តារា K-Pop ដ៏ល្បីល្បាញនៅក្នុងប្រទេសកូរ៉េ នឹងជាអតីតសមាជិកក្រុម 2NE1 នោះគឺកញ្ញា CL បានមកប្រគំតន្ត្រីខា្នតយក្សនៅបរិវេទណ OCIC ដែលមានមនុស្សចូលរួមទស្សនារាប់ម៉ឺននាក់។ ការប្រគំតន្ត្រីនោះ ក៏មានការចូលរួមជាមួយនឹងសិល្បករខ្មែរជាច្រើនផ្សេងទៀតផងដែរ
រាជធានីភ្នំពេញ ៖ កាលពីថ្ងៃទី២៦ ខែវិច្ឆិកា ឆ្នាំ២០២២ តារា K-Pop ដ៏ល្បីល្បាញនៅក្នុងប្រទេសកូរ៉េ នឹងជាអតីតសមាជិកក្រុម 2NE1 នោះគឺកញ្ញា CL បានមកប្រគំតន្ត្រីខា្នតយក្សនៅបរិវេទណ OCIC ដែលមានមនុស្សចូលរួមទស្សនារាប់ម៉ឺននាក់។ ការប្រគំតន្ត្រីនោះ ក៏មានការចូលរួមជាមួយនឹងសិល្បករខ្មែរជាច្រើនផ្សេងទៀតផងដែរ។
បើទោះបីជា មេឃបង្អុរភ្លៀងខ្លាំងយ៉ាងណាក៏ដោយ ក៏នៅតែមាន Fan រាប់ម៉ឺននាក់នៅតែបន្តការរង់ចាំ ដើម្បីឃើញ Idol របស់ខ្លួនមិនត្រទ្បប់ទៅវិញទ្បើយ។ ហើយការប្រគំតន្ត្រីនោះទៀតសោត ក៏រឹតតែរលូន និងកាន់តែសប្បាយរីករាយ ពីព្រោះអ្នកដែលបានចូលរាំក្នុងការប្រគំតន្ត្រីខាងលើនេះ។ គ្រាន់តែឃើញវត្តមានរបស់ CL ភ្លាម នាំគ្នាស្រែកហ៊ោកញ្ជ្រៀវយ៉ាងរំភើប ហើយ CL នៅតែបន្តស្រែកច្រៀង និងរាំក្រោមតំណក់ទឹកភ្លៀងមិនធ្វើអោយមហាជន និងអ្នកគាំទ្រដែលរង់ចាំទស្សនាខកចិត្តនោះទេ។
ហើយអ្វីដែលកាន់តែគួរអោយចាប់អារម្មណ៍ទៀតនោះ គឺបន្ទាប់ពីការប្រគំតន្ត្រីខ្នាតយក្សនេះចប់ នៅថ្ងៃទី២៧ ខែវិច្ឆិកា ឆ្នាំ២០២២ សមាជិកអតីត 2NE1 រូបនេះ បានធ្វើដំណើរទៅទស្សនារម្មណីយដ្ឋានប្រវត្តិសាស្ត្រវត្តភ្នំ ដែលនៅចំកណ្តាលនៃទីក្រុងភ្នំពេញ។ ខណៈពេលនោះក៏មានបងស្រីម្នាក់ដែលមានគណនី Facebook ឈ្មោះថា «ហេង វួចហៀង លក់ទូរស័ព្ទដៃ» បានបង្ហោះរូបភាពប៉ុន្មានសន្លឹកជាមួយនឹងតារាចម្រៀងកូរ៉េ កញ្ញា CL។
ដោយគ្រាន់ការបង្ហោះនោះ មិនទាន់បានប៉ុន្មាននាទីផង ស្រាប់តែមហាជនអ្នកគាំទ្របាននាំគ្នា share ចែករំលែកពាសពេញបណ្តាញសង្គម ដោយអ្នកគាំទ្ររបស់ CL នាំគ្នាច្រណែននឹងបងស្រីគ្រប់ៗគ្នា ព្រោះថាអ្នកខ្លះខំចំណាយលុយទិញសំបុត្រ និងរង់ចាំការទស្សនាជាច្រើនម៉ោង សូម្បីតែចង់ឃើញអោយជិតក៏មិនបានផង ប៉ុន្តែបងស្រីវិញ បានទាំងជួបនឹងថតរូបជាមួយនឹង CL យ៉ាងជិតស្និទ្ធិ រួមជាមួយនឹងកូនៗរបស់បងស្រីទៀតផង។
តាមរយៈការសាកសួរពីសារព័ត៌មានកោះសន្តិភាព បងស្រីបានអោយដឹង និងបង្ហាញអារម្មណ៍ថា ដំបូងទ្បើយ បងស្រីគ្រាន់តែទៅលេងនៅរម្មណីយដ្ឋានប្រវត្តិសាស្ត្រវត្តភ្នំ ជាមួយនឹងប្អូនស្រី ព្រមទាំងកូនក្មួយរបស់គាត់តែប៉ុណ្ណោះ ប៉ុន្តែប្អូនស្រីរបស់គាត់បានប្រាប់ថា តារាចម្រៀងដ៏ល្បី កញ្ញា CL ក៏នៅទីនោះដែរ ទើបពួកគាត់នាំគ្នាទៅសុំ CL ថតរូប។ ខណៈពេលនោះក្រុមការងាររបស់នាងមិនអនុញ្ញាតអោយពួកគាត់ថតរូបនោះទេ ស្រាប់តែ CL បានហៅរូបគាត់ចូលទៅថតវិញ ដោយបង្ហាញអារម្មណ៍រីករាយ និងភាពស្និទ្ធស្នាលជាមួយនឹងក្រុមគ្រួសាររបស់គាត់។
បងស្រីបានលើកទ្បើងទៀតថា គាត់ពិតជាមានក្តីរំភើបយ៉ាងខ្លាំង ដោយមិននឹកស្មានថា រូបគាត់បានថតរូបជាមួយនឹងតារា K-Pop ដ៏ល្បីល្បាញដែលគ្រប់គ្នាតែងតែហៅថា Queen of K-pop របស់កូរ៉េ គឺកញ្ញា CL ហើយរូបគាត់ក៏ជាអ្នកគាំទ្រ CL មួយរូបផងដែរ តាំងតែពី CL មិនទាន់បំបែកក្រុម។
មហាជនជាច្រើនបាននាំគ្នាបញ្ចេញមតិយោបល់ ដោយសរសើរបងស្រីដែលមានសំណាងបានថតរូបជាមួយតារាល្បី និងជា Idol របស់ខ្លួនតាំងតែពីយូរណាស់មកហើយ ។
សូមបញ្ជាក់ផងដែរថា CL ក៏ធ្លាប់មកសម្តែងនៅក្នុងប្រទេសកម្ពុជាម្តងរួចមកហើយកាលពីឆ្នាំ២០១៧ និងមានអ្នកចូលរួមទស្សនារាប់ម៉ឺននាក់ឯណោះ ហើយការមកកម្ពុជាលើកនេះ គឺជាលើកទី២ហើយ។ ចំណែកអ្នកគាំទ្រសង្ឃឹមថា នឹងបានឃើញវត្តមានរបស់នាងជាបន្តបន្ទាប់ទៀនៅក្នុងប្រទេសកម្ពុជា។
ចែករំលែកព័តមាននេះ