រាជធានីភ្នំពេញ៖ លោកបណ្ឌិត យ៉ង សាំងកុមារ អតីតថ្នាក់ដឹកនាំគណបក្សប្រជាធិបតេយ្យមូលដ្ឋាន ត្រូវបានព្រះករុណា ព្រះមហាក្សត្រ បានចេញព្រះរាជក្រឹត្យ ត្រាស់បង្គាប់តែងតាំងជា «រដ្ឋមន្ត្រីប្រតិភូអមនាយករដ្ឋមន្ត្រី» និងជា «រដ្ឋលេខាធិការក្រសួងកសិកម្ម រុក្ខាប្រមាណ និងនេសាទ»។ នេះបើយោងតាមព្រះរាជក្រឹត្យចុះថ្ងៃទី ២៩ ខែវិច្ឆិកា ឆ្នាំ២០២២នេះ។
ជាមួយគ្នានោះផងដែរ ព្រះមហាក្សត្រ ចេញព្រះរាជក្រឹត្យដាច់ដោយឡែកមួយទៀត ត្រាស់បង្គាប់តែងតាំង ឯកឧត្តម ឡឹក សុធារ តែងតាំងជាអនុរដ្ឋលេខាធិការក្រសួងកសិកម្មរុក្ខាប្រមាញ់និងនេសាទ។
សូមបញ្ជាក់ថាលោកបណ្ឌិត យ៉ង សាំងកុមារ មុនត្រូវបានតែងតាំងនូវមុខតំណែងនៅក្រសួងកសិកម្ម រុក្ខាប្រមាញ់ និងនេសាទ គឺលោកបានសរសេរលិខិតគោរពជូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីស្នើសុំចូលរួមជាមួយរាជរដ្ឋាភិបាល ក្នុងការអភិវឌ្ឍវិស័យកសិកម្ម ជាពិសេសវិស័យស្រូវអង្ករ។ ហើយក្នុងនោះក៏មានលោក ឡឹក សុធារ បានសរសេរលិខិតស្នើសុំចុះចូលជាមួយគណបក្សប្រជាជនកម្ពុជា និងស្នើសុំបម្រើការងារជាមួយរាជរដ្ឋាភិបាល ដើម្បីមានឱកាសចូលរួមអភិវឌ្ឍវិស័យកសិកម្មនៅកម្ពុជាផងដែរ។
ក្រោយពីសុំចូលគណបក្សប្រជាជនកម្ពុជា នៅព្រឹកថ្ងៃទី២៨ ខែ វិច្ឆិកាម្សិលមិញនេះ សម្តេចតេជោ ហ៊ុន សែន បានអនុញ្ញាតឱ្យលោក យ៉ង សាំងកុមារ និងលោក ឡឹក សុធារ ព្រមទាំងឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជួបពិភាក្សាការងារអស់រយៈពេល ប្រមាណ២ម៉ោង។
ក្រោយជំនួបជាមួយសម្តេចតេជោ លោកបណ្ឌិត យ៉ង សាំងកុមារ បានបង្ហាញចំណាប់អារម្មណ៍របស់លោកថា រូបលោក និងសម្តេចតេជោ មានទស្សនវិស័យដូចគ្នា ទាក់ទងនឹងវិស័យកសិកម្ម ដែលអាចធ្វើការជាមួយគ្នាបាន។លោកបណ្ឌិត យ៉ង សាំងកុមារ ដែលរៀនចប់បណ្ឌិតខាងកសិកម្ម ពីអាល្លឺម៉ង់ កាលពីឆ្នាំ១៩៩៥ បានលើកបង្ហាញផែនការស្រោចស្រង់វិស័យស្រូវអង្ករនៅកម្ពុជា ចំនួន១២ចំណុច ដោយត្រូវការពេលវេលាយ៉ាងហោចណាស់ ៥ឆ្នាំ ដើម្បីសម្រេចផែនការ ដែលអាចជួយដល់កសិករកម្ពុជាជាង ១លានគ្រួសារ។
