បញ្ជូនសំណុំរឿងជនសង្ស័យចំនួន៦នាក់ ទៅសាលាដំបូងខេត្ត
ខេត្តបន្ទាយមានជ័យ ៖ នាពេលម្សិលមិញនេះ កម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបន្ទាយមានជ័យ
ខេត្តបន្ទាយមានជ័យ ៖ នាពេលម្សិលមិញនេះ កម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបន្ទាយមានជ័យ បានរៀបចំសំណុំរឿងបញ្ជូនជនសង្ស័យចំនួន៦នាក់ទៅសាលាដំបូងខេត្តបន្ទាយមានជ័យ ជាប់ចោទពីបទរំលោភលើសេចក្តីទុកចិត្ត ប្រព្រឹត្តកាលពីវេលាម៉ោង៨យប់ថ្ងៃទី១៤ ខែឧសភា ឆ្នាំ២០១៧ ត្រូវបានកម្លាំងនគរបាលជំនាញព្រហ្មទណ្ឌ កម្រិតស្រាលខេត្តបើកការស្រាវជ្រាវចាប់ឃាត់ខ្លួនជាបន្តបន្ទាប់។
លោកវរសេនីយ៍ទោ ខែម សោភ័ណ នាយការិយាល័យ នគរបាលព្រហ្មទណ្ឌកម្រិតស្រាល បានឲ្យដឹងថា ជនសង្ស័យទាំង៦នាក់មានឈ្មោះ១-ឈ្មោះ ឈន ភារម្យ ហៅយ៉ា ភេទប្រុស អាយុ២៧ឆ្នាំ នៅភូមិ/សង្កាត់អូរអំបិល ក្រុងសិរីសោភ័ណ ,២-ឈ្មោះ វ៉ាន់ លីហេង ភេទប្រុស អាយុ១៥ឆ្នាំ,៣-ឈ្មោះ កាំង វិឆៃ ភេទប្រុស អាយុ២៤ឆ្នាំ ពីរនាក់នេះ នៅភូមិព្រហូត សង្កាត់អូរអំបិល ក្រុងសិរីសោភ័ណ,៤-ឈ្មោះ ជឹម ភាង ភេទប្រុស អាយុ៣៩ឆ្នាំ នៅភូមិព្រៃប្ញស្សី សង្កាត់ព្រះពន្លា ក្រុងសិរីសោភ័ណ,៥-ស៊ុក សុខា ភេទប្រុស អាយុ២៥ឆ្នាំ នៅភូមិប្រជាធម្ម សង្កាត់ផ្សារកណ្តាល ក្រុងប៉ោយប៉ែត និងទី៦-ឈ្មោះ លឹម សុខណា ភេទប្រុស អាយុ៤៨ឆ្នាំ នៅភូមិរស់នៅភូមិក្បាលស្ពាន សង្កាត់ផ្សារកណ្តាល ក្រុងប៉ោយប៉ែត។
លោកនាយការិយាល័យ បានបញ្ជាក់ថា កាលពីវេលាម៉ោង៨យប់ ថ្ងៃទី១៤ ខែឧសភា ឆ្នាំ២០១៧ មានឈ្មោះ ទៀត វណ្ណយ៉ា ភេទប្រុស អាយុ២១ឆ្នាំ រស់នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ បានខ្ចីម៉ូតូម៉ាកហុងដាឌ្រីម ពណ៌ខ្មៅ សេរី២០១៤ ពាក់ស្លាកលេខ ប.មានជ័យ.1I-5886 ពីឈ្មោះ សុខ លី ភេទប្រុស អាយុ២០ឆ្នាំ នៅភូមិជាមួយគ្នា ដើម្បីទៅទិញគ្រឿងក្លែម នៅមុខវិមានរៀម។ ពេលទៅដល់ទីនោះ ក៏ជួបនឹងឈ្មោះ ឈន ភារម្យ ហៅយ៉ា និងបក្ខពួកគេ២នាក់ទៀត បានខ្ចីម៉ូតូពីឈ្មោះ ទៀត វណ្ណយ៉ា បន្តថាទៅនោះមួយភ្លែត ឈន ភារម្យហៅយ៉ា,កាំង វិឆៃ,វ៉ាន់ លីហេងបាននាំគ្នាយកម៉ូតូទៅបញ្ចាំនៅប៉ោយប៉ែត ពេលដល់ពាក់កណ្តាលផ្លូវជិះម៉ូតូត្រលប់មកវិញ ពេលនោះឈ្មោះ កាំង វិឆៃ,វ៉ាន់ លីហេង បានទៅជួបឈ្មោះ ស៊ុក សុខា នៅប៉ោយប៉ែត។
បន្ទាប់មកនាំគ្នាយកម៉ូតូនោះទៅជួបនឹងឈ្មោះ លឹម សុខណា ជឹម ភាង នៅភូមិព្រៃប្ញស្សី សង្កាត់ព្រះពន្លា ដោយបញ្ចាំក្នុងតម្លៃ១៥.០០០បាត(មួយម៉ឺនប្រាំពាន់បាត)។ លោកឧត្តមសេនីយ៍ត្រី សិទ្ធ ឡោះ ស្នងការរង ប្រធានការិយាល័យកណ្តាល នគរបាលព្រហ្មទណ្ឌ បានបញ្ជាក់ថា ឆ្លងតាមវិធានការស៊ើបអង្កេត និងមានវត្ថុតាងគ្រប់គ្រាន់ ជនសង្ស័យទាំង៦នាក់នេះ បានប្រព្រឹត្តអំពើរំលោភលើសេចក្តីទុកចិត្ត និង ទទួលផលចោរកម្ម ត្រូវបានកម្លាំងនគរបាលជំនាញ បានរៀបចំសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនិតិវិធីច្បាប់៕
ចែករំលែកព័តមាននេះ