រាជធានីភ្នំពេញ ៖ យុវសិស្សរៀនថ្នាក់ទី១២ចំនួនពីរនាក់ត្រូវនគរបាលប៉ុស្តិ៍ផ្សារដើមថ្កូវ ចាប់ឃាត់ខ្លួន ខណៈពួកគេ និងបក្សពួកជាច្រើនជិះម៉ូតូប្រដាប់ដោយអាវុធក្នុងកាបូប ហេតុការណ៍នេះបង្កឱ្យការភ្ញាក់ផ្អើលកាលពីវេលាម៉ោង១១ព្រឹក ថ្ងៃទី១៨ ខែឧសភា ឆ្នាំ២០១៧ នៅចំណុចផ្លូវលេខ៤៨៨ កែងនិងផ្លូវលេខ១៥៥ ក្នុងសង្កាត់ផ្សារដើមថ្កូវ ខណ្ឌចំការមន។
យុវសិស្ស២នាក់ដែលឃាត់ខ្លួននោះ ១-ឈ្មោះ ផល បញ្ញា អាយុ១៩ឆ្នាំ សិស្សថ្នាក់ទី១២ សាលាវិទ្យាល័យទួលទំពូង ស្នាក់នៅផ្ទះជួល ផ្លូវលំ ភូមិក្បាលទំនប់ សង្កាត់បឹងទំពុន ខណ្ឌមានជ័យ និង២-ឈ្មោះ ភាព ម៉េងគ្រុយ អាយុ១៩ឆ្នាំ សិស្សរៀនថ្នាក់់ទី១២ សាលាវិទ្យាល័យទួលទំពូង ស្នាក់នៅផ្ទះលេខ១៣៩២ ផ្លូវលំ ភូមិចំរើនផល ក្នុងសង្កាត់បឹងទំពុន ខណ្ឌមានជ័យ ទាំង២នាក់ជិះម៉ូតូម៉ាកស្គូពី ពណ៌សលាយលឿង ពាក់ស្លាកលេខភ្នំពេញ១BD-៣០៥៩ និងដកហូតបានកាំបិតប័ុងតោមួយដើម, ដែកជ្រុងមួយដើម និងដុំថ្ម៣ដុំផងដែរ។
មុនពេលកើតហេតុនគរបាលប៉ុស្តិ៍ផ្សារដើមថ្កូវបានធ្វើការល្បាតនៅលើផ្លូវព្រះមុនីវង្ស ក៏ប្រទះឃើញក្រុមក្មេងសិស្សជិត២០នាក់ជិះម៉ូតូ៧គ្រឿងឈប់ពពាក់ពពូនគ្នាយ៉ាងអនាធិបតេយ្យ។ ពេលក្រុមក្មេងសិស្សសាលាទាំងនេះបានឃើញសមត្ថកិច្ចភ្លាមក៏នាំគ្នាព្យាយាមជិះម៉ូតូរត់គេច តែត្រូវសមត្ថកិច្ចដេញចាប់បានពីរនាក់ និងម៉ូតូមួយគ្រឿង ព្រមទាំងសម្ភារមួយចំនួនដែលលាក់ទុកក្នុងកាបូបស្ពាយ ។
តាមសម្ដីយុវសិស្សឈ្មោះ ផល បញ្ញា បានឱ្យដឹងថា មូលហេតុដែលពួកគេលើគ្នាទៅកាន់សាលាវិទ្យាល័យបឹងត្របែកនេះដែរ គឺក្នុងបំណងទៅរកជួបស្រីស្នេហ៍របស់គេម្នាក់ឈ្មោះ លីដា អាយុ១៧ឆ្នាំ រៀនថ្នាក់ទី១១ ជាពិសេសជួបមុខបុរសដែលញ៉ែសង្សារខ្លួន ព្រោះម្សិលមិញគេឃើញសង្សាររបស់ខ្លួនបង្ហោះហ្វេសប៊ុកជាមួយបុរសនោះ ហើយសរសេរថា «យើងស្រឡាញ់គ្នាជារៀងរហូត» ទើបក្តៅចិត្តលើកគ្នាមក ។ ក្រោយឃាត់ខ្លួនសិស្សទាំងពីរនាក់ និងដកហូតវត្ថុតាងរួចហើយ ក៏នាំមកធ្វើការសាកសួរ និងកំណត់ហេតុនៅប៉ុស្តិ៍នគរបាលផ្សារដើមថ្កូវ រួចបញ្ជូនទៅកាន់អធិការដ្ឋានខណ្ឌចំការមនចាត់ការតាមច្បាប់ ។
ចែករំលែកព័តមាននេះ