ផ្ទុយស្រឡះ! គ្រូអារ៉ាប៊ីសាអូឌីតច្រានចោលព័ត៌មានថា កូនក្រុមបានកាដូឡាន Rolls-Royce
កាតា ៖ លោក Herve Renard គ្រូបង្វឹកក្រុមបាល់ទាត់ជម្រើសជាតិអារ៉ាប៊ីសាអូឌីត បានចេញមកធ្វើ
កាតា ៖ លោក Herve Renard គ្រូបង្វឹកក្រុមបាល់ទាត់ជម្រើសជាតិអារ៉ាប៊ីសាអូឌីត បានចេញមកធ្វើ
កាតា ៖ លោក Herve Renard គ្រូបង្វឹកក្រុមបាល់ទាត់ជម្រើសជាតិអារ៉ាប៊ីសាអូឌីត បានចេញមកធ្វើការបដិសេធព័ត៌មានដែលអះអាងថា ព្រះអង្គម្ចាស់ Mohammed bin Salman នៃអារ៉ាប៊ីសាអូឌីត បានសន្យាជាមួយកីឡាករទាំងអស់ក្នុងការផ្តល់ជូនកាដូឡាន Rolls-Royce Phantom ស៊េរីឆ្នាំ២០២២ ម្នាក់១គ្រឿង បន្ទាប់ពីការយកឈ្នះលើអាហ្សង់ទីន នៅព្រឹត្តិការណ៍ World Cup 2022 នៅកាតា។ គួររំលឹកថា ញ៉ាក់សាច់! កីឡាករអារ៉ាប៊ីសាអូឌីតបានកាដូឡាន Rolls Royce ម្នាក់១គ្រឿង ក្រោយឈ្នះអាហ្សង់ទីន
ជាមួយជ័យជម្នះលើក្រុមមេឃខៀវអាហ្សង់ទីន ដោយលទ្ធផល ២-១ កាលពីថ្ងៃទី២២ ខែវិច្ឆិកា ឆ្នាំ២០២២ ដែលជាការប្រកួតជុំទី១ ក្នុងពូល C បានជំរុញឱ្យមានមោទនភាពសម្រាប់ប្រជាជាតិអារ៉ាប់ទាំងមូល រហូតព្រះមហាក្សត្រ Salman នៃអារ៉ាប៊ីសាអូឌីត ត្រាសបង្គាប់ថ្ងៃឈប់សម្រាកថ្នាក់ជាតិចំនួន១ថ្ងៃ កាលពីថ្ងៃទី២៣ ខែវិច្ឆិកា កន្លងទៅផងដែរ។
អារ៉ាប៊ីសាអូឌីតដែលឈរនៅចំណាត់ថ្នាក់ទី៥១ ពិភពលោក បានបិទបញ្ចប់កំណត់ត្រាមិនស្គាល់ចាញ់ ៣៦ប្រកួតរបស់អាហ្សង់ទីន ដែលកំពុងឈរនៅចំណាត់ថ្នាក់ទី៣ ពិភពលោក។ បន្ថែមពីលើការឈប់សម្រាកថ្នាក់ចំនួន១ថ្ងៃ ប្រភពជាច្រើនបានរាយការណ៍ថា ព្រះអង្គម្ចាស់ Mohammed bin Salman Al Saud (MBS) នៃអារ៉ាប៊ីសាអូឌីត សព្វព្រះរាជហឫទ័យផ្តល់កាដូរថយន្តអភិជន Rolls Royce Phantom ស៊េរីឆ្នាំ ២០២២ ដែលមានតម្លៃជាង៥០ម៉ឺនដុល្លារអាមេរិក ដល់កីឡាករអារ៉ាប៊ីសាអូឌីតម្នាក់១គ្រឿង ចំពោះការខំប្រឹងប្រែងរហូតយកឈ្នះអាហ្សង់ទីន។
