ខេត្តព្រះសីហនុ ៖ មន្ត្រីជាន់ខ្ពស់ស្នងការនគរបាលខេត្តព្រះសីហនុ លោកឧត្តមសេនីយ៍ត្រី ណុប បញ្ញា ស្នងការរងទទួលបន្ទុកនគរបាលទេសចរណ៍ និងចរាចរណ៍ផ្លូវទឹក នៃស្នងការដ្ឋាននគរបាលខេត្តព្រះសីហនុ នារសៀលថ្ងៃទី២៣ ឧសភា ២០១៧នេះ បានអំពាវនាវដល់សេវាករទូកទេសចរណ៍ និងក្រុមអ្នកនេសាទ មេត្តាបង្កើនការប្រុងប្រយ័ត្ន ក្នុងការធ្វើដំណើរលើផ្ទៃសមុទ្រ នាដើមរដូវវស្សានេះ ក៏ដូចជាការជូនដំណឹងរបស់ក្រសួងធនធានទឹក។
ថ្លែងប្រាប់បណ្តាញសារព័ត៌មាននារសៀលថ្ងៃទី២៣ ឧសភានេះលោក ឧត្តមសេនីយ៍ត្រី ណុប បញ្ញា បានគូសបញ្ជាក់ថា ដោយមានបទបញ្ជាពីឯកឧត្តមឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ក៏ជាការជូនដំណឹងរបស់ក្រសួងធនធានទឹក មន្ត្រីជំនាញនៃការិយាល័យទេសចរណ៍ និងចរាចរណ៍ផ្លូវទឹក ក្រោមការដឹកនាំដោយរូបលោកឧត្តមសេនីយ៍ផ្ទាល់ បានចុះណែនាំអប់រំ ផ្សព្វផ្សាយ រួមជាមួយការអំពាវនាវម្តងហើយម្តងទៀត ដោយបានស្នើឲ្យម្ចាស់សេវាករទូកទេសចរណ៍ និង ក្រុមអ្នកនេសាទ មេត្តាបង្កើនការប្រុងប្រយ័ត្ន ក្នុងរយៈពេលចាប់ពីថ្ងៃទី២៤ដល់ថ្ងៃទី២៧ ឧសភានេះ តាមសេចក្តីជូនដំណឹងរបស់ក្រសួងធនធានទឹក ដែលបានប្រកាសថា ដោយឡែកនៅតាមតំបន់មាត់សមុទ្រ មានភ្លៀងខ្យល់មានរលកធំៗ ចាប់ពីថ្ងៃទី២៤ដល់ថ្ងៃទី២៧ ឧសភានេះ ដែលអាចបង្ករឲ្យមានគ្រោះថ្នាក់ជាយថាហេតុ។
ភ្ញៀវទេសចរណ៍មួយក្រុមមកពីខេត្តកំពង់ចាមដែលមានបំណង ទៅកម្សាន្តតាមកោះ បានផ្អាកដំណើរកម្សាន្តលើផ្ទៃសមុទ្រ ដោយបង្វែរមកកម្សាន្តតាមឆ្នេរមួយចំនួនដែលរដ្ឋបាលខេត្តទើបធ្វើការកែលម្អវិញ ដោយពួកគាត់បានបង្ហាញទស្សនៈថា ក្រោយពីមានការជូនដំណឹងរបស់ក្រសួងធនធានទឹក ក៏ដូចជាការអំពាវនាវរបស់មន្ត្រីនគរបាលខេត្ត ក្រុមរបស់លោកបានផ្អាកដំណើរកម្សាន្តតាមកោះវិញ ព្រោះខ្លាចជួបគ្រោះអាសន្នជាយថាហេតុនៅលើផ្ទៃសមុទ្រ។ ក្នុងនាមជាពលរដ្ឋខ្មែរ និងក្នុងនាមជាភ្ញៀវទេសចរណ៍ សូមថ្លែងអំណរគុណយ៉ាងជ្រាលជ្រៅ ដល់សមត្ថកិច្ចពាក់ព័ន្ធទាំងអស់ ជាពិសេសមន្ត្រីនគរបាលទេសចរណ៍ និងមន្ត្រីនគរបាលចរាចរណ៍ផ្លូវទឹក ដែលបានប្រចាំការ ណែនាំត្រួតពិនិត្យ និងការពារនូវសុវត្ថិភាពជូនភ្ញៀវទេសចរណ៍ដែលបានមកកម្សាន្តនៅខេត្តព្រះសីហនុ៕
ចែករំលែកព័តមាននេះ