រាជធានីភ្នំពេញ ៖ យុវជនម្នាក់ក្រោយពីបើករថយន្តបុកគោស្លា.ប់ហើយរកម្ចាស់មិនឃើញក៏នាំគ្នាលើកគោខាងលើដាក់រថយន្តបំរុងយកទៅស្រុកត្រូវសមត្ថកិច្ចឃាត់យកមកសាកសួរ
រាជធានីភ្នំពេញ ៖ យុវជនម្នាក់ក្រោយពីបើករថយន្តបុកគោស្លាប់ហើយរកម្ចាស់មិនឃើញក៏នាំគ្នាលើកគោខាងលើដាក់រថយន្តបំរុងយកទៅស្រុកត្រូវសមត្ថកិច្ចឃាត់យកមកសាកសួរ ។ ករណីនេះបង្កការភ្ញាក់ផ្អើលដល់សមត្ថកិច្ចកាលពីម៉ោង២និង៣០នាទីទាបភ្លឺថ្ងៃទី២១ ខែឧសភា ឆ្នាំ២០១៧ នៅលើកំណាត់ផ្លូវជាតិលេខ៤ ភូមិត្រពាំងទួល សង្កាត់កំបូល ខណ្ឌពោធិ៍សែនជ័យ ។ អ្នកបើកបររថយន្តឈ្មោះ ពេជ្រ ចន អាយុ២១ឆ្នាំ ស្នាក់នៅភូមិអង្កាញ់ ឃុំតេជោអភិវឌ្ឍន៍ ស្រុកឈូក ខេត្តកំពត ។
ប្រភពពីយុវជនខាងលើបានប្រាប់សមត្ថកិច្ចថា មុនពេលកើតហេតុខ្លួនបានដឹកអំពៅចេញពីស្រុកយកមកដាក់ឱ្យម៉ូយនៅផ្សារដើមគរក្រោយពីដាក់ឱ្យម៉ូយហើយពួកខ្លួនមានគ្នាបីនាក់បានជិះរថយន្តមួយគ្រឿងម៉ាកសំយ៉ុង ពណ៌លឿង ពាក់ស្លាក លេខភ្នំពេញ 2L-7504 ត្រឡប់ទៅផ្ទះវិញ ខណៈបើកមកដល់ចំណុចខាងលើមានសត្វគោ៥ទៅ៦ក្បាលបានដើរឆ្លងផ្លូវធ្វើឱ្យគេជាន់ហ្វ្រាំងរថយន្តមិនទាន់ក៏ទៅបុកមេគោមួយក្បាលបណ្តាលឱ្យងាប់ តែករណីខាងលើនេះមិនមានអ្នករងរបួសឡើយគ្រាន់តែរថយន្តខូចខាតផ្នែកខាងឆ្វេងខ្លាំង ។
ប្រភពដដែលបានប្រាប់ទៀតថា ក្រោយពីបុកហើយរកម្ចាស់មិនឃើញក៏នាំគ្នាលើកដាក់លើរថយន្តគោលបំណងទៅស្រុកខណៈបើកមកដល់មុខតំបន់សេដ្ឋកិច្ចពិសេសកំបូលត្រូវសមត្ថកិច្ចឃាត់រថយន្តដឹកគោខាងលើតែម្តង ។ បច្ចុប្បន្នរថយន្ត និងសត្វគោដែលងាប់នោះបានយកមករក្សាទុកនៅប៉ុស្តិ៍នគរបាលរដ្ឋបាលកន្ទោកបណ្តោះអាសន្នដោយរងចាំព្រឹករកម្ចាស់មកដោះស្រាយ ៕
ចែករំលែកព័តមាននេះ