ប្រព័ន្ធភាពស៊ាំ ជាបណ្តាញអន្តរកម្មនៃសរីរាង្គ កោសិកា និងប្រូតេអុីន គឺជាអ្នកការពាររាងកាយយ៉ាងសំខាន់ប្រឆាំងនឹងមេរោគ បាក់តេរី ឬសារធាតុផ្សេងទៀត ។
ដើម្បីធ្វើឱ្យប្រព័ន្ធភាពស៊ាំមានភាពល្អប្រសើរជាងមុន ការបរិភោគអាហារដែលល្អចំពោះសុខភាព និងទទួលដំណេកបានគ្រប់គ្រាន់មានសារសំខាន់ខ្លាំងណាស់ ។ ទោះជាយ៉ាងណាក្តី ក្រៅពីរបបអាហារ និងការគេងមានរឿង តូចៗជាច្រើនដែលអាចជួយពង្រឹងប្រព័ន្ធភាពស៊ាំរបស់អ្នក ។
ខាងក្រោមនេះជាទម្លាប់សាមញ្ញទាំង៥ដែលជួយពង្រឹងប្រព័ន្ធភាពស៊ាំ ៖
១-រក្សាអនាម័យរាងកាយ
ទម្លាប់សាមញ្ញទីមួយដែលជួយថែរក្សាសុខភាពប្រព័ន្ធភាពស៊ាំ គឺការអនុវត្តអនាម័យផ្ទាល់ខ្លួនល្អ ។ អនាម័យល្អនឹងជួយបញ្ចៀសមេរោគឱ្យនៅឆ្ងាយពីអ្នក និងបញ្ឈប់ការឆ្លងមេរោគមុនពេលវាចាប់ផ្តើម ។ ស្របគ្នានេះដែរ អ្នកក៏មិនចម្លងមេរោគដល់អ្នកដទៃផងដែរ ។
២-ពិសាទឹកឱ្យបានច្រើន
ទោះបីជាអ្នកបរិភោគអាហារដែលល្អចំពោះរាងកាយច្រើនប៉ុណ្ណាក៏ដោយ វានឹងមិនអាចជួយរាងកាយរបស់អ្នកបានច្រើននោះទេ ប្រសិនបើអ្នកពិសាទឹកមិនគ្រប់គ្រាន់ ។ អត្ថប្រយោជន៍នៃការទទួលទានទឹក គឺនៅពេលរាងកាយមានជាតិទឹកគ្រប់គ្រាន់ វាមានឥទ្ធិពលវិជ្ជមានលើប្រព័ន្ធភាពស៊ាំរបស់អ្នក ។ ទឹកជួយបណ្តេញជាតិពុលចេញពីរាងកាយ និងធានាថាកោសិកា និងសរីរាង្គរបស់អ្នកទទួលបានអុកស៊ីសែនគ្រប់គ្រាន់ដើម្បីដំណើរការមុខងារវាឱ្យបានត្រឹមត្រូវ។
៣-សើច ខ្លាំងៗ
ខណៈពេលដែលកំហឹង និងទុក្ខព្រួយអាចប៉ះពាល់ដល់សុខភាព តែការសើចមានឥទ្ធិពលផ្ទុយពីនេះ ។ សំណើចអាចពង្រឹងប្រព័ន្ធភាពស៊ាំរបស់អ្នក ដែលជាលទ្ធផលធ្វើឱ្យរាងកាយរបស់អ្នកមានការការពារបានល្អប្រសើរជាងមុនចំពោះជំងឺ ផ្សេងៗ ។
៤-សុទិដ្ឋិនិយម
ការមានសុទិដ្ឋិនិយម និងការរីករាយជាអ្វីដែលយើងទាំងអស់គ្នាគួរប្រាថ្នាដើម្បីទទួលបានសុខភាពល្អ ។ ប្រព័ន្ធភាពស៊ាំក៏ទទួលឥទ្ធិពលជាច្រើនពីការគិត និងអារម្មណ៍របស់យើងផងដែរ ។ សុទិដ្ឋិនិយមអាចជួយពង្រឹងមុខងារកោសិកាប្រព័ន្ធភាពស៊ាំ ។ ស្របគ្នានេះដែរ អ្នកដែលមានបុគ្គលិកលក្ខណៈជាមនុស្សសុទិដ្ឋិនិយមប្រឈមនឹងហានិភ័យនៃការមានជំងឺដាច់សរសៃឈាមខួរក្បាល ឬជំងឺគាំងបេះដូងក្នុងអត្រាមួយដ៏ទាប ។
៥-ដើរប្រចាំថ្ងៃ
ការធ្វើលំហាត់ប្រាណជាវិធីដ៏សំខាន់ដើម្បីពង្រឹងប្រព័ន្ធភាពស៊ាំ ។ ប្រសិនបើអ្នកមិនមានពេលវេលាសម្រាប់ការធ្វើលំហាត់ប្រាណ ការដើរប្រចាំថ្ងៃរយៈពេល៣០នាទី គឺជាអ្វីដែលរាងកាយរបស់អ្នកត្រូវការដើម្បីដំណើរការបានត្រឹមត្រូវ ។ ការដើរមានលក្ខណៈសមរម្យសម្រាប់មនុស្សគ្រប់វ័យ និងគ្រប់កម្រិតសម្បទា ៕
ចែករំលែកព័តមាននេះ