រាជធានីភ្នំពេញ ៖ បុរសម្នាក់ចេញពីផឹកស៊ីវិញស្រវឹងទោរទន់ បានបើករថយន្តបញ្ច្រាស់ទិសដៅចរាចរណ៍ជ្រុលទៅបុក នឹងម៉ូតូមួយគ្រឿង ដែលកំពុងតែជិះបញ្ច្រាសទិសគ្នា បណ្តាលឲ្យអ្នកបើកម៉ូតូរងរបួស ភ្លាមៗនោះអ្នកបើកបរមិនបានឈប់រថយន្តដោះស្រាយនោះទេ គឺបានបើករថយន្តគេចខ្លួនទាំងស្ថានភាពស្រវឹង ក៏ជ្រុលទៅបុក នឹងក្បាលនាគពុះចែកផ្លូវបណ្ដាលឲ្យបាក់ និងវៀចអស់ចំនួន៥កង់កល់រថយន្តទៅមុខលែងរួច ហេតុការណ៍នេះកើតឡើងនៅវេលាម៉ោង១១និង៥០នាទីយប់ ថ្ងៃទី២១ ខែឧសភា ឆ្នាំ២០១៧ ជិតនិងស្ថានទូតវៀតណាម ផ្លូវព្រះមុនីវង្ស កែងនិង៤៣២ សង្កាត់ទន្លេបាសាក់ ខណ្ឌចំការមន ហើយឃាត់រថយន្តបាននៅផ្លូវ ២៧១ ជិតស្ថានីយបូមទឹកស្អុយបឹងត្របែក សង្កាត់ចាក់អង្រែលើ ខណ្ឌមានជ័យ ដោយសារតែរថយន្តបុកទ្រូងផ្លូវទៅមុខលែងរួច ។
តាមប្រភពព័ត៌មានពីកន្លែងកើតហេតុបានឲ្យដឹកថា មុនពេលកើតហេតុ គេបានឃើញបុរសម្នាក់ អាយុជាង៤០ឆ្នាំ បានជិះម៉ូតូម៉ាក TODAY ពណ៌ស ពាក់ស្លាកលេខ ភ្នំពេញ ១Z-៨៨៣៥បានធ្វើដំណើរតាមផ្លូវព្រះមុនីវង្សក្នុងទិសដៅ ពីត្បូងទៅជើង ខណៈមកដល់ចំនុចកើតហេតុ ក៏ស្រាប់តែមានបុរស អាយុជាង៣០ឆ្នាំ មិនដឹងថាចេញពីផឹកស៊ីនៅកន្លែងណានោះទេ គឺបានបើករថយន្តបង្កម៉ាក TUNTRA ពណ៌ស ពាក់ស្លាកលេខ ខេមរភូមិន្ទ០២ ២-៨១៦៨ បានធ្វើដំណើរតាមផ្លូវ ៤៣២ ក្នុងទិសដៅពីលិចទៅកើត ក្នុងល្បឿនយ៉ាងលឿន និងស្រវឹងទោរទន់ផងនោះ ក៏ជ្រុលទៅផ្លូវរបស់គេ ហើយក៏ជ្រុលទៅបុក នឹងម៉ូតូម៉ាក TODAY ដែលកំពុងជិះបញ្ច្រាស់ទិសដៅគ្នា ចំពីមុខពេញទំហឹង បណ្តាលឲ្យអ្នកបើកម៉ូតូខ្ទាតចេញពីម៉ូតូ រងរបួសរលាត់ដៃជើង និងក្បាលបន្តិចបន្តួច ចំណែកម៉ូតូវិញរងការខូចខាតខ្ទេចផ្នែកខាងមុខ ។ ប្រភពដដែលបានបន្តទៀត បន្ទាប់ពីបុកម៉ូតូហើយភ្លាមៗនោះ អ្នកបើកបររថយន្តមិនបានឈប់ដោះស្រាយនៅកន្លែងកើតហេតុនោះទេ គឺបានព្យាយាមបើករត់គេចខ្លួនចុះឡើងៗ ហើយពេលនោះប្រជាពលរដ្ឋដែលឃើញហេតុការណ៍បានជិះម៉ូតូដេញតាមទៅដល់ផ្លូវ ២៧១ សង្កាត់ចាក់អង្រែលើ ខណ្ឌមានជ័យ ស្រាប់តែរថយន្តនោះក៏ជ្រុលទៅ នឹងក្បាលនាគពុះចែកផ្លូវបណ្ដាលឲ្យបែក និងវៀច អស់ចំនួន៥កង់ ធ្វើឲ្យរថយន្តរងការខូចខាតខ្ទេចផ្នែកខាងមុខ កល់រថយន្តទៅមុខលែងរួច តែសំណាងល្អមិនមានគ្រោះដល់អ្នកបើកបររថយន្ត។ នៅពេលនោះឃើញមានតំណាងខាងរថយន្តចេញមុខធ្វើការដោះស្រាយជាមួយ និងខាងម៉ូតូ ដោយបានសងសំណងចំនួន១៥០ដុល្លារទៅឲ្យខាងម៉ូតូដើម្បីបញ្ចប់រឿងមួយវគ្គ ។
ក្រោយពេលកើតហេតុ សមត្ថកិច្ចជំនាញបានមកដល់រួចហើយ បានស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញដើម្បីធ្វើការដោះស្រាយ តែមិនបានឃាត់ខ្លួនអ្នកបើកបររថយន្តបង្កដែលមានជាតិស្រវឹងនោះទេ ៕
ចែករំលែកព័តមាននេះ