ការងារមួយចំនួនបានបាត់បង់ ខណ:ដែលការងារមួយចំនួនទៀតបានលេចឡើង ដោយសារតែបបច្ចេកវិទ្យាព័ត៌មាន ។ សម្តេច
តេជោ ហ៊ុន សែន បានលើកទឹកចិត្តអោយយុវជន និងយុវតីកម្ពុជា ត្រូវដើរឱ្យទាន់និន្នាការប្រែប្រួលនៃការងារ ដោយសារតែបច្ចេកវិទ្យាព័ត៌មាន។
ការងារមួយចំនួនបានបាត់បង់ ខណ:ដែលការងារមួយចំនួនទៀតបានលេចឡើង ដោយសារតែបបច្ចេកវិទ្យាព័ត៌មាន ។ សម្តេចតេជោ ហ៊ុន សែន បានលើកទឹកចិត្តអោយយុវជន និងយុវតីកម្ពុជា ត្រូវដើរឱ្យទាន់និន្នាការប្រែប្រួលនៃការងារ ដោយសារតែបច្ចេកវិទ្យាព័ត៌មាន។
សម្តេចបានលើកទឹកចិត្តយុវជន និងយុវតីកម្ពុជា អោយយកចិត្តទុកដាក់ទៅលើបច្ចេកវិទ្យាព័ត៌មាន នៅក្នុងវេទិកាសេដ្ខកិច្ចពិភពលោកនៅពេលថ្មីៗនេះ ។
ជាការពិតណាស់ យើងបានឃើញយ៉ាងជាក់ស្តែង នៅក្នុងការរស់នៅប្រចាំថ្ងៃ ។ ការងារវាយអត្ថបទកុំព្យូទ័រ អាចរកលុយបាន នៅក្នុងទសវត្សរ៍ឆ្នាំ១៩៩០ ។ ពេលនោះ ការវាយកំព្យូទ័រអត្ថបទមួយ ទំព័រមានតម្លៃមួយដុល្លារ ។ ប៉ុន្តែការងារនេះ បានបាត់បង់ទៅហើយ ដោយសារតែមនុស្សសឹងតែគ្រប់គ្នា នៅសម័យកាលនេះ ចេះប្រើកុំព្យូទ័រ ។ ហាងអ៊ីនធើរណេតជាច្រើន បានបិទទ្វាររកស៊ីដោយសារតែមនុស្សសឹងតែគ្រប់គ្នាមានស្មាតហ្វូន ដែលមានអ៊ីនធើរណេតប្រើស្រាប់ ។ មានការងារ និងមុខរបរជាច្រើនទៀត បានបាត់បង់ដូចគ្នា ។
ទន្ទឹមជាមួយគ្នានោះ ការងារជាច្រើនបានកើតឡើង និងទីផ្សារថ្មីៗក៏លេចឡើងតាមនោះ ។ ឧទាហរណ៍ ដូចជាមានមនុស្សជាច្រើនបានលក់ផលិតផលតាមអនឡាញ ដោយមិនបាច់មានតូបលក់ជាក់ស្តែង នៅតាមទីផ្សារ ។ ជាមួយគ្នានោះ មនុស្សនៅកម្ពុជា ក៏អាចធ្វើការងារតាមអនឡាញអោយក្រុមហ៊ុនធំៗនៅបរទេសដូចជាអាមេរិក ចិន ជប៉ុន និងអាមេរិកជាដើម ដោយបញ្ជូនលទ្ធផលការងារនិងធ្វើការទំនាក់ទំនងគ្នាតាមអនឡាញ ។
