រាជធានីភ្នំពេញ ៖ គម្រោងលំនៅឋានសម្រាប់ប្រជាជនមានប្រាក់ចំណូលទាប និងមធ្យមកម្រិតទាប កំពុងតែមានតម្រូវការខ្ពស់នៅលើទីផ្សារ ខណៈលំនៅឋានប្រណីតមានការលក់ថមថយល្បឿនបន្ដិចចាប់ពីចុងឆ្នាំមុន ។
រាជធានីភ្នំពេញ ៖ គម្រោងលំនៅឋានសម្រាប់ប្រជាជនមានប្រាក់ចំណូលទាប និងមធ្យមកម្រិតទាប កំពុងតែមានតម្រូវការខ្ពស់នៅលើទីផ្សារ ខណៈលំនៅឋានប្រណីតមានការលក់ថមថយល្បឿនបន្ដិចចាប់ពីចុងឆ្នាំមុន ។
លោក ង៉ែត ពិសិដ្ឋ ជំនួយការអគ្គនាយកបុរីពិភពថ្មីបានថ្លែងឲ្យដឹងតាមទូរស័ព្ទនាព្រឹកថ្ងៃទី១៩ ឧសភា ថា គម្រោងលំនៅឋានសម្រាប់ប្រជាពលរដ្ឋមានប្រាក់ចំណូលមធ្យមកម្រិតទាប នៅតំបន់កំបូលទទួលបានការលក់ជោគជ័យ ដោយសារលក្ខខណ្ឌនៃការទិញអំណោយផលខ្ពស់ ។ លោកបន្តថា លំនៅឋានមានតម្លៃសមរម្យនេះ ទទួលបានការទិញពីអតិថិជនយ៉ាងលឿន ដោយសារគម្រោងនេះមានផ្សារ សាលារៀន និងលំនៅឋានដែលមានស្តង់ដា ។
លំនៅឋានក្នុងគម្រោងនេះមានទំហំទទឹង៤,១ម៉ែត្រ និងបណ្តោយ១២ម៉ែត្រ ផ្លូវក្នុងគម្រោង៨ម៉ែត្រ ទីធ្លានៅសល់មុខផ្ទះមានប្រវែង៤,៥០ម៉ែត្រ និងលក់ក្នុងតម្លៃចាប់ពី៣៩.៨៨០ដុល្លារអាមេរិកឡើងទៅ ។
លោក ង៉ែត ពិសិដ្ឋ បានបន្តថា ជាមួយនឹងភាពជោគជ័យលើគម្រោងជាបន្តបន្ទាប់ ពេលនេះបុរីគ្រោងនឹងវិនិយោគលើបុរីថ្មីមួយទៀតក្នុងសង្កាត់គោករកា ខណ្ឌព្រែកព្នៅ ផងដែរ ដោយសារគម្រោងទី១បានទទួលជោគជ័យ និងទទួលបានការគាំទ្រពីអតិថិជនច្រើន ។
លោកឧកញ៉ា លី ហួរ អគ្គនាយកក្រុមហ៊ុនលី ហួរ គ្រុប និងជាប្រធានសមាគមអ្នកអភិវឌ្ឍន៍លំនៅឋានកម្ពុជា បានថ្លែងថា ទីផ្សារលំនៅឋានមានការប្រែប្រួល ដោយលំនៅឋានប្រណីតមានតម្លៃខ្ពស់ ជួបការពិបាកលក់បន្តិច ប៉ុន្តែប្រសិនជាគម្រោងស្ថិតនៅចំទីតាំងល្អ ការលក់នៅតែទទួលបានជោគជ័យ ។ ផ្ទុយទៅវិញលំនៅឋានមានតម្លៃទាប កំពុងទទួលបានការចាប់អារម្មណ៍ និងមានតម្រូវការខ្ពស់ ។
ទន្ទឹមនឹងនេះ លោកក៏មានគម្រោងនឹងវិនិយោគលើលំនៅឋានតម្លៃទាបនេះនៅក្រោយពេលបោះឆ្នោតឆ្នាំ២០១៨ខាងមុខនេះផងដែរ ដោយសាងសង់លើផ្ទៃដីជាង១០០ហិកតា ។
លោកបន្តថា ៖ « គម្រោងលំនៅឋានមានតម្លៃទាបនេះស្ថិតនៅតាមបណ្តោយផ្លូវជាតិលេខ៦អា ស្ថិតនៅមិនឆ្ងាយពីទីក្រុងភ្នំពេញ គឺធ្វើដំណើរត្រឹមរយៈពេល១២ទៅ១៥នាទីប៉ុណ្ណោះពីកណ្តាលទីក្រុងភ្នំពេញ »។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក គីម ហ៊ាង បានថ្លែងថា លំនៅឋានមានតម្លៃខ្ពស់ពិតជាមានការពិបាកលក់ ដោយសារអ្នកមានប្រាក់ច្រើន និងអ្នកមានជីវភាពមធ្យម បានទិញផ្ទះរួចហើយ ពួកគេមិនត្រូវការទិញទៀតនោះទេ ។ ផ្ទុយទៅវិញ ទីផ្សារលំនៅឋានធំ គឺនៅក្នុងក្រុមអ្នកមានប្រាក់ចំណូលទាប និងប្រាក់ចំណូលមធ្យមកម្រិតទាប ប៉ុន្តែលោកសង្កេតឃើញថា អ្នកសាងសង់បុរីដែលមានតម្លៃទាបគឺនៅតែលក់ថ្លៃ បើគិតពីទំហំផ្ទះក្នុងគម្រោងរបស់ពួកគេ តម្លៃដី ព្រមទាំងទីតាំងរបស់គម្រោង ។
លោកបន្តថា៖ « ទីផ្សារបុរីសម្រាប់ប្រជាជនមានប្រាក់ចំណូលទាប ពិតជាមានតម្រូវការកាន់តែខ្ពស់ ព្រោះក្រុមមនុស្សក្នុងជីវភាពនេះមានចំនួនច្រើន ធៀបនឹងអ្នកមាន និងអ្នកមានជីវភាពមធ្យម»៕
ចែករំលែកព័តមាននេះ