ស្របពេលដែលទឹកទន្លេមេគង្គកំពុងតែបន្តស្រក ដែលជាហេតុធ្វើឲ្យច្រាំងទន្លេ នៅចំណុចភូមិទួលគរ ឃុំទន្លេបិទ ស្រុកត្បូងឃ្មុំ បានបាក់ស្រុតមកកៀកនឹងលំនៅឋានរបស់ប្រជាពលរដ្ឋ ហើយត្រូវបានកម្លាំងអាជ្ញាធរមូលដ្ឋាន រួមនឹងនគរបាលជាច្រើននាក់ បាន
ខេត្តត្បូងឃ្មុំ ៖ ស្របពេលដែលទឹកទន្លេមេគង្គកំពុងតែបន្តស្រក ដែលជាហេតុធ្វើឲ្យច្រាំងទន្លេ នៅចំណុចភូមិទួលគរ ឃុំទន្លេបិទ ស្រុកត្បូងឃ្មុំ បានបាក់ស្រុតមកកៀកនឹងលំនៅឋានរបស់ប្រជាពលរដ្ឋ ហើយត្រូវបានកម្លាំងអាជ្ញាធរមូលដ្ឋាន រួមនឹងនគរបាលជាច្រើននាក់ បាននាំគ្នាចុះអន្តរាគមន៍ជួយរុះរើលំនៅឋានពលរដ្ឋទៅរកកន្លែងសុវត្ថិភាពផងដែរ។
លោក ភិន ឈុន មេឃុំទន្លេបិទ បានមានប្រសាសន៍ឲ្យដឹងនាព្រឹកថ្ងៃទី២៧ ខែវិច្ឆិកា ឆ្នាំ២០២២នេះថា លោកមេភូមិទួលគរ បានរាយការណ៍មករូបលោកថា នៅវេលាម៉ោង៤និង៣០នាទីរសៀល ថ្ងៃទី២៦ ខែវិច្ឆិកា នៅចំណុចភូមិទួលគរ ឃុំទន្លេបិទ ស្រុកត្បូងឃ្មុំ មានករណីបាក់ច្រាំងទន្លេភាគលំនៅដ្ឋានពលរដ្ឋដែលបាក់ជម្រៅ៦ម៉ែត្រ និងបណ្ដោយ៤០ម៉ែត្រ។
លោកមេឃុំទន្លេបិទ មានប្រសាសន៍បន្តថា គ្រោះធម្មជាតិបាក់ច្រាំងទន្លេនេះ បណ្ដាលឱ្យប៉ះពាល់ដល់ផ្ទះចំនួន០៣គ្រួសារ ដែលមានឈ្មោះដូចជា ៖ ១- ផ្ទះរបស់ឈ្មោះ រស់ រី ភេទប្រុសអាយុ៧១ឆ្នាំ មានផ្ទះទំហំ៦ម៉ែត្រ×៨ម៉ែត្រ អំពីឈើប្រក់ស័ង្កសី ជញ្ជាំងស័ង្កសី មានសមាជិកចំនួន៦នាក់ អាយុ១៨ឆ្នាំចំនួន០៤នាក់។ ២- ផ្ទះរបស់ឈ្មោះ ញៀន យន ភេទប្រុសអាយុ៧៩ឆ្នាំ មានទំហំ៦ម៉ែត្រ×៧ម៉ែត្រ ធ្វើអំពីឈើប្រក់ស័ង្កសី ជញ្ជាំងស័ង្កសី មានសមាជិក ០២នាក់ អាយុ១៨ឆ្នាំចំនួន០២នាក់។ និង៣- ឈ្មោះ ទិត្យ ឈុនឡាយ ភេទប្រុស អាយុ៦៣ឆ្នាំ ផ្ទះមានទំហំ៧ម៉ែត្រ×៩ម៉ែត្រ សង់អំពីឈើប្រក់ក្បឿង ជញ្ជាំងឈើ មានសមាជិក ០២នាក់ ស្រី០១នាក់ និងអាយុ១៨ឆ្នាំចំនួន០២នាក់។
ក្រោមការយកចិត្តទុកដាក់ពីសំណាក់ឯកឧត្តមបណ្ឌិត ជាម ចាន់សោភ័ណ្ឌ អភិបាលខេត្ត បានចាត់ឱ្យលោកឧត្តមសេនីយ៍ទោ ម៉ុន មាគ៌ា ស្នងការនគរបាលខេត្ត ដឹកនាំកម្លាំងនគរបាលជាច្រើននាក់ រួមសហការជាមួយនឹងអាជ្ញាធរស្រុក ក៏ដូចជាមូលដ្ឋាន នៅព្រឹកថ្ងៃទី២៧ ខែវិច្ឆិកា ឆ្នាំ២០២២ ដើម្បីចុះជួយរុះរើលំនៅដ្ឋានរបស់ប្រជាពលរដ្ឋទាំង៣ខ្នងខាងលើនេះ ទៅកាន់កន្លែងសុវត្ថិភាព។ ជាមួយគ្នានោះ កាកបាទក្រហមក៏បានយកអំណោយមកចែកជូនដល់សមាជិកក្រុមគ្រួសារដែលរងគ្រោះ ដោយសារបាក់ច្រាំងទន្លេទាំង៣គ្រួសារនេះផងដែរ។
លោកឧត្តមសេនីយ៍ទោ ម៉ុន មាគ៌ា ស្នងការនគរបាលខេត្តត្បូងឃ្មុំ មានប្រសាសន៍ឱ្យដឹងថា រហូតមកដល់រសៀលថ្ងៃទី២៧ ខែវិច្ឆិកានេះ កម្លាំងនគរបាលជាច្រើននាក់បន្តជួយអន្តរាគមន៍រុះរើលំនៅឋានដែលរងគ្រោះដោយសារបាក់ច្រាំងទន្លេ។
សូមបញ្ជាក់ថា ទីតាំងដដែលនេះ នាពេលកន្លងមក ធ្លាប់រងគ្រោះពីការបាក់ច្រាំងផងដែរ ហើយត្រូវបានរូបលោកដឹកនាំកម្លាំងមន្ត្រីក្រោមឱវាទ ចុះជួយអន្តរាគមន៍ដល់ប្រជាពលរដ្ឋដើម្បីដឹកគ្រឿងផ្ទះទៅដាក់នៅកន្លែងសុវត្ថិភាពឆ្ងាយពីច្រាំងទន្លេ។
ចែករំលែកព័តមាននេះ