ការលើកឡើងខាងលើ បញ្ជាក់ពីហេតុផលគ្រប់គ្រាន់ សម្រាប់ប្រមុខរាជរដ្ឋាភិបាល ដើម្បីដាស់តឿនដល់យុវជន និងយុវតីដើម្បីសម្របខ្លួនទៅនឹងអ្វីដែលគេហៅថា បដិវត្តន៍ឧស្សាហកម្មទីបួន ដែលទាក់ទងនឹងបច្ចេកវិទ្យាព័ត៌មាន ( Fourth Industrial Revolution) ។ ចំណេះដឹងផ្នែកបច្ចេកវិទ្យាព័ត៌មាន ដួចជាការប្រើប្រាស់បណ្តាញសង្គម (Social Network) និងសារព័ត៌មានសង្គម ( social media) ដូចជាហ្វេសប៊ុកជាដើម នឹងធ្វើអោយមនុស្សមានទុនដ៏សំខាន់មួយ សម្រាប់ការងារ និងជំនួញនាសម័យកាលនេះ។
ការរកលុយនាសម័យកាលនេះ មានភាពងាយស្រួលជាងអ្វីដែលមនុស្សធ្លាប់គិត ហើយគេក៏កាន់តែមានសេរីភាព នៅក្នុងការជ្រើសរើសការងាផងដែរ បើសិនជាមនុស្សមានការយល់ដឹង និងមានចំណេះដឹងពេញលេញសំខាន់ពីរ ។ ទីមួយ គឺចំណេះដឹងផ្នែកបច្ចេកវិទ្យាព័ត៌មាន ដូចជាការយល់ដឹងអំពីការប្រើប្រាស់ហ្វេសប៊ុក ការប្រើប្រាស់យូធ្យូប ( Youtube) និងចំណេះដឹងមូលដ្ឋានមួយចំនួនទៀតដែលទាក់ទងនឹងបច្ចេកវិទ្យាព័ត៌មាននេះ ។
ចំណេះដឹងសំខាន់ទីពីរ គឺការចេះបង្កើតខន់ថិន (Content) ដែលល្អមានប្រយោជន៍ និងមានការអប់រំ ដើម្បីអោយមនុស្សរាប់ម៉ឺនសែននាក់អាន ឬទស្សនា ។ ខន់ថិន គឺមានន័យថា ជាអត្ថបទសំណេរ ជារូបភាព ជាសម្លេង ឬក៏ជាវីដេអូ ។ នៅពេលដែលគេអាចប្រមូលមនុស្សបានរាប់សែន ឬដល់លាននាក់ នៅក្នុងដៃហើយនោះ គេនឹងបង្កើតបានទីផ្សារផ្សាយពាណិជ្ជកម្មមួយសម្រាប់ផលិតផល និងសេវាផ្សេងៗ។ ចំនួននេះនឹងលើសពីចំនួនអ្នកអានកាសែតនីមួយៗនៅកម្ពុជា ដែលមានអ្នកអានត្រឹមតែខ្ទង់ប៉ុន្មានម៉ឺននាក់ប៉ុណ្ណោះ។
ដូច្នេះហើយបានជាសម័យកាលនេះ មនុស្សនឹងអាចរកលុយបានស្រួលកាលបើគេមានចំណេះដឹងពីរយ៉ាងដ៏សំខាន់ដែលរៀបរាប់ខាងលើ គឺការប្រើប្រាស់បច្ចេកវិទ្យាព័ត៌មានព្រមទាំងសារព័ត៌មាន និងបណ្តាញសង្គមគួបផ្សំនឹងចំណេះដឹងសំខាន់មួយទៀត គឺការបង្កើតខន់ថិន ដែលអាចជាអត្ថបទសំណេរ រូបភាព សម្លេង និងវីដេអូ ។
អត្ថបទនេះ សរសេរដោយលោក ងួន សេរ័ត្ន សាស្ត្រាចារ្យផ្នែកទំនាក់ទំនងសាធារណ: នៅ Department of Media and Communication នៅសាកលវិទ្យាល័យភូមិន្ទភ្នំពញ ។ អាចទំនាក់ទំនងបានតាមរយ: អ៊ីមេល borarath@hotmail.com ។
ចែករំលែកព័តមាននេះ