រាជធានីភ្នំពេញ ៖ នៅរសៀលថ្ងៃសៅរ៍ ទី២០ ឧសភា ការប្រកួតប្រដាល់ដណ្ដើមខ្សែក្រវាត់អន្តរជាតិវគ្គ៣របស់សង្វៀនទូរទស្សន៍អាស៊ីអាគ្នេយ៍ដល់ជុំប៉ះគ្នារវាងកីឡាករកម្ពុជា និងកីឡាករថៃ២រូបថ្មីទៀតហើយ បន្ទាប់ពីពួកគេបានសាកកម្លាំងជាមួយកីឡាករថៃ២នាក់ដំបូងហើយទទួលបានម្នាក់៣ពិន្ទុក្នុងដៃដូចគ្នា ។
កីឡាករ ង៉ែត រដ្ឋា និង រឿង សារ័ត្ន នឹងឡើងប្រកួតជុំទី២របស់ខ្លួនជាមួយកីឡាករថៃ ដើម្បីដណ្ដើមយក៣ពិន្ទុបន្តទៀត ដោយអ្នកទាំងពីរត្រូវគេមើលឃើញថា មានការរំពឹងខ្ពស់សម្រាប់ការប្រកួតយ៉ាងខ្លាំងដោយសារតែក្នុងព្រឹត្តិការណ៍ដណ្ដើមខ្សែក្រវាត់នោះ គឺពួកលោកទទួលបាន៣ពិន្ទុនាំមុខទៅហើយ ។
លោក ញាណ សុធី អ្នករៀបចំការប្រកួតបានអះអាងថា ក្រោយបើកដំណើរការការប្រកួតមិត្តភាពអស់មួយរយៈ ស្ថានីយទូរទស្សន៍របស់លោកបានសម្រេចបើកព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់វគ្គ៣បានចំនួន២សប្ដាហ៍ហើយ ដោយការប្រកួតក្នុងសប្ដាហ៍ទី៣នេះលោកថា ជ័យជម្នះរបស់កីឡាករថៃ និងកីឡាករកម្ពុជា សុទ្ធតែសំខាន់ដូចគ្នា ទើបលោកបញ្ជាក់ថា ការប្រកួតសម្រាប់ថ្ងៃស្អែកនឹងមានសភាពស្វិតស្វាញ ។ លោកថា ការប្រកួតលើកនេះប្រជុំដោយកីឡាករជើងខ្លាំងកម្ពុជា៤រូប និងបរទេស៤រូប ដោយកីឡាករម្នាក់ៗទាំងកម្ពុជា និងបរទេស សុទ្ធតែបានរួមគ្នាធ្វើឱ្យព្រឹត្តិការណ៍ទាំងមូលកន្ត្រាក់ការគាំទ្រតាំងពីជុំទី១ ។
អ្នកគាំទ្រកីឡាករកម្ពុជាមានអារម្មណ៍តាមដានចំពោះព្រឹត្តិការណ៍ថ្មីនេះយ៉ាងខ្លាំង បន្ទាប់ពីឃើញសមាសភាពដណ្ដើមខ្សែក្រវាត់ដែលត្រូវប្រកាសឡើងសុទ្ធតែជាកីឡាករល្អទាំងកម្ពុជា និងថៃ ជាពិសេសបន្ទាប់ពីឃើញកីឡាករកម្ពុជាបើកឆាកក្នុងសប្ដាហ៍ទី១ហើយឈ្នះគូប្រកួតព្រមគ្នា ។ អ្នកគាំទ្រទាំងនោះកាន់តែបង្ហាញការទន្ទឹងចង់ឱ្យការប្រកួតលេចឡើង ដោយសារតែចង់ដឹងថា ការប្រកួតដណ្ដើមខ្សែក្រវាត់វគ្គថ្មី តើម្ចាស់ខ្សែក្រវាត់ជាកម្ពុជា ឬជាជនជាតិថៃដូចវគ្គទី២ដែលធ្វើឱ្យអ្នកទស្សនាខកចិត្ត ។
មន្ត្រីជាអ្នករៀបចំបានអះអាងថា ការប្រកួតសម្រាប់ព្រឹត្តិការណ៍នេះធ្វើឡើងថ្ងៃសៅរ៍មិនខុសពីមានការគាំទ្រគគ្រឹកគគ្រេងពីសំណាក់អ្នកចូលរួមដែលស្នេហាវិស័យប្រដាល់ទេ ។ លោកថា សមាសភាពដែលត្រូវប្រកួតសម្រាប់វគ្គថ្មី ដែលបានបង្ហាញខ្លួន គឺមានកីឡាករសរុប៨រូប ដោយ៤រូបជាជនជាតិកម្ពុជា និង៤រូបទៀតជាជនជាតិថៃ ។ លោក ញាណ សុធី ដែលជាអ្នករៀបចំបានទទូចឱ្យមានការគាំទ្រចំពោះការប្រដាល់ឱ្យបានច្រើន ដោយលោកបញ្ជាក់ថា កីឡាប្រដាល់កាន់តែមានការរីកចម្រើនប៉ុន្តែសម្រាប់ការគាំទ្រពីអ្នកទស្សនាហាក់នៅមានកម្រិត ។ ក្នុងនោះ អ្នកគាំទ្រមួយចំនួនបានយកការប្រដាល់ធ្វើជាអាជីវកម្ម ដោយការចាក់ភ្នាល់ ហើយលាបពណ៌ថា គណៈកម្មការផ្ដល់ពិន្ទុមិនយុត្តិធម៌នៅពេលកីឡាករដែលពួកគេភ្នាល់មិនឈ្នះតាមការចង់បាន ។ លោកថា អ្នកគាំទ្របែបនេះបានធ្វើឱ្យវិស័យប្រដាល់បាក់មុខ ប៉ុន្តែទូរទស្សន៍អាស៊ីអាគ្នេយ៍ក៏នឹងសម្រាំងការប្រដាល់ឱ្យមានគុណភាព១០០ភាគរយ ដោយមិនចេះតែឱ្យលទ្ធផលតាមការគូសវាសរបស់អ្នកភ្នាល់នោះទេ ។ លោកនៅតែថា អ្នកភ្នាល់ជាអ្នកធ្វើឱ្យវិស័យប្រដាល់បាក់មុខ ប៉ុន្តែអ្នកគាំទ្រផ្កាប់មុខទាំងនោះ ក៏ជួយឱ្យវិស័យប្រដាល់មានភាពផុលផុសផងដែរ ។
លោក ញាណ សុធី អ្នករៀបចំការប្រកួតបានអះអាងថា ឱ្យតែរាល់ការប្រកួតដណ្ដើមខ្សែ ក្រវាត់រមែងមានការលើកឡើងថា យុត្តិធម៌ និងមិនយុត្តិធម៌ ដែលសុទ្ធតែជាការលាបពណ៌នៅពេលការប្រកួតរវាងកីឡាករដែលពួកគេភ្នាល់មិនបានជោគជ័យ ។ ការប្រកួតដណ្ដើមខ្សែក្រវាត់វគ្គ៣របស់ក្រុមហ៊ុនខារ៉ាបាវ នឹងសម្រាំងបានល្អមិនខុសពីការគ្រោងទុក ដើម្បីធ្វើឱ្យព្រឹត្តិការណ៍ខារ៉ាបាវមានភាពលេចធ្លោ ។
ងាកមកកាន់ការប្រកួតនៅថ្ងៃសៅរ៍នេះវិញ លោក ញាណ សុធី បញ្ជាក់ថា កីឡាករ ង៉ែត រដ្ឋា មកពីក្លិបតាព្រហ្មមានជ័យ ត្រូវជួបប្រកួតជាមួយកីឡាករថៃឈ្មោះ PhlayNoy ក្រោយយកបាន៣ពិន្ទុពីកីឡាករថៃឈ្មោះ Lack Lay ដោយកីឡាករទាំង២នឹងក្លាយជាគូប្រកួតស៊ីសាច់ហុតឈាមគ្នាផងដែរសម្រាប់ការដណ្ដើមយក៣ពិន្ទុក្នុងជុំទី២ ។ លោកថា កីឡាករកម្ពុជានឹងមិនភ្លាត់ឱ្យចាញ់សម្រាប់ការប្រកួតនេះទេ ដោយសារតែការប្រកួតរសៀលស្អែក បើគេឈ្នះទៀតនឹងក្លាយជាអ្នកមានឱកាសឡើងទៅដណ្ដើមយកខ្សែក្រវាត់អន្តរជាតិ តែបើចាញ់មិនខុសពីទម្លាក់ចោលសំណាងខ្លួនឯង ។ លោកថា កីឡាកររូបនេះត្រូវការឈ្នះដើម្បីឈានឡើងមុខមាត់ ខណៈដែលកីឡាករថៃក៏ពិតជាប្រាថា្នចង់ឈ្នះដូចគ្នា ។ កីឡាករថៃត្រូវលោកប្រកាសថា ធ្លាប់ប្រកួត៦៩លើក ឈ្នះ៥៦លើក ចាញ់១២លើក និងស្មើ១លើក ក្នុងពេលដែលកីឡាករកម្ពុជាឆ្លងកាត់ការប្រកួត៧៣លើក ឈ្នះ៦២លើក ចាញ់៨លើក និងស្មើ៣លើក ។
សម្រាប់កីឡាករ រឿង សារ័ត្ន មកពីក្លិបទ័ពពិសេសឆត្រយោង៩១១ លោក ញាណ សុធី បញ្ជាក់ថា គេត្រូវឡើងប្រកួតជាមួយ កីឡាករថៃឈ្មោះ Lack Lay ក្រោយពីឈ្នះកីឡាករថៃឈ្មោះ Phaly Noy កាលពីជុំទី១។ លោកថា កីឡាករថៃធ្លាប់ប្រកួត៦៦លើក ឈ្នះ៥០លើក ចាញ់១៤លើក និងស្មើ២លើក ក្នុងពេលកីឡាករកម្ពុជាធ្លាប់ប្រកួត៦៧លើក ឈ្នះ៥៤លើក ចាញ់១០លើក និងស្មើ៣លើក ទើបលោកមិនហ៊ានទុកចិត្តចំពោះកីឡាករកម្ពុជា ៕
ចែករំលែកព័តមាននេះ