រាជធានីភ្នំពេញ ៖ តារាកំប្លែងពន្លកថ្មីដែលកំពុងតែល្បីលើវិថីសិល្បៈ ពូណុយ ដែលពុកម៉ែបងប្អូនធ្លាប់បានស្គាល់តារាកំប្លែងរូបនេះតាមរយៈកាយវិការ ពាក្យសម្តីកំប្លុកកំប្លែង បង្កើតនូវទស្សនីយភាពប្លែកៗបម្រើទស្សនិកជននោះ បានលាតត្រដាងរឿងរ៉ាវជីវិតដែលធ្លាប់រុំព័ទ្ធទៅដោយបំណុលយ៉ាងសន្ធឹកនោះ កាលពីពេលថ្មីនេះ តារាកំប្លែងពូណុយ ដែលជាតារាកំប្លែងមានទេពកោសល្យខ្ពស់ ដោយលោកអាចសម្តែងបានសឹងតែគ្រប់ទម្រង់ទាំងអស់ មិនថាតួអង្គឪពុក តួអង្គជាម្តាយ តួអង្គអ្នកស្រឡាញ់ភេទដូចគ្នា ឬតួអ្វីនោះទេ គឺលោកអាចសម្តែងបានយ៉ាងល្អ។
ថ្មីៗនេះ តារាកំប្លែង ពូពុយ ដែលមានឈ្មោះពិតប្រាកដថា បាន់ សំណាង បានផ្តល់បទសម្ភាសន៍ជាមួយសារព័ត៌មានកោះសន្តិភាព អំពីជីវិតរបស់លោកមុនចូលសិល្បៈ និងក្រោយពេលចូលសិល្បៈ ជាពិសេសគឺរឿងកន្លងមកដែលលោកធ្លាប់ជំពាក់បំណុលគេតែម្តង តែយ៉ាងណាមិញ ដោយសារតែភាពជោគជ័យលើវិថីសិល្បៈ តារាកំប្លែងរូបនេះអាចដោះស្រាយបំណុលដែលជំពាក់គេត្រឹមមួយប៉ប្រិចភ្នែកប៉ុណ្ណោះ។
ជាការពិតណាស់ តារាកំប្លែង ពូពុយ បានឱ្យដឹងថា កាលពីលោកមិនទាន់បានចូលប្រឡូកក្នុងសិល្បៈ គឺលោកមានអាជីពតួនាទីជា CEO មួយរូប ដោយលោកបានបម្រើការងារនៅក្នុងស្ថាប័នមីក្រូហិរញ្ញវត្ថុមួយកន្លែង។ ខណៈពេលធ្វើការក្នុងតំណែងជា CEO លោក បាន់ សំណាង បែរជាមានបំណុលវ័ណ្ឌ.ក ក៏ព្រោះតែលោកបានចាយវាយលុយកាក់ខុសខ្ទង់ ដោយបានយកលុយរបស់គេមកចាយជាបន្តបន្ទាប់ ហើយចំនួនលុយនោះចេះតែច្រើនឡើងៗ ដូច្នេះទើបលោកពុំអាចគ្រប់គ្រងស្ថានការណ៍ ធ្វើឱ្យជំពាក់បំណុលគេរហូតដល់ជាង១ម៉ឺនដុល្លារអាមេរិក។ ក្រោយមករឿងជំពាក់លុយគេនោះ មិនឈប់ត្រឹមលុយ១ម៉ឺនដុល្លារនោះទេ ត្រង់នេះគឺមានន័យថា បំណុលចេះតែកើនឡើងរហូតដល់ ៣០ ០០០ដុល្លារ ដោយសារមូលហេតុការប្រាក់កើនមួយជាពីរ ឬជាបី។
តារាកំប្លែងមាឌរាងធំ សម្បុរស្រអែមស្រស់ ពូណុយ បានឱ្យដឹងបន្តថា នៅពេលលោកជំពាក់គេរហូតដល់ចំនួនដែលលោកមិនអាចសងបំណុលគេអស់នោះ លោកក៏បានគេចវេសផងដែរ ដោយសារលោកមិនមានលទ្ធភាពក្នុងការសង ហើយខ្លួនលោកផ្ទាល់ក៏ដឹងដែរថា ការគេចវេសមិនមែនជាដំណោះស្រាយដ៏ល្អនោះទេ ហើយពេលខ្លះលោកចង់គិតខ្លីជាច្រើនលើកច្រើនសារផងដែរ។ អំឡុងពេលគេចវេសនោះ ជំងឺកូវីដក៏បានផ្ទុះឡើង ហើយពេលនោះរូបលោកមិនមានការងារអ្វីធ្វើនោះទេ ហើយក៏ត្រូវឈប់មួយរយៈសិន ពេលដែលជំពាក់គេលោកមិនហ៊ានចេញក្រៅនោះទេ ដោយខ្លាចម្ចាស់បំណុលតាមទារ។ ប្រាកដណាស់ សំណាងមនុស្សមើលមិនឃើញនោះទេ ឬអាចនិយាយបានថា ជីវិតធ្លាក់ដល់ចំណុចសូន្យ បែរជាជួបប្រទះនឹងលាភទៅវិញ។
