ខេត្តប៉ៃលិន ៖ ស្ត្រីវ័យក្មេងម្នាក់ ត្រូវបានសមត្ថកិច្ចនគរបាលចាប់ឃាត់ខ្លួន បន្ទាប់ពីឆែកឆេររកឃើញគ្រឿងញៀនមួយកញ្ចប់ធំរក្សាទុកនៅនឹងខ្លួន ដែលបានយកពីខេត្តកំពង់ធំដើម្បីទៅចែកចាយនៅឯខេត្តប៉ៃលិន ខណៈសមត្ថកិច្ចចុះត្រួតពិនិត្យគោលដៅនៅតាមដងផ្លូវ ។ ហេតុការណ៍ចាប់ឃាត់ខ្លួននេះ បានធ្វើឡើងកាលពីវេលាម៉ោង៨ និង០០នាទីយប់ ថ្ងៃទី១៧ ខែឧសភា ឆ្នាំ២០១៧ ស្ថិតនៅបណ្តោយផ្លូវជាតិលេខ៥៧ ក្នុងភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានពីសមត្ថកិច្ចបានឲ្យដឹងថា ដោយមានណែនាំពីលោកស្នងការនគរបាលខេត្តឲ្យចុះតាមគោលដៅ ដើម្បីរឹតបន្តឹងសន្តិសុខជូនពលរដ្ឋ ទើបកម្លាំងចម្រុះសហការណ៍គ្នាចុះអនុវត្តច្បាប់ចរាចរណ៍ផ្លូវគោកតាមដងផ្លូវ ដើម្បីធ្វើការបង្ក្រាបករណីមួយចំនួន ស្រាប់តែប្រទះឃើញករណីជួញដូរគ្រឿងញៀនចំនួនមួយករណី នៅចំណុចស្ថិតក្នុងភូមិសង្កាត់ខាងលើ ដោយធ្វើការឃាត់ខ្លួនជនសង្ស័យបានម្នាក់ឈ្មោះ ឌី រីដា ហៅ ធា ភេទស្រី អាយុ១៨ឆ្នាំ រស់នៅភូមិអូរគន្ធា ស្រុកស្ទឹងសែន ខេត្តកំពង់ធំ រួមនឹងវត្ថុតាងថ្នាំញៀនប្រភេទម៉ាទឹកក (ICE) ចំនួនមួយកញ្ចប់ធំ ស្មើនឹង១,០០០ក្រាមផងដែរ ។
ប្រភពបន្តទៀតថា បន្ទាប់ពីធ្វើការសាកសួរ នឹងស្រាវជ្រាវរួចមក ទើបឈានដល់ធ្វើការឃាត់ខ្លួនជនសង្ស័យប្រើប្រាស់គ្រឿងញៀនចំនួន២នាក់ទៀត ស្ថិតនៅចំណុចបណ្តោយផ្លូវជាតិលេខ៥៧ ក្នុងភូមិអូរតាប្រាង សង្កាត់អូរតាវ៉ៅ ក្រុងប៉ៃលិន ហើយបច្ចុប្បន្នសមត្ថកិច្ចជំនាញកំពុងកសាងសំណុំរឿង ដើម្បីបញ្ជូនជនសង្ស័យទៅតុលាការខេត្តឱ្យចាត់ការតាមនិតិវិធីច្បាប់ ៕
ចែករំលែកព័តមាននេះ