សម្ដេចតេជោ ហ៊ុន សែន អបអរស្ថាប័នឈ្នះមេដាយកីឡាជាតិច្រើន និងក្រើនរំលឹកស្ថាប័នឈ្នះមេដាយតិច ត្រូវខំប្រឹងអភិវឌ្ឍបន្ថែម
- ភ្នំពេញ
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានអបអរសាទរក្រសួង-
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានអបអរសាទរក្រសួង-ស្ថាប័ន និងរាជធានី-ខេត្ត ដែលទទួលបានលទ្ធផលល្អក្នុងការប្រកួតកីឡាជាតិ លើកទី៣ និងកីឡាជាតិជនពិការ លើកទី១ ហើយបានក្រើនរំលឹក និងជំរុញឲ្យក្រសួង-ស្ថាប័ន និងរាជធានី-ខេត្ត ដែលធ្វើពុំទាន់បានល្អ ត្រូវខិតខំអភិវឌ្ឍវិស័យកីឡាក្នុងមូលដ្ឋានរបស់ខ្លួនឲ្យរីកចម្រើន ដើម្បីត្រៀមការប្រកួតនាពេលខាងមុខ។
ការលើកឡើងនេះ ស្របពេលសម្ដេចតេជោនាយករដ្ឋមន្ដ្រី បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបិទការប្រកួតកីឡាជាតិ លើកទី៣ និងកីឡាជាតិជនពិការ លើកទី១ ឆ្នាំ២០២២ នៅវិមានកីឡដ្ឋាន នៃពហុកីឡដ្ឋានជាតិមរតកតេជោ នៅល្ងាចថ្ងៃទី៣០ ខែវិច្ឆិកា ដោយមានអ្នកចូលរួមប្រមាណជាង៤ម៉ឺននាក់។
សម្ដេចតេជោ ហ៊ុន សែន មានប្រសាសន៍ថា ៖«ខ្ញុំមានសុទិដ្ឋិនិយម និងសូមអបអរសាទរចំពោះក្រុមកីឡាករ-កីឡាការិនីក្រសួង-ស្ថាប័ននិងរាជធានី-ខេត្ត ដែលបានទទួលចំណាត់ថ្នាក់ល្អ និងមេដាយច្រើនជាងគេ ។ ខ្ញុំសូមលើកទឹកចិត្តឱ្យបន្តយកចិត្តទុកដាក់ពង្រឹងសមត្ថភាពជំនាញកីឡា និងបំផុសចលនាកីឡាក្នុងដែនសមត្ថកិច្ចគ្រប់គ្រងរបស់ខ្លួនឱ្យកាន់តែរីកចម្រើនថែមទៀត ។
ដោយឡែកក្រសួង-ស្ថាប័ន និងរាជធានី-ខេត្ត ដែលពុំទទួលបានលទ្ធផលល្អវិញ សូមបន្តយកចិត្តទុកដាក់កែលម្អ និងខិតខំប្រឹងប្រែងបន្ថែម ដើម្បីសម្រេចបានលទ្ធផលល្អក្នុងការប្រកួតកីឡាជាតិលើកទី៤ និងកីឡាជាតិជនពិការលើកទី២ នៅឆ្នាំ ២០២៤ ខាងមុខ»។
គួរឱ្យដឹងផងដែរថា កីឡាជាតិលើកទី៣ គឺមានប្រតិភូ គ្រូបង្វឹក និងកីឡាករ-កីឡាការិនីចូលរួមសរុប ៣.៣៣៦នាក់ មកពី២៥រាជធានី-ខេត្ត និង៣ក្រសួង ដោយប្រកួតលើ៣៨ប្រភេទ
កីឡា ស្មើនឹង៣៣៤វិញ្ញាសា។ រីឯកីឡាជាតិជនពិការ លើកទី១ មានប្រតិភូ គ្រូបង្វឹក និងកីឡាករ-កីឡាការិនីចូលរួមសរុប ២១៣នាក់ មកពី១៥រាជធានី-ខេត្ត ដែលប្រកួតលើ៧ប្រភេទកីឡា ស្មើនឹង៤៥វិញ្ញាសា។
ចំពោះលទ្ធផលបច្ចេកទេសរុបនៃការប្រកួតកីឡាជាតិ លើកទី៣ សម្រាប់ក្រសួង-ស្ថាប័ន និងរាជធានី-ខេត្ត ដណ្ដើមបានមេដាយច្រើនជាងគេ រួមមានក្រសួងមហាផ្ទៃ ឈរចំណាត់
ថ្នាក់លេខ១ ឈ្នះមេដាយមាស ១០៤, ប្រាក់ ៦១ និងសំរឹទ្ធ៤៩ សរុប២១៤គ្រឿង។
ក្រសួងការពារជាតិ ឈរលេខ២ ឈ្នះមេដាយមាស៦០ ប្រាក់៣៣ និងសំរឹទ្ធ៣១ សរុប ១២៤គ្រឿង ។ ក្រសួងសេដ្ឋកិច្ច និងហិរញ្ញវត្ថុ ឈរលេខ៣ ឈ្នះមេដាយមាស ២៩, ប្រាក់ ២៤ និងសំរឹទ្ធ ២៤ សរុប៧៧គ្រឿង ។ ខេត្តព្រៃវែង ឈរលេខ៤ ឈ្នះមេដាយមាស ១៧ ប្រាក់ ២៨ និងសំរឹទ្ធ ២៩ សរុប ៧៤ និងខេត្តសៀមរាប ឈរលេខ៥ ឈ្នះមេដាយមាស ១៥ ប្រាក់ ២២ និងសំរឹទ្ធ ២១ សរុប ៥៨គ្រឿង។
ចំណែកកីឡាជាតិជនពិការ លើកទី១ ក្នុងចំណោម ៤៥វិញ្ញាសា គឺខេត្តសៀមរាប ឈរចំណាត់ថ្នាក់លេខ១ ដោយដណ្ដើមបានមេដាយមាស ១៥ ប្រាក់ ៤ និងសំរឹទ្ធ ៩ សរុប ២៨គ្រឿង ។ ខេត្តស្វាយរៀង ឈរលេខ២ ឈ្នះមេដាយមាស ៧ ប្រាក់ ៥ និងសំរឹទ្ធ ១ សរុប ១៣គ្រឿង ។ ខេត្តកំពត ឈរលេខ៣ ឈ្នះមេដាយមាស ៤ និងប្រាក់ ៣ សរុប ៧គ្រឿង។ រាជធានីភ្នំពេញ ឈរលេខ៤ ឈ្នះមេដាយមាស ៣ ប្រាក់ ៩ និងសំរឹទ្ធ ១០ សរុប ២២គ្រឿង។
ខេត្តកំពង់ស្ពឺ ឈរលេខ៥ ឈ្នះមេដាយមាស ៣ ប្រាក់ ៤ និងសំរឹទ្ធ ៣ សរុប ១០គ្រឿង និងខេត្តព្រៃវែង ឈរលេខ៦ ឈ្នះមេដាយមាស ៣ ប្រាក់ ១ និងសំរឹទ្ធ ៣ សរុប ៧គ្រឿង ៕
ចែករំលែកព័តមាននេះ