ុនប៉ងជានិច្ចមួលបង្កាច់រុស្ស៊ី ដើម្បីពង្វាងការចាប់អារម្មណ៍របស់សហគមន៍អន្តរជាតិចំពោះបរាជ័យ ដែលពួកគេទទួលរងរយៈពេល១៥ឆ្នាំនៃវត្តមានកងទាហានអាមេរិក និងអូតង់នៅអាហ្វហ្គានីស្ថាន ហើយបិទបាំងជំនួយដែលពួកគេលួចផ្តល់ដល់ពួកភេរវករ ពិសេសបណ្តាសមាជិកក្រុមរដ្ឋអ៊ិស្លាម ។
ប្រមុខប៉ូលិសខេត្តកាន់ដាហារអាហ្វហ្គានីស្ថាន ឧត្តមសេនីយ៍ ABDUL RAZIQ អះអាងនាពេលថ្មីៗនេះថា រុស្ស៊ី និងប្រទេសឯទៀតៗជួយផ្តល់ហិរញ្ញវត្ថុដល់ពួកតាលីបង់ ហើយផ្តល់អាវុធដល់ពួកនេះ ។ ចំណែកទូរទស្សន៍អាមេរិក FOX NEWS ចេញផ្សាយព័ត៌មានមួយសំដៅឱ្យទស្សនិកជនជឿថា រុស្ស៊ីធ្វើការរត់ពន្ធអាវុធនៅតាមព្រំដែនអាហ្វហ្គានីស្ថាន ។ យោងតាមក្រសួងការបរទេសរុស្ស៊ីថា នេះជាការបំផ្លើសទាំងស្រុង ។ ក្រសួងនេះធ្វើការកត់សម្គាល់ថា សេចក្តីរាយការណ៍របស់ FOX NEWS គឺប្រើប្រាស់វិធីសាស្ត្របំផ្លើស ដោយបញ្ចូលរូបភាពនៃបណ្តាឧទ្ធម្ភាគចក្រមិនស្គាល់អត្តសញ្ញាណនៅខេត្ត ជាប់ព្រំដែនអាហ្វហ្គានីស្ថាន KONDOZ ព្រមទាំងលើកពីរឿងរត់ពន្ធអាវុធកាត់ព្រំដែនតាហ្ស៊ីគីស្ថាន- អាហ្វហ្គានីស្ថាន ព្រមទាំងនិយាយពីពាក្យចចាមអារ៉ាមអំពីការបញ្ជូនទីប្រឹក្សាយោធារុស្ស៊ីទៅជួយពួកតាលីបថង់ និងការផ្តល់ជំនួយហិរញ្ញវត្ថុ និងភស្តុភាររុស្ស៊ីដល់ពួកតាលីបង់ ៕
ចែករំលែកព័តមាននេះ