រាជធានីភ្នំពេញ ៖បន្ទាប់មានជំនួបជាង២ម៉ោងជាមួយសម្តេចតេជោហ៊ុន សែន នាយករដ្ឋមន្ត្រី លោកបណ្ឌិត យ៉ង សាំងកុមារ បានឱ្យដឹងថា មានទស្សនវិស័យដូចគ្នា និងធ្វើការជាមួយគ្នាបានទាក់ទងទៅនឹងបញ្ហាប្រឈម និងដំណោះស្រាយវិស័យកសិកម្មនៅកម្ពុជា។
នៅថ្ងៃទី២៨ ខែវិច្ឆិកា ឆ្នាំ២០២២នេះ សម្ដេចតេជោ ហ៊ុន សែន បានជួបពិភាក្សាជាមួយឯកឧត្តមឌិត ទីណា រដ្ឋមន្ត្រីក្រសួងកសិកម្ម, លោកបណ្ឌិត យ៉ង សាំងកុមារ និងលោក ឡឹក សុធារ លើការងារកសិកម្ម ដែលលោកទាំងពីរនាក់ទើបមករួមរស់ជាមួយគណបក្សប្រជាជនកម្ពុជា។
យោងតាមគេហទំព័រហ្វេសប៊ុករបស់ លោកបណ្ឌិត យ៉ង សាំងកុមារ នាថ្ងៃទី២៨ វិច្ឆិកានេះថា «រដ្ឋមន្ត្រីក្រសួងកសិកម្ម និងខ្ញុំបានជួបជាមួយសម្តេចនាយករដ្ឋមន្ត្រីពិភាក្សាអស់រយៈពេលប្រមាណ២ម៉ោង ក្នុងបរិយាកាសល្អអំពីស្ថានភាពកសិកម្មទុក្ខលំបាករបស់កសិករ ទស្សនវិស័យ និងវិធានការកែលម្អជាពិសេសផ្តោតលើវិស័យស្រូវអង្ករ និងវិស័យពាក់ព័ន្ធផ្សេងទៀត»។
លោកបណ្ឌិត បន្ដថា «ជាទូទៅយើងមានទស្សនវិស័យដូចគ្នាទាក់ទងនឹងបញ្ហាប្រឈម និងដំណោះស្រាយក្នុងវិស័យកសិកម្មនៅកម្ពុជា ហើយយើងអាចធ្វើការជាមួយគ្នាបាន»។
សូមរំលឹកថា នាថ្ងៃ២៣ វិច្ឆិកា លោកបណ្ឌិត យ៉ង សាំង កុមារ និងលោក ឡឹក សុធារ បានស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា។
ការចូលរួមនេះ ដោយសារលោកទាំង២ពេញចិត្តនឹងគោលនយោបាយ លើវិស័យកសិកម្ម ដែលសម្តេចតេជោ បានគូសបញ្ជាក់នាពេលថ្មីៗកន្លងមកនេះ ពិសេសេនោះការប្តូរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទថ្មី ដើម្បីធ្វើការអភិវឌ្ឍវិស័យនេះឲ្យរីកចម្រើន៕
ចែករំលែកព័តមាននេះ