យីណ៎ ! សូម្បីលោកយាយអនាម័យក៏មិនលើកលែងដែរ (មានវីដេអូ)
រាជធានីភ្នំពេញ ៖ ជនសង្ស័យម្នាក់បានធ្វើសកម្មភាព
រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពកាច់.កម៉ូតូរបស់លោកយាយអនាម័យម្នាក់ដែលគាត់ជិះទៅរកទិញបន្លែនៅក្នុងផ្សារជម្ពូវ័ន ប៉ុន្តែប៉ះចំថ្ងៃស៊យយីអ៊ុនធ្លាក់ចុះពេលកាច់បានសម្រេចហើយបំរុងជិះរត់គេចខ្លួន ត្រូវបានលោកយាយអនាម័យនោះប្រទះឃើញទាន់ក៏បានសួរថា «យកម៉ូតូខ្ញុំទៅណា?» និងស្រែកថា «ចោរៗ យ៉ាងកងរំពង» ដែលជាហេតុធ្វើឲ្យជនសង្ស័យខាងលើភ័យ និងព្យាយាមរត់គេចខ្លួន ។ ប៉ុន្តែមិនអាចរត់រួចឡើយ គឺត្រូវបានប្រជាពលរដ្ឋនៅក្នុងផ្សារនោះដេញចាប់បានរួចហើយវាយទាត់ធាក់ទ្រោមខ្លួនដើម្បីបញ្ចេញកំហឹង ព្រោះនៅក្នុងចំណោមប្រជាពលរដ្ឋទាំងនោះក៏មានអ្នកខ្លះធ្លាប់បាត់ម៉ូតូដែរក្នុងពេលកន្លងមកពេលនោះបើកុំតែបានក្រុមសន្តិសុខផ្សារជួយទាន់ប្រហែលជននោះត្រូវប្រជាពលរដ្ឋវាយរហូតដល់ស្លាប់ផងក៏មិនដឹង ។
ហេតុការណ៍នោះបានកើតឡើងកាលពីវេលាម៉ោង៧និង៤៥នាទីព្រឹក ថ្ងៃទី១៩ ខែឧសភា ឆ្នាំ២០១៧ នៅក្នុងផ្សារជម្ពូវ័ន ស្ថិតនៅក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។ ជនសង្ស័យខាងលើឈ្មោះ ថោង ភក្ដី អាយុ៣៣ឆ្នាំ មានទីលំនៅក្នុងភូមិថ្មគោល សង្កាត់ចោមចៅ នៅជាប់ខ្លួនជននោះមានកូនសោរម៉ូតូ, កាបូបដៃ១, សំបុត្រផ្ញើម៉ូតូមួយចំនួន, ឧបករណ៏សម្រាប់កាច់សោ.កម៉ូតូ១កំប្លេរ ព្រមទាំងសម្ភារមួយចំនួនទៀត ។ ជនសង្ស័យរូបនេះបានធ្វើសកម្មភាពកាច់សោ.កម៉ាកហុងដាគុបជ្រុង ពណ៌ទឹកប៊ិច១គ្រឿង ពាក់ស្លាកលេខ កំពង់ស្ពឺ 1B-6287 ជាកម្មសិទ្ធិរបស់ស្ត្រីចំណាស់ម្នាក់ឈ្មោះ ផាត រឹម អាយុ៦០ឆ្នាំ ជាកម្មករផ្នែកអនាម័យ នៅសាលរៀនមួយកន្លែង ។
តាមប្រភពព័ត៌មានបានឲ្យដឹងថា ពេលចាប់ខ្លួនមុនដំបូងប្រជាពលរដ្ឋមិនបានវាយដំនោះទេ ប៉ុន្តែក្រោយពេលឆែកឃើញមានឧបករណ៏សម្រាប់កាច់សោ.កម៉ូតូ និងសម្ភារផ្សេងៗទៀតនៅជាប់ខ្លួនជននោះទើបដឹងថា ជាចោរពិតប្រាកដ និងបាននាំគ្នាវាយទាត់ធាក់ម្នាក់មួយដៃមួយជើងបញ្ចេញកំហឹងបណ្ដាលឲ្យជននោះទ្រោមខ្លួន ។ ខណៈនោះកុំតែក្រុមសន្តិសុខផ្សារនាំគ្នាជួយទាន់ប្រហែលជាជននោះត្រូវប្រជាពលរដ្ឋវាយរហូតដល់ស្លាប់ បន្ទាប់មកខាងសន្តិសុខផ្សារខាងលើបានហៅឲ្យកម្លាំងនគរបាលប៉ុស្ដិ៍ចោមចៅទៅយកជននោះទៅសាកសួរ និងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