ក្រសួងយុត្តិធម៌អាមេរិកកាលពីថ្ងៃទី១៧ ឧសភា បានតែងតាំងរដ្ឋអាជ្ញាពិសេសមួយរូប ដើម្បីធានាដល់ឯករាជ្យភាពនៃការស៊ើបអង្កេតលើការឃុបឃិតគ្នាជាយថាហេតុរវាងបណ្តាមនុស្សជំនិតរបស់លោកដូណាល់ ត្រាំ និងរុស្ស៊ី ដែលរឿងនេះកាន់តែធ្វើឱ្យប៉ះពាល់ដល់អាណត្តិប្រធានាធិបតីអាមេរិក ។
លោក ROD ROSENSTEIN ជនលេខ២នៃក្រសួងយុត្តិធម៌អាមេរិក ប្រកាសពីការតែងតាំងលោក ROBERT MUELLER ជានាយក FBI ពីឆ្នាំ២០០០ ដល់២០១៣ ក្រោមប្រធានាធិបតី លោកចច ដាប់ប័លយូ ប៊ូស បន្ទាប់មកលោកបារ៉ាក់ អូបាម៉ា ជារដ្ឋអាជ្ញាពិសេសនេះ ។
រដ្ឋមន្ត្រីក្រសួងយុត្តិធម៌ លោក JEFF SESSIONS មនុស្សជំនិតរបស់លោកត្រាំ ធ្លាប់ទទួលការចោទប្រកាន់កាលពីខែមីនា ក្នុងការស៊ើបអង្កេតលើការជ្រៀតជ្រែករបស់រុស្ស៊ីក្នុងយុទ្ធនាការឃោសនាបោះឆ្នោតប្រធានាធិបតីឆ្នាំ២០១៦ ។
ការតែងតាំងរដ្ឋអាជ្ញាពិសេសនេះសំដៅឱ្យការស្រាវជ្រាវនៅដាច់ពីការស្រាវជ្រាវរបស់អំណាចនយោបាយ ដោយកាត់បន្ថយយ៉ាងខ្លាំងការត្រួតពិនិត្យរបស់ក្រសួងយុត្តិធម៌ដែលជាអាណាព្យាបាលរបស់ FBI ។
ប្រធានាធិបតីលោកដូណាល់ ត្រាំ ដែលរិះគន់ជាថ្មីនាព្រឹកថ្ងៃទី១៧ ឧសភា ថា លោកត្រូវបណ្តាសារព័ត៌មានព្រួតវាយប្រហារលោកនោះបានបញ្ចេញប្រតិកម្មតាមរយៈសេចក្តីប្រកាសមួយថា ការស៊ើបអង្កេតទាំងស្រុងមួយនឹងបញ្ជាក់ដូចអ្វីដែលយើងដឹងរួចហើយថា គ្មានការឃុបឃិតគ្នាណាមួយរវាងក្រុមឃោសនាបោះឆ្នោតរបស់ខ្ញុំ និងក្រុមបរទេសមួយឡើយ ។ ខ្ញុំមានការអត់ធ្មត់ រង់ចាំរឿងនេះចេញការសន្និដ្ឋានដោយឆាប់រហ័ស ៕
ចែករំលែកព័តមាននេះ