បើទោះជាប្រឈមមុខនឹងការរិះគន់ដែលអាចកើតមានក្តី តែកញ្ញា កែវ សុបញ្ញា តារាចម្រៀងប្រចាំផលិតកម្មហង្សមាស នៅតែមិនបោះបង់ចោលនូវគំនិតមួយ នោះគឺគម្រោងនៃការយកកូន បើទោះបីជាតារាចម្រៀងរូបនេះ មិនទាន់
រាជធានីភ្នំពេញ ៖ បើទោះជាប្រឈមមុខនឹងការរិះគន់ដែលអាចកើតមានក្តី តែកញ្ញា កែវ សុបញ្ញា តារាចម្រៀងប្រចាំផលិតកម្មហង្សមាស នៅតែមិនបោះបង់ចោលនូវគំនិតមួយ នោះគឺគម្រោងនៃការយកកូន បើទោះបីជាតារាចម្រៀងរូបនេះ មិនទាន់បានរៀបអាពាហ៍ពិពាហ៍តាមប្រពៃណីខ្មែរក្តី។
កញ្ញា កែវ សុបញ្ញា ដែលបាននិងកំពុងប្រឡូកក្នុងវិស័យសិល្បៈជាច្រើនឆ្នាំ និងត្រូវបានគេស្គាល់ដំបូង នៅពេលកញ្ញាចូលរួមប្រឡងប្រជែងកម្មវិធីប្រឡងចម្រៀងកន្លងមកនោះ បានលាតត្រដាងការពិតនៅពីក្រោយការចង់បានកូនមុនរៀបការថា ដោយសារតែកត្តាសុខភាព ដូច្នេះកញ្ញាត្រៀមនឹងយកបុត្រជាមួយនឹងគូដណ្តឹងរបស់នាង មុនគម្រោងការរៀបការ។
កញ្ញា កែវ សុបញ្ញា បានទម្លាយមូលហេតុទៀតថា កញ្ញា ចង់បានកូននៅក្នុងឆ្នាំនេះតែម្តង ដោយធ្វើអោយអ្នកគាំទ្រមានការភ្ញាក់ផ្អើលជាខ្លាំងជុំវិញបញ្ហាទាំងអស់នេះ ដោយអ្នកគាំទ្រខ្លះពោលថា គេមិនទាន់បានស្គាល់មុខបុរសដែលជាគូដណ្តឹងរបស់នាងផង តែបែរជា កែវ សុបញ្ញា ចង់បានកូនទៅវិញ។
តារយៈបទសម្ភាសន៍ជាមួយសារព័ត៌មានកោះសន្តិភាព កែវ សុបញ្ញា បានស្រាយចម្ងល់ដោយបានពន្យល់ថា នាពេលបច្ចុប្បន្ននេះ កញ្ញាមានគូដណ្តឹងហើយ ដោយបានភ្ជាប់ពាក្យជាមួយបុរសម្នាក់កាលពីពេលកន្លងទៅ ដោយរៀបចំឡើងជាលក្ខណៈគ្រួសារធម្មតា ព្រោះកាលពីកញ្ញាបានភ្ជាប់ពាក្យនោះ គឺអំឡុងពេលកូវីដ ដូច្នេះបានភ្ជាប់ពាក្យដោយគ្រាន់តែជាគ្រួសារតែប៉ុណ្ណោះ ដោយពេលនោះមិនបានកៀរគងអ្នកសិល្បៈអោយចូលរួមកុះករនោះទេ។
កែវ សុបញ្ញា បានបន្តថា សុំទោសសម្រាប់អ្នកសិល្បៈដែលមិនអញ្ជើញអោយចូលរួមដូច្នេះ ព្រោះស្ថានភាពពេលនោះគឺលំបាកខ្លាំង ដូច្នេះកញ្ញា សូមអធ្យាស្រ័យផង។ បើទាក់ទងជាមួយការចង់បានកូនមុនពេលរៀបការ ដោយសារ កញ្ញាមានបញ្ហាសុខភាព ព្រោះតែកញ្ញាមានដុំម្យ៉ាងនៅក្នុងស្បូន ដូច្នេះកញ្ញាប្រឈមនឹងបញ្ហាអត់កូន ហេតុដូចនេះហើយ ទើបបានជាកញ្ញាប្រញាប់ចង់បានកូនដូច្នេះ។
កែវ សុបញ្ញា បានបន្ថែមទៀតថា កញ្ញាធ្លាប់មានម្តងដែរ ប៉ុន្តែវាមិននៅ ត្រង់ចំណុចនេះកញ្ញាមានការសោកស្តាយ ក៏ដូចជាអាក់អន់ស្រពាន់ចិត្តជាខ្លាំង។ ចំណែករៀមច្បងនៅក្នុងសិល្បៈក៏មានការគាំទ្រ និងជំរុញលើកទឹកចិត្តអោយយកកូនមុនរៀបការផងដែរ ប្រសិនបើកញ្ញាមានអាយុច្រើន នោះបញ្ហានៃការប្រឈមកើតមានកាន់តែខ្លាំង ដោយនាពេលនេះកញ្ញា កែវ សុបញ្ញា មានអាយុ៣១ឆ្នាំហើយ។
កញ្ញា កែវ សុបញ្ញា បន្តទៀតថា កញ្ញាក៏មិនចង់រំលងប្រពៃណីនោះដែរ ប៉ុន្តែដោយសារតែបញ្ហាសុខភាពទើបកញ្ញាធ្វើដូច្នេះ ហេតុដូចនេះសូមអ្នកគ្រាំទ្រ សូមកុំធ្វើការរិះគន់សម្រាប់រូបកញ្ញា កញ្ញាក៏មិនចង់ជួបបញ្ហាចឹងដែរ។ ជុំវិញបញ្ហាទាំងអស់នេះ កញ្ញាក៏បានភ្ជាប់ពាក្យរួចមកហើយ គ្រាន់តែមិនទាន់រៀបការ ដោយកញ្ញាអាចនឹងមានរៀបការនៅដើមឆ្នាំ២០២៤។
គួររលឹកផងដែរថា តារាស្រីរូបនេះ បានប្រឡូកក្នុងសិល្បៈតាំងពីឆ្នាំ២០១០មកម្ល៉េះ ដោយកាលនោះកញ្ញាបានឈ្នះពានរង្វាន់ជាប់ចំណាត់ថ្នាក់លេខ១ នៅក្នុងកម្មវិធី អាយដលបេះដូងខ្មែរ។ លុះមកដល់ឆ្នាំ២០១៤ ទើបកញ្ញាបានចូលប្រឡងក្នុងកម្មវិធី The Voice Cambodia ផងដែរ បើទោះបីជាកញ្ញាមិនបានពាន ក៏កញ្ញាមានឈ្មោះបោះសម្លេង និងមានការគាំទ្រជាច្រើនរហូតមកដល់សព្វថ្ងៃនេះ។
ជាចុងក្រោយ កញ្ញា កែវ សុបញ្ញា សុំកុំអោយមហាជនមានការរិះគន់រាល់បញ្ហាទាំងអស់នេះ ដោយសុំជាការលើកទឹកចិត្តមកវិញ និងជំនួសដោយការគាំទ្រ កែវ សុបញ្ញា ជូនពរអោយមហាជនមានសុខភាពល្អ និងធ្វើដំណើរទៅទីជិតឆ្ងាយអោយជួបតែសុខសុវត្ថិភាព។
ចែករំលែកព័តមាននេះ