ប្រដៅលែងបាន…មានតែលេងធម៌ក្តៅទើបរាង
រាជធានីភ្នំពេញ ៖ ដោយមើលឃើញអំពីការបើកបរលើសល្បឿនកំណត់នៅតែជាបញ្ហាបង្កគ្រោះថ្នាក់ចរាចរណ៍ខ្ពស់នៅឡើយគណៈកម្មាធិការជាតិសុវត្ថិភាពចរាចរណ៍ផ្លូវគោកបានប្រកាសរឹតបន្ដឹង
រាជធានីភ្នំពេញ ៖ ដោយមើលឃើញអំពីការបើកបរលើសល្បឿនកំណត់នៅតែជាបញ្ហាបង្កគ្រោះថ្នាក់ចរាចរណ៍ខ្ពស់នៅឡើយគណៈកម្មាធិការជាតិសុវត្ថិភាពចរាចរណ៍ផ្លូវគោកបានប្រកាសរឹតបន្ដឹង និងវិធានការថ្មីក្នុងការត្រួតពិនិត្យល្បឿនអ្នកបើករបរតាមរយៈកាមេរ៉ាចាប់ល្បឿនតាមដងផ្លូវនៅទូទាំងប្រទេសដើម្បីកាត់បន្ថយគ្រោះថ្នាក់ចរាចរ ។
ថ្លែងក្នុងកិច្ចប្រជុំបូកសរុបលទ្ធផលត្រួតពិនិត្យអនុវត្ដន៍ច្បាប់ស្ដីពីចរាចរណ៍ផ្លូវគោកប្រចាំខែមេសា ឆ្នាំ២០១៧ កាលពីពេលថ្មីនេះៗនាទីស្ដីការក្រសួងសាធារណការលោក តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូនបានមានប្រសាសន៍ថា គណៈកម្មាធិការជាតិកំពុងតែដាក់ចេញនូវវិធានការថ្មីក្នុងការទិញកាមេរ៉ាចាប់ល្បឿនអ្នកបើកបរដោយសម្ងាត់ឱ្យបានច្រើនគ្រឿងបន្ថែមទៀតដើម្បីបំពាក់នៅតាមគោលដៅត្រួតពិនិត្យក្នុងរាជធានី-ខេត្ដទូទាំងប្រទេស ។
លោកបានបញ្ជាក់ថា «គ្រោះថ្នាក់ចរាចរដែលបង្កឡើងដោយបើករបរលើសល្បឿនកំណត់បានកើតឡើងដដែលៗដែលទាមទារការចូលរួមទាំងអស់គ្នាទាំងសមត្ថកិច្ច និងប្រជាពលរដ្ឋក្នុងការគោរពច្បាប់ការរឹតបន្ដឹងការអនុវត្ដច្បាប់ដើម្បីទទួលបាននូវសុវត្ថិភាព និងកាត់បន្ថយគ្រោះថ្នាក់ចរាចរ» ។
លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ គណៈកម្មាធិការជាតិសុវត្ថិភាពចរាចរណ៍ផ្លូវគោកបានឱ្យដឹងថា វិធានការថ្មីក្នុងការត្រួតពិនិត្យល្បឿនដោយសម្ងាត់បានដំណើរការយ៉ាងសកម្មដោយរកឃើញរថយន្ដបើកបរល្មើសល្បឿនចំនួន២.៣០៥គ្រឿង ក្នុងខែមេសា កន្លងមកនេះ និងកំពុងចាត់ការកោះហៅម្ចាស់រថយន្ដមកបង់ប្រាក់ពិន័យ ។
លោកជំទាវបានបន្ថែមថា ក្នុងខែមេសា ឆ្នាំ២០១៧នេះផងដែរក្រសួងសាធារណការ និងដឹកជញ្ជូនបានចុះ បញ្ជីយានយន្ដសរុបចំនួន៣១.១៧៤គ្រឿង ក្នុងនោះរថយន្ដ៤.៩៥៦គ្រឿង ម៉ូតូ២៦.២១៨ គ្រឿង ផ្ដល់ប័ណ្ណបើកបរសរុប៤៥៩.៩៧៧ប័ណ្ណ ត្រួតពិនិត្យលក្ខណៈបច្ចេកទេសយានយន្ដបានចំនួន១២.៤១២គ្រឿង និងផ្ដល់ប័ណ្ណអាជីវកម្ម២.២៩៥គ្រឿង ។
ចំណែកឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិបានលើកឡើងថា ក្នុងខែមេសាកន្លងមក នេះគ្រោះថ្នាក់ចរចរដោយសារការបើកបរលើសល្បឿនកំណត់មានការកើនឡើងគួរឱ្យកត់សម្គាល់បើប្រៀបធៀបជាមួយបណ្ដាខែផ្សេងៗក្នុងឆ្នាំ២០១៧នេះ ។
លោកបានអះអាងថា បច្ចុប្បន្ននេះអគ្គស្នងការនគរបាលជាតិមានកាមេរ៉ាចាប់ល្បឿន ប្រមាណជាង១០០គ្រឿងរួចហើយសម្រាប់ប្រើប្រាស់ចាប់យានយន្ដបើកបរលើសល្បឿនកំណត់ដែលនៅឆ្នាំ២០១៨ ខាងមុខនឹងទិញបន្ថែមកាមេរ៉ាជាង១០០គ្រឿងទៀតដើម្បីដាក់បំពាក់តាមផ្លូវជាតិមានចំនួនជាង៨០គោលដៅ ៕
ចែករំលែកព័តមាននេះ