ប៉ុន្មានថ្ងៃមកនេះ ហាក់មានការចលាចលមិនស្ទើរនោះទេ ក្រោយបានដឹងថាតារាសម្ដែងប្រុសថៃវ័យក្មេង គឺលោក Nine Naphat បានសារភាពនៅចំពោះមុខទស្សនិកជន ក៏ដូចជាហ្វេនៗ រួមទាំងអ្នកសារព័ត៌មានថា
ប្រទេសថៃ ៖ ប៉ុន្មានថ្ងៃមកនេះ ហាក់មានការចលាចលមិនស្ទើរនោះទេ ក្រោយបានដឹងថាតារាសម្ដែងប្រុសថៃវ័យក្មេង គឺលោក Nine Naphat បានសារភាពនៅចំពោះមុខទស្សនិកជន ក៏ដូចជាហ្វេនៗ រួមទាំងអ្នកសារព័ត៌មានថា លោកមានចិត្តលើកំពូលតារាសម្ដែងស្រីឯករាជ្យនោះ គឺកញ្ញា Baifern ហើយមានអ្នកគាំទ្រមិនតិចនាក់នោះទេ ទាំងក្នុង និងក្រៅប្រទេស បាននាំគ្នាធ្វើជាមេអណ្ដើក លួងលោម ឌុកអោយតារាស្រី Baifern រូបនេះ ចេញមុខមកផ្ដល់ចម្លើយឆ្លើយតបយល់ព្រមអោយលឿនៗជាមួយតារាប្រុស Nine Naphat ទៅ បន្ទាប់ពីតារាប្រុសស្រស់សង្ហា ខ្ពស់ស្រឡះរូបនេះ បានខលទៅសារភាពសុំស្នេហ៍នាងតាមទូរស័ព្ទ និងបានចេញមុខមកផ្ដល់បទសម្ភាសន៍ជាសាធារណៈពីចិត្តស្នេហ៍របស់ខ្លួនទៅកាន់នាង កាលពីពេលថ្មីៗនេះ។
ក្នុងនោះផងដែរ តារាសម្ដែងប្រុសរូបស្រស់សង្ហា លោក Naphat បានចេញមុខមកនិយាយបកស្រាយខ្ទេចគ្មានសល់នៅក្នុងបទសម្ភាស៍ បន្ទាប់ពីបានចូលរួមនៅក្នុងព្រឹត្តិការណ៍មួយនៅតំបន់ Bang Yai ជាមួយនឹងសារព័ត៌មានជាច្រើន ទាំងគ្មានលាក់លៀមតទៅទៀត បន្ទាប់ពីបែកធ្លាយរឿងនេះពាសពេញបណ្ដាញសង្គមថា « Nine & Baifern អ្នកទាំងពីរបានបញ្ចប់ទំនាក់ទំនង Friend zone ហើយចាប់ពីពេលនេះតទៅ ក្រោយរាប់អានគ្នាជាមិត្តរយៈពេល៤ទៅ៥ឆ្នាំមកនេះ»។
ហើយតារាប្រុស Nine Naphat បានបញ្ជាក់យ៉ាងច្បាស់ៗថា «លោកបានបញ្ជាក់ និងនិយាយដដែលៗថា ពួកគេពិតជាបានបញ្ចប់ទំនាក់ទំនង Friend Zone ពិតប្រាកដមែន ដោយ Nine មានចិត្តលើ Baifern ជាយូរណាស់មកហើយ ប៉ុន្ដែលោកមិនដឹងថា គួរចាប់ផ្ដើមដោយរបៀបណានោះទេ។ ដូច្នេះហើយទើបខ្ញុំទៅពិគ្រោះយោបល់ជាមួយ P’Num Kanchai បន្ទាប់ពីនិយាយជាមួយ P’Num Kanchai រួចហើយ P’Num Kanchai ក៏បានប្រាប់ឲ្យខ្ញុំសារភាពទៅកាន់ Baifern។ រួចហើយខ្ញុំក៏បាន Call ទៅសារភាពប្រាប់ត្រង់ៗទៅកាន់នាងថា «ខ្ញុំស្រឡាញ់ Baifern» ហើយ Baifern ក៏សើច និងមិនបាននិយាយអ្វីទេ ខ្ញុំក៏មិនដឹងថា យ៉ាងណានោះដែរ? ដូច្នេះហើយពឹងបងៗសារព័ត៌មានសួរ Baifern ឲ្យខ្ញុំផង។ ហើយបន្ទាប់ពីថ្ងៃសារភាពនោះមក ខ្ញុំនិងBaifern នៅតែនិយាយគ្នាជាធម្មតា តាមទូរស័ព្ទ មិនបានជួបគ្នានៅខាងក្រៅទេ ព្រោះជាប់រវល់ការងាររៀងៗខ្លួន ពេលនេះអ្វីដែលសំខាន់បំផុត ខ្ញុំសូមអោយអ្នកទាំងអស់គ្នាផ្ដល់កម្លាំងចិត្តអោយខ្ញុំផង»។
ទន្ទឹមនឹងនោះ បន្ទាប់ពីប្រកាសបើកចំហរ និងបញ្ចប់ចំណងមិត្តភាពលើតួឯកស្រីនៅក្នុងរឿង «Friend Zone» រួចមក តារាប្រុស Nine Naphat បានទទួលការគាំទ្រយ៉ាងពេញទំហឹងពីសំណាក់ហ្វេនៗដែលតែងតែស្រលាញ់រូបលោកមិនស្ទើរនោះទេ បើទោះបីជាពេលនេះ ខាងស្រីនៅមិនទាន់និយាយយល់ព្រមយ៉ាងណាក្ដី ប៉ុន្តែហ្វេនៗជាច្រើនបាននាំគ្នាព្យាយាមទទូចមិនឈប់ឱ្យ Baifern ព្រមធ្វើជាមិត្តស្រីរបស់លោក ដូចក្នុងតួឯកទាំងពីរក្នុងខ្សែភាពយន្តដូច្នោះដែរ។
ជាពិសេស មិនត្រឹមតែអ្នកគាំទ្រនោះទេ ដែលចង់អោយអ្នកទាំងពីរស្រលាញ់គ្នា សូម្បីតែមិត្តភក្តិនៅក្នុងរង្វង់សិល្បៈជាច្រើននាក់ផ្សេងៗទៀត ក៏បានចេញមុខមកគាំទ្រយ៉ាងពេញទំហឹងចំពោះ Nine Naphat ផងដែរ ខណៈកញ្ញា Baifern នៅតែបន្តភាពស្ងៀមស្ងាត់មិនបង្ហើបអ្វីនៅឡើយ។
យ៉ាងណាមិញ យើងនៅមិនទាន់ដឹងច្បាស់ទេថា រឿងនេះនឹងទៅជាយ៉ាងណាអោយពិតប្រាកដនោះ? មានតែរង់ចាំតាមដានបន្តទៀត និងភាគីកំពូលតារាស្រី Baifern ម្ខាងទៀតចេញមុខមកបកស្រាយអោយកាន់តែច្បាស់តែប៉ុណ្ណោះ ព្រោះពេលនេះ Nine Naphat បានសារភាពហើយថា លោកពិតជាមានចិត្តទៅលើតារាសម្ដែងស្រីដ៏ល្បីរូបនេះមែន។ ចាំមើលថា តើអ្នកទាំងពីរនឹងអាចក្លាយជាគូស្នេហ៍នឹងគ្នាឬអត់? ដូច្នេះហើយយើងមានតែរង់ចាំចម្លើយពីខាងស្រីបន្តទៀតតែប៉ុណ្ណោះ ដោយហ្វេនៗនាំគ្នារំពឹងថា នាងមិនបដិសេដចំពោះក្ដីស្នេហ៍របស់តារាប្រុស Nine Naphat ទៅចុះ៕
ចែករំលែកព័តមាននេះ