រាជធានីភ្នំពេញ ៖ ចំណងដៃចិនថ្មីមួយ គឺស្ពានមិត្តភាពកម្ពុជា-ចិន ឆ្លងកាត់ទន្លេមេគង្គដែលតភ្ជាប់ពីស្រុកស្ទឹងត្រង់ ខេត្តកំពង់ចាម និងឆ្ពោះទៅកាន់ស្រុកក្រូចឆ្មារ ខេត្តត្បូងឃ្មុំ បានចាប់ផ្តើមសាងសង់ហើយ ។
រាជធានីភ្នំពេញ ៖ ចំណងដៃចិនថ្មីមួយ គឺស្ពានមិត្តភាពកម្ពុជា-ចិន ឆ្លងកាត់ទន្លេមេគង្គដែលតភ្ជាប់ពីស្រុកស្ទឹងត្រង់ ខេត្តកំពង់ចាម និងឆ្ពោះទៅកាន់ស្រុកក្រូចឆ្មារ ខេត្តត្បូងឃ្មុំ បានចាប់ផ្តើមសាងសង់ហើយ ។
លោក នូ វឌ្ឍនៈ អគ្គនាយកបច្ចេកទេសនៃក្រសួងសាធារណការ និងដឹកជញ្ជូន បានថ្លែងឲ្យដឹងតាមទូរស័ព្ទនាព្រឹកថ្ងៃទី១៩ ឧសភា ថា ការសាងសង់ស្ពាននេះបានចាប់ផ្តើមបណ្តើរៗហើយ ប៉ុន្តែការប្រកាសបើកការដ្ឋានជាផ្លូវការពេលណាមិនទាន់អាចបញ្ជាក់ឲ្យដឹងនៅឡើយទេ។ លោកបន្តថា ស្ពាននេះមានទទឹង១៣,៥០ម៉ែត្រ បណ្តោយ១.១៣១ម៉ែត្រ និងមានផ្លូវតភ្ជាប់តួស្ពានសរុបប្រវែង៣.៨៦៩ម៉ែត្រ ហើយគ្រោងចំណាយថវិកាសាងសង់៥៧លានដុល្លារអាមេរិក ។
លោកបន្តថា ស្ពាននេះដើរតួនាទីសំខាន់ណាស់ក្នុងការតភ្ជាប់រវាងខេត្តកំពង់ចាម និងខេត្តត្បូងឃ្មុំ ដែលជាខេត្តមានសក្តានុពលលើវិស័យសេដ្ឋកិច្ចខ្លាំង ជាពិសេស នឹងជួយសម្រួលដល់ការដឹកជញ្ជូនកសិផល និងការធ្វើចរាចរ។ លោកបន្តថា ៖ « ស្ពាននេះក៏រួមចំណែកអភិវឌ្ឍន៍សេដ្ឋកិច្ច និងសង្គមផងដែរ ព្រោះនៅពេលមានផ្លូវ ស្ពានខ្វាត់ខ្វែង វានឹងជួយសម្រួលការដឹកជញ្ជូន និងធ្វើដំណើរ ព្រមទាំងកាត់បន្ថយការចំណាយរបស់ប្រជាពលរដ្ឋ » ។
បច្ចុប្បន្ន ការធ្វើដំណើរឆ្លងកាត់ទន្លេនៅតំបន់នេះ គឺប្រើប្រាស់សាឡាង ដែលបានយកចេញពីតំបន់អ្នកលឿង ខេត្តព្រៃវែង ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា ការអភិវឌ្ឍហេដ្ឋារចនាសម្ព័ន្ធរបស់រាជរដ្ឋាភិបាល គឺជារឿងចាំបាច់ណាស់ដើម្បីជំរុញកំណើនសេដ្ឋកិច្ចជាតិ ព្រោះប្រសិនជាចង់ឲ្យសេដ្ឋកិច្ចរបស់យើងមានកំណើនរយៈពេលវែង ត្រូវតែអភិវឌ្ឍន៍ហេដ្ឋារចនាសម្ព័ន្ធ ដែលវាជាបញ្ហាប្រឈមធំមួយក្នុងការអភិវឌ្ឍសេដ្ឋកិច្ច ប្រសិនជាហេដ្ឋារចនាសម្ព័ន្ធយើងមានបញ្ហា ។ លោកបន្តថា សេដ្ឋកិច្ចកម្ពុជាកំពុងមានកំណើន ប៉ុន្តែដើម្បីរក្សាបានកំណើនរយៈពេលវែង និងលោតភ្លោះទៅមួយគន្លាក់ទៀត ការកសាងហេដ្ឋារចនាសម្ព័ន្ធជារឿងចាំបាច់បំផុត ។
របាយការណ៍របស់ធនាគារពិភពលោក ដែលពិនិត្យលើវឌ្ឍនភាពសេដ្ឋកិច្ចកម្ពុជា និងចេញផ្សាយកាលពីដើមសប្តាហ៍នេះ ក៏បានផ្តល់អនុសាសន៍ជាច្រើនដើម្បីសម្រេចកំណើនសេដ្ឋកិច្ចរយៈពេលវែង ក្នុងនោះការវិនិយោគលើហេដ្ឋារចនាសម្ព័ន្ធមានគុណភាព ជាផ្នែកមួយដែលកម្ពុជាត្រូវដោះស្រាយបន្ទាន់ផងដែរ ៕
ចែករំលែកព័តមាននេះ