និស្សិតឆ្នាំទី៤ម្នាក់ជិះម៉ូតូមកពីស្រុក ត្រូវរថយន្តបុកបណ្តាលឱ្យស្លា.ប់
រាជធានីភ្នំពេញ ៖ យុវនិស្សិតច្បាប់ឆ្នាំទី៤ម្នាក់បានបាត់បង់ជីវិតយ៉ាងអាណោចអាធ័មនៅលើផ្លូវ ខណៈពេលកំពុងតែជិះម៉ូតូមួយគ្រឿងមកពីស្រុកកំណើត
រាជធានីភ្នំពេញ ៖ យុវនិស្សិតច្បាប់ឆ្នាំទី៤ម្នាក់បានបាត់បង់ជីវិតយ៉ាងអាណោចអាធ័មនៅលើផ្លូវ ខណៈពេលកំពុងតែជិះម៉ូតូមួយគ្រឿងមកពីស្រុកកំណើត ដោយមានដឹកអង្ករ ហើយមេឃកំពុងតែមានភ្លៀងធ្លាក់នោះ ក៏ត្រូវបានរថយន្តមិនស្គាល់ម៉ាកមួយគ្រឿងបើកមកកៀររផ្ទប់បណ្តាលឱ្យដួលបោកក្បាលទៅនឹងរបាំងថ្មពុះចែកទ្រូវផ្លូវ រួចបើករត់គេចខ្លួនបាត់ស្រមោល។ ករណីគ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង៣ និង៤៥នាទីល្ងាច ថ្ងៃទី២១ ខែឧសភា ឆ្នាំ២០១៧នេះ នៅមុខផ្ទះលេខ២៣៣ ផ្លូវលេខ២៧១ ក្នុងសង្កាត់ទួលទំពូងទី២ ខណ្ឌចំការមន។
តាមប្រភពព័ត៌មានពីនគរបាលមូលដ្ឋានម្នាក់បានប្រាប់ឱ្យដឹងថា បុរសរងគ្រោះមានឈ្មោះ ផេង សិរីបណ្ឌិត អាយុ២៤ឆ្នាំ និស្សិតច្បាប់ឆ្នាំទី៤ ស្នាក់នៅផ្ទះជួលក្នុងសង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅភូមិថ្កុល ឃុំត្រើយស្លា ស្រុកស្អាង ខេត្តកណ្តាល។ មុនពេលកើតហេតុ យុវសិស្សរងគ្រោះជិះម៉ូតូម៉ាក C125 ពណ៌ខ្មៅ ពាក់ស្លាកលេខ កណ្តាល ១I-១៣១២ មួយគ្រឿងតែម្នាក់ឯង ដោយមានដឹកអង្ករមួយកំណាត់បាវពីក្រោយផងដែរ ក្នុងគោលបំណងសំដៅទៅកាន់ផ្ទះជួលរបស់ខ្លួននៅឯស្ទឹងមានជ័យនោះ។ តាមប្រភពដដែលបានប្រាប់បន្តទៀតថា លុះមកដល់ចំណុចកើតហេតុខាងលើ ក៏ស្រាប់តែមានរថយន្តមិនស្គាល់ម៉ាកមួយគ្រឿងបើកមកពីក្រោយ និងកៀរបណ្តាលឱ្យដួល និងបោកក្បាលទៅលើរនាំងពុះចែកទ្រូងផ្លូវបណ្តាលឱ្យស្លាប់ទាំងមេឃកំពុងមានភ្លៀងធ្លាក់ ហើយអូសបាវអង្ករកំពប់ពេញផ្លូវផងដែរ រួចបើករត់គេចខ្លួនបាត់ស្រមោល។
ក្រោយពេលកើតហេតុ កម្លាំងមានសមត្ថកិច្ចមូលដ្ឋាន និងចរាចរណ៍ខណ្ឌចំការមនក៏បានចុះមកដល់ធ្វើការវាស់វែងនៅកន្លែងកើតហេតុ និងកំពុងតែធ្វើការស្រាវជ្រាវតាមរយៈកាមេរ៉ាសុវត្ថិភាពរករថយន្តបង្ក ដើម្បីយកមកធ្វើការផ្តន្ទាទោសទតាមផ្លូវច្បាប់ ចំណែកឯសាកសពរបស់និស្សិតរងគ្រោះត្រូវបានក្រុមគ្រួសារដឹកយកទៅធ្វើបុណ្យទៅតាមប្រពៃណីនៅឯស្រុកកំណើតផងដែរ៕
ចែករំលែកព័តមាននេះ