ខេត្តកំពង់ចាម ៖ នៅក្នុងសង្គមសិល្បៈ តែងតែមានការសម្តែងគ្រប់រូបភាព ដូចជាកាយវិការប៉ះដៃ ប៉ះជើង អោបរិតអាចនិងផុយស្រួយដល់តារាដែលមានគូស្នេហ៍បណ្តូលចិត្តប្រចណ្ឌផងដែរ ។ ផ្ទុយទៅវិញ ភរិយារបស់លោកឆាយ វីរៈយុទ្ធ ដែលទើបតែចូលរោងការថ្មីៗ បានតាំងជំហរថា រូបភាពប្រចណ្ឌស្វាមី ជាមួយអ្នកសិល្បៈដូចគ្នា គឺមិនអាចកើតមានឡើយ ។ ការសំខាន់ គឺស្ថិតនៅលើចិត្តគំនិតរបស់បុគ្គលតែប៉ុណ្ណោះ ។ ម្ល៉ោះហើយ ទើបគេមើលឃើញថា ឆាយ វីរៈយុទ្ធ ពិតជាមានសំណាងណាស់ ដែលមានប្រពន្ធកាន់ចិត្តធ្ងន់បាន ។
តារាចម្រៀងល្បីល្បាញពេញប្រទេស លោកឆាយ វីរៈយុទ្ធ បានសម្រេចចិត្តចូលរោងការ ជាផ្លូវការពេញមុខ កាលពីថ្ងៃទី២១ ឧសភា នាស្រុកជើងព្រៃ ខេត្តកំពង់ចាម (ក្បែរវិទ្យាល័យស្គន់) ។ ដោយមានការអញ្ជើញចូលរួមពីសំណាក់ភ្ញៀវកិត្តិយសជាច្រើនកុះករផងដែរ ។ គ្រានោះ គេឃើញមានវត្តមានដ៏ខ្ពង់ខ្ពស់លោកហ៊ុន ម៉ាណែត ចូលរួមផងដែរ ដែលបានញ៉ាំងឱ្យពិធីនេះ កាន់តែអធិកអធមទ្វេឡើង ពិសេស លោកឆាយ វីរៈយុទ្ធ រីកមុខមាត់មិនស្ទើរឡើយ ។
កូនក្រមុំជាម្ចាស់ចិត្តលោកឆាយ វីរៈយុទ្ធ មានឈ្មោះសែ ចាន់ឌី ជាអ្នករកស៊ី និងមានសមត្ថភាពតែងនិពន្ធបទចម្រៀងយ៉ាងចំណានដោយបទចម្រៀងទាំងនោះ អ្នកនាងបានតែងឱ្យស្វាមីឆាយ វីរៈយុទ្ធ ច្រៀងបានប្រមាណ១០បទ មកហើយដែរ ។ ដោយនេះ ជាសំណាងរបស់ឆាយ វីរៈយុទ្ធ រកប្រពន្ឋបានទាំងតែងចម្រៀងឱ្យច្រៀង មិនខ្វល់រកអ្នកណាឡើយ ។ យ៉ាងណាមិញ មុននឹងចូលរោងការសំពះផ្ទឹមលោកឆាយ វីរៈយុទ្ធ បានចំណាយពេលជាង៧ឆ្នាំ ដើម្បីស្វែងយល់ចិត្តថ្លើមគ្នាយ៉ាងសកម្មគ្រប់សកម្មភាពទាំងអស់ ដែលលោកឆាយ វីរៈយុទ្ធ បានតស៊ូ ដើម្បីបានម្ចាស់បេះដូងនេះ ក្នុងប្រអប់ដួងចិត្ត ។
បញ្ជាក់ប្រាប់អ្នកយកព័ត៌មានយើង ក្នុងឈុតសំលៀកបំពាក់បុរាណខ្មែរ ចេញមកទទួលភ្ញៀវយ៉ាងស្រស់តាមក្បួនខ្មែរ លោកឆាយ វីរៈយុទ្ធ បានឲ្យដឹងថា លោកបានតស៊ូចិញ្ចឹមចិត្តតាមស្រឡាញ់ និងធ្វើអ្វីគ្រប់យ៉ាងជាមួយភរិយារបស់លោកយ៉ាងច្រើនរូបភាព ក្នុងសញ្ញាផ្សេងៗ ដែលជាចំណុចវិជ្ជមានឲ្យគាត់បានឃើញ និងទទួលស្គាល់ ។ លោកថា ភរិយារបស់លោកស្លូតបូត តែមិនដែលចុះចាញ់ឧបសគ្គ ម៉ឺងម៉ាត់ រួសរាយរាក់ទាក់ ដែលនេះជាចំណុចទាក់ទាញឱ្យលោកមានចិត្តស្រឡាញ់រហូតមក ។
អ្នកនាងសែ ចាន់ឌី ជាភរិយារបស់ឆាយ វីរៈយុទ្ធ ក៏បានឱ្យដឹងដែរថា អ្នកនាងពេញចិត្តស្វាមីលោកឆាយ វីរៈយុទ្ឋនេះ មកពីគិតថាលោកជាមនុស្សមិនសូវនិយាយស្តីច្រើន ប៉ុន្តែដើម្បីខ្ញុំលោកតស៊ូប្រែប្រួល ទៅជានិយាយរួសរាយប្រឹងប្រែងមិនធម្មតា អស់ពេល៧ឆ្នាំទើបអ្នកនាងយល់ថា អាចយកគាត់ជាគូអនាគតបានដោយសម្រេចចិត្តរៀបការតែម្តង។
ចែករំលែកព័តមាននេះ