រាជធានីភ្នំពេញ ៖ លោកនួន ឆៃឡូត ជាមន្ត្រីបម្រើការងារនៅសាកលវិទ្យាល័យភូមិន្ទវិចិត្រសិល្បៈនៃមហាវិទ្យាល័យសិល្បៈនាដសាស្ត្រ និងជាអតីតសិស្សផ្នែកល្ខោនខោល បានខិតខំស្វែងរកជំនួយដើម្បីបំពេញបំណងប្រាថ្នារបស់សិល្បករចាប៉ីដងវែងពិការភ្នែកអាយុ៧២ឆ្នាំម្នាក់ គឺលោកតាងាំ ង៉ូ ។ លោកតារស់នៅភូមិថ្មកែវ ឃុំត្រប់ ស្រុកបាធាយ ខេត្តកំពង់ចាម។ គាត់មានជីវភាពមិនប្រសើរឡើយ តែមានក្តីប្រាថ្នាមួយគឺចងផ្ទេរជំនាញច្រៀងចាប៉ីដងវែងទៅដល់អ្នកជំនាន់ដើម្បីបន្តវេនកុំឱ្យបាត់បង់ ។
លោកនួន ឆៃឡូត កាលពីពេលថ្មីៗកន្លងមកនិយាយថា «ដោយសម្លឹងឃើញហេតុផល និងបំណងដ៏មានតម្លៃមួយនេះខ្ញុំក៏អញ្ជើញលោកតាងាំ ង៉ូ ដើម្បីជាសកម្មភាពមួយដល់សង្គម ព្រោះថាពេលនេះចាប៉ីដងវែងបានក្លាយទៅជាសម្បត្តិបេតិកភណ្ឌពិភពលោក ។ យើងពិតជាចង់ឱ្យមានអ្នកបន្តវេនជាមួយទម្រង់សិល្បៈមួយនេះឱ្យកាន់តែទូលំទូលាយឱ្យសក្តិសមជាមួយកេរ្តិ៍ឈ្មោះ ហើយពេលនេះយើងត្រូវការជំនួយពីមហាជនទាំងអស់ជាឧបករណ៍ចាប៉ីដងវែងទៅដល់ ក្មេងៗដែលមានចំនួន២០នាក់ នៅក្នុងសហគមន៍ក្នុងការហាត់រៀនក៏ដូចជាថវិកា និងគ្រឿងបរិភោគមួយចំនួនសម្រាប់ជួយជីវភាពរបស់លោកតា ។ សង្ឃឹមថា ប្រជាជនខ្មែរនឹងចូលរួមជាមួយមូលនិធិមួយនេះ ដើម្បីខ្មែរកសាងខ្មែរ ។ ដូចនេះសូមបងប្អូនទាំងអស់មេត្តាជូយដោះស្រាយខ្លះជូនដល់សហគមន៍ខាង លើផង ដើម្បីសម្រេចបំណងលោកតាសិល្បករចាប៉ីដងវែងពិការភ្នែកបានស្ងប់ចិត្ត និងដើម្បីរក្សាស្នាដៃចាបុីខ្មែរយើងផងដែរ» ៕
ចែករំលែកព័តមាននេះ