តារាកំប្លែង ណុយ បានបន្តទៀតថា អំឡុងពេលលោកលាក់ខ្លួន ដោយសារមិនទាន់មានលុយសងម្ចាស់បំណុលនោះ គឺនៅសុខៗ លោក (ពូណុយ) បានយកទូរស័ព្ទមីងរបស់លោកមកលេង Tik Tok ដោយសម្តែងលេងៗសោះ តែបែរជាការសម្តែងរបស់លោកគឺទទួលបានការចាប់អារម្មណ៍យ៉ាងខ្លាំង ហើយគ្រាន់តែប៉ុន្មានវីដេអូសោះ អាចធ្វើអោយគេស្គាល់លោកកាន់តែច្រើន។
តារាកំប្លែង ពូណុយ បន្តទៀតថា នៅពេលដែលលោកបង្ហោះវីដេអូជាលើកដំបូងរបស់លោក គឺមានមិត្តភក្តិ អ្នកជិតខាង បាននិយាយថា លោកជំពាក់គេច្រើនពេក បែរជាបែកគំនិតទៅសម្តែងរបៀបឆ្កួតៗ បីកូនតូចដូចមនុស្សមានសតិមិនល្អជាដើម។ អាចនិយាយបានថា ពេលនោះអ្នកដែលស្គាល់លោករិះគន់លោកយ៉ាងចាស់ដៃទាក់ទងជាមួយការសម្តែងរបស់លោក។ ប៉ុន្តែអ្វីដែលមិននឹកស្មានដល់នោះ គឺតាមរយៈការសម្តែងរបស់លោក បែរជាមានគេចាប់អារម្មណ៍ និងចូលចិត្តច្រើន រហូតដល់មានពេលមួយនោះ លោកត្រូវបានខាងស្ថានីយទូរទស្សន៍មួយ ហៅលោកទៅសម្តែងតែម្តង។
អតីត CEO ដែលធ្លាប់ជំពាក់បំណុលគេរាប់ម៉ឺនដុល្លារ បានបន្តទៀតថា នៅពេលដែលលោកឡើងសម្តែង និងត្រូវបានចាក់ផ្សាយលើកញ្ចប់ទូរទស្សន៍ជាលើកដំបូងនោះ ស្រាប់តែម្ចាស់បំណុលបានឃើញ ហើយបានតេទាក់ទងមកលោក ដោយនិយាយថា «ប្រសិនបើលោកមិនសងបំណុលនោះទេ នោះគេនឹងមកតាមលោកដល់ទូរទស្សន៍ហើយ»។ ការគំរា.មរបស់ម្ចាស់បំណុលធ្វើឡើង គឺនៅពេលដែលបងស្រីរបស់លោក និងម្តាយកំពុងតែអំពាវនាវលក់ដី ដើម្បីយកលុយនោះទៅសងម្ចាស់បំណុលក៏ដោយ។ ដោយនៅពេលនោះ លោកក៏បានសុំអង្វរគេគ្រប់បែបយ៉ាង អោយតែគេយល់ព្រមសម្រាប់ការពន្យាពេលការសងបំណុលនោះ។
ស្តាប់ទៅជីវិតពូណុយ ថាកំសត់ ក៏ដូចជាមិនកំសត់ ថារងទុក្ខ ក៏មិនជារងទុក្ខខ្លាំង តែអាចនិយាយបានថា ខ្សែជីវិតបានរុញច្រានរូបលោកពីអាជីពការងារនៅមីក្រូហិរញ្ញវត្ថុ មកក្លាយជាមនុស្សល្បីមួយរូបនៅលើវិថីសិល្បៈទៅវិញ។
ប្រាកដណាស់ នៅពេល ពូណុយ មានឱកាសទទួលបានការការសម្តែងត្រឹមតែមួយ Show ប៉ុណ្ណោះ ស្រាប់តែលោកក៏ទទួលបានការចាប់អារម្មណ៍ ហើយលោកត្រូវបានគេទាក់ទងអោយសម្តែងជាបន្តបន្ទាប់ រហូតដល់លោកអាចដោះស្រាយបំណុលដែលជំពាក់ប្រមាណជា ៣០០០០ដុល្លាអោយអស់ត្រឹមមួយរយៈពេលខ្លី។
ពូណុយ បានបន្តថា ឪពុកម្តាយរបស់លោកពុំបានលក់ដីនោះទេ ហើយរហូតមកដល់ពេលនេះ លោកបានដោះស្រាយបំណុលនោះដោយខ្លួនលោកផ្ទាល់អោយរួចរាល់ផងដែរ។ យ៉ាងណាមិញ ពូណុយ បានផ្តាំផ្ញើទៅមហាជនអ្នកគាំទ្រថា «សូមកុំយកគំរូតាមលោក ពេលមានលុយត្រូវចេះចាយ បែរជាចាយវាយមិនចេញគិត។ សូមបងប្អូនចាយវាយលុយកាក់ឱ្យបានត្រឹមត្រូវ កុំចាំដល់ពេលជំពាក់គេ ទើបគេចវេស ហើយស្តាយក្រោយ»។
ជាចុងក្រោយ ពូណុយ សូមអរគុណជាខ្លាំងសម្រាប់អ្នកគាំទ្រ ដែលបានជួយគាំទ្រលោកតាមរយៈការគាំទ្រនេះ គឺលោកអាចដោះស្រាយបំណុលបានទាំងស្រុង ជាពិសេសលោកអាចមានលទ្ធភាពទិញផ្ទះ ទិញឡាន និងជួបជ្រោមជ្រែងគ្រួសាររបស់លោកអាចល្អប្រសើរឡើងវិញផងដែរ៕
ចែករំលែកព័តមាននេះ