រាជធានីភ្នំពេញ ៖ លោក ប៉ុល ហំម អនុប្រធានគណបក្សសង្គ្រោះជាតិបានលើកឡើងថា ការឈ្នះចាញ់ឆ្នោតមកពីការចុះតាមមូលដ្ឋានបានច្រើន ឬតិច និងថា ពេលនេះប្រជាពលរដ្ឋបានដឹងច្បាប់ហើយ មិនដូចពេលមុននោះទេ។
ការលើកឡើងរបស់អនុប្រធានគណបក្សប្រឆាំងនេះ ធ្វើឡើងក្នុងជំនួបជាមួយសកម្មជន អ្នកគាំទ្រ និងបេក្ខភាពក្រុមប្រឹក្សា ឃុំ-សង្កាត់ នៅឃុំក្រឡាញ់ ស្រុកក្រឡាញ់ ខេត្តសៀមរាប នាព្រឹកថ្ងៃទី១៩ ខែឧសភា ឆ្នាំ២០១៧។
ជាមួយគ្នានោះដែរ អនុប្រធានបក្សប្រឆាំងក៏បានលើកឡើងថា គណបក្សសង្គ្រោះជាតិបានឈ្នះឆ្នោត ហើយគណបក្សកាន់អំណាចមិនចុះចេញ នោះមិនដឹងធ្វើយ៉ាងណាទេ មានតែឲ្យបន្តនៅទៀតទៅ។ ប៉ុន្តែបញ្ហានឹងចារក្នុងប្រវត្តិសាស្ត្រ។
ថ្លែងក្នុងជំនួបសំណេះសំណាលជាមួយសកម្មជន អ្នកគាំទ្រ និងបេក្ខភាពក្រុមប្រឹក្សា ឃុំ-សង្កាត់ នៅឃុំក្រឡាញ់ ស្រុកក្រឡាញ់ ខេត្តសៀមរាប ព្រឹកថ្ងៃទី១៩ ឧសភានេះ លោកបានបញ្ជាក់ថា «បើយើងឈ្នះឆ្នោតហើយគេមិនចុះ ហើយគេថាឈ្នះរហូតនោះ តើយើងធ្វើយ៉ាងម៉េច ? ឃុំ-សង្កាត់ យើងឈ្នះកន្លងមក គេចុះតាស ឲ្យតែយើងធ្វើត្រឹមត្រូវទៅ! ។ ប៉ុន្តែការបោះឆ្នោតថ្នាក់ជាតិសួរថា ឆ្នាំ២០១៧ គេចាញ់ឆ្នោតហើយគេមិនចុះចេញ តើយើងធ្វើយ៉ាងម៉េច0x017d7 ឲ្យគេនៅទៀតទៅ។ ក៏ប៉ុន្តែពាក្យខ្ញុំថា ឲ្យនៅតទៅទៀតនឹងសូមស្តាប់ឲ្យបាន បើកៅអីលោកអង្គុយវាត្រជាត់គូទ លោកត្រូវទទួលខុសត្រូវចំពោះសម្ភាធរបស់អន្តរជាតិ លោកត្រូវទទួលខុសត្រូវចំពោះសម្ភាធរបស់ប្រជាពលរដ្ឋ លោកមិនចុះចេញពេលគេតវ៉ាលោកអាងវៃគេបាក់ធ្មេញ លោកអាងកម្លាំងយោធា លោករួចខ្លួនទេ»។
ជាមួយគ្នានោះដែរ លោក ប៉ុល ហំម ក៏បានលើកឡើងថា ប្រសិនបើមានករណីនោះមែន និងមានចារក្នុងប្រវត្តិសាស្ត្រ ហើយថា សម្តេចតេជោ ហ៊ុន សែន មិនល្ងង់ទេ ព្រោះសម្តេចថា មិនទាន់ឈ្នះផងឲ្យគេចុះចេញផងដែរ។
នៅថ្ងៃដដែលលោក សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា គណបក្សប្រជាជនកម្ពុជាជាស្ថាបនិកនៃសន្តិភាព និងការអភិវឌ្ឍន៍ ។
លោកបានគូសបញ្ជាក់ថា «គណបក្សប្រឆាំងមិនបានធ្វើអ្វីដើម្បីសន្តិភាពទេ មានតែធ្វើសកម្មភាពចង់បំផ្លឹចបំផ្លាញសន្តិភាពប៉ុណ្ណោះតាមហិច្ឆតាអំណាចរបស់ខ្លួន ។ នៅពេលដែលគណបក្សប្រជាជនកម្ពុជាខិតខំកសាង និងអភិវឌ្ឍន៍ប្រទេស គណបក្សប្រឆាំងបានត្រឹមយកជើងរារទឹក ប្រើគ្រប់មធ្យោបាយ និងឧបាយកលរារាំងការឈានទៅមុខរបស់ជាតិ ក្នុងចេតនាមិនចង់ឲ្យជាតិរីកចំរើន ក្រែងមានគុណសម្បត្តិដល់គណបក្សប្រជាជនកម្ពុជា មានតែញុះញង់ បំផុសបំផុលប្រជាជនឲ្យប្រឆាំងនឹងគណបក្សប្រជាជនកម្ពុជា ទប់ស្កាត់រាល់ការងារកសាង និងអភិវឌ្ឍន៍ប្រទេសតែប៉ុណ្ណោះ»។
លោកថា ដូច្នេះសន្តិភាព និងបណ្តាសមិទ្ធផលដែលកើតឡើងព្រោងព្រាតនៅទូទាំងប្រទេសនេះ គ្មានការចូលរួមពីគណបក្សប្រឆាំងឡើយ មានតែយកជើងរារទឹកតែប៉ុណ្ណោះ ៕
ចែករំលែកព័តមាននេះ