សូមរម្លឹកផងដែរថា លោក យ៉ង់ សាំងកុមារ ជាអតីតប្រធានអង្គការកសិកម្ម សេដាក និងជាប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន ដែលមានលោក យ៉េង វីរៈ ជាប្រធាន។ កើតនៅថ្ងៃទី១៨ ខែកក្កដា ឆ្នាំ១៩៦៦ លោកបណ្ឌិត យ៉ង សាំងកុមារ មានស្រុកកំណើតនៅភូមិចមពល ឃុំពពេល ស្រុកត្រាំកក់ ខេត្តតាកែវ។ ឪពុករបស់លោក ជាគ្រូបង្រៀន ម្តាយលោកជាកសិករ។ លោកចេះភាសាអង់គ្លេស អាល្លឺម៉ង់ និងបារាំង។
ទាក់ទងការសិក្សា លោក យ៉ង សាំងកុមារ បានរៀនចប់ថ្នាក់បណ្ឌិតកសិកម្ម នៅសកលវិទ្យាល័យ ឡែបស៊ិក នៃប្រទេសអាល្លឺមង់ នៅឆ្នាំ១៩៩៥ បន្ទាប់ពីចំណាយពេលសិក្សា និងរស់នៅទីនោះ អស់រយៈពេលជិត ១១ឆ្នាំ (១៩៨៤-១៩៩៥)។ចំពោះប្រវត្តិការងារសំខាន់ៗរបស់លោក យ៉ង សាំងកុមារ គឺលោកជាសាស្ត្រាចារ្យនៃសកលវិទ្យាល័យភូមិន្ទកសិកម្ម (ចំការដូង) ពីឆ្នាំ១៩៩៥-២០០៣។ នៅឆ្នាំ១៩៩៥ ដល់ឆ្នាំ១៩៩៧ លោកបានបម្រើការងារនៅអង្គការក្រៅរដ្ឋាភិបាលជប៉ុន (JVC) និងបារាំង (GRET)។លោក យ៉ង សាំងកុមារ ជាស្ថាបនិក និងនាយក/ប្រធានអង្គការសេដាក (CEDAC) ពីឆ្នាំ១៩៩៧-២០១៥។ លោកជាអភិបាលនៃស្ថាប័នមីក្រូហិរញ្ញវត្ថុស្ថាបនា ពីឆ្នាំ២០១០-២០១៦។ លោកក៏ជាស្ថាបនិកម៉ាស៊ីនកិនស្រូវសរីរាង្គកសិករ សេដាក និងសហគមន៍ទីផ្សារកសិផលធម្មជាតិ ក្រុមហ៊ុននាំចេញកសិផលសរីរាង្គ។នៅឆ្នាំ២០១៥ លោក យ៉ង សាំងកុមារ បានលាឈប់ពីប្រធានអង្គការកសិកម្ម សេដាក ហើយទៅចូលរួមបង្កើតគណណបក្សប្រជាធិបតេយ្យមូលដ្ឋាន (គបម) ជាមួយលោក យ៉េង វីរៈ រួមទាំងអតីតប្រធានអង្គការក្រៅរដ្ឋាភិបាលជាច្រើនទៀត។
លោក យ៉ង សាំងកុមារ បានរៀបអាពាហ៍ពិពាហ៍ នៅឆ្នាំ២០០៦ ហើយមានកូន ៣នាក់ (ស្រី២នាក់ និងប្រុស ១នាក់)។ លោក យ៉ង សាំងកុមារ ជាមិត្តភក្តិជិតស្និទ្ធនឹងលោកបណ្ឌិត កែម ឡី ដែលត្រូវបានឃាតកបាញ់សម្លា.ប់ កាលពីថ្ងៃទី១០ ខែកក្កដា ឆ្នាំ២០១៦៕
ចែករំលែកព័តមាននេះ