ដំណឹងនេះ ផ្ទុះឡើងដំបូងតាមរយៈការបង្ហោះលើបណ្តាញសង្គម Twitter របស់លោក Suhel Seth ដែលជាអ្នកជំនួញជនជាតិឥណ្ឌាដ៏ល្បីម្នាក់ ព្រមទាំងលោក Awb Alvi ដែលជាសកម្មជនលើប្រព័ន្ធផ្សព្វផ្សាយសង្គមដ៏ល្បីឈ្មោះផងដែរ ហើយក្រោយមកដំណឹងនេះ ត្រូវបានផ្សព្វផ្សាយយ៉ាងទូលំទូលាយនៅលើបណ្តាសារព័ត៌មានធំៗនៅជុំវិញពិភពលោកតែម្តង។
ទោះជាយ៉ាងណា គ្រូបង្វឹកក្រុមជម្រើសជាតិអារ៉ាប៊ីសាអូឌីតបានទទូចថា ការអះអាងនេះគឺជារឿងមិនពិត។ លោក Renard បាននិយាយនៅមុនការប្រកួត ដែលអារ៉ាប៊ីសាអូឌីតបានចាញ់ក្រុមប៉ូឡូញលទ្ធផល ២-០ សម្រាប់ការប្រកួតជុំទី២ កាលពីយប់ថ្ងៃទី២៦ ខែវិច្ឆិកា កន្លងទៅ យ៉ាងដូច្នេះថា «មិនមានអ្វីពិតអំពីរឿងនេះទេ។ យើងមានសហព័ន្ធ និងក្រសួងកីឡាយ៉ាងច្បាស់លាស់មួយ។ វាមិនមែនជាពេលវេលា ដើម្បីទទួលបានអ្វីមួយនៅពេលនេះទេ»។
គ្រូបង្វឹកជនជាតិបារាំងវ័យ៥៤ឆ្នាំរូបនេះ បានបន្តទៀតថា «យើងទើបលេងបាន១ប្រកួតប៉ុណ្ណោះ ហើយនៅសល់២ប្រកួតដែលសំខាន់ខ្លាំងណាស់។ ខ្ញុំមិនដឹងថា តើអ្នកចាំសន្និសីទកាសែតមុនការប្រកួតទល់នឹងអាហ្សង់ទីនឬអត់នោះទេ? នោះគឺជាការប្រកួតដ៏សំខាន់មួយក្នុងចំណោមការប្រកួតចំនួន៣ ដែលយើងត្រូវលេង។ រឿងល្អតែមួយគត់នៅចុងបញ្ចប់នៃវគ្គចែកពូលនេះ គឺការបញ្ចប់នៅលេខ១ ឬលេខ២ ហើយយើងនៅតែជាក្រុមមានចំណាត់ថ្នាក់ទាបបំផុតនៅក្នុងពូលនេះ ដែលទាក់ទងនឹងបទពិសោធន៍»។
សូមជម្រាបថា បច្ចុប្បន្នពូល C មានការប្រកួតប្រជែងកាន់តែខ្លាំង ដោយត្រូវរង់ចាំអ៊ុតលទ្ធផលការប្រកួតនៅជុំទី៣ ដែលជាការប្រកួតចុងក្រោយ។ បន្ទាប់ពីការប្រកួតកាលពីថ្ងៃទី២៦ ខែវិច្ឆិកា កន្លងទៅ បានរកឃើញថា ប៉ូឡូញបានយកឈ្នះលើអារ៉ាប៊ីសាអូឌីត ដោយលទ្ធផល ២-០ រីឯអាហ្សង់ទីន បានយកឈ្នះលើម៉ិកស៊ិក ដោយលទ្ធផល ២-០។ ប៉ូឡូញកាន់កាប់កំពូលតារាងមាន៤ពិន្ទុ អាហ្សង់ទីន និងអារ៉ាប៊ីសាអូឌីតមាន៣ពិន្ទុដូចគ្នា រីឯម៉ិកស៊ិកមានត្រឹម១ពិន្ទុប៉ុណ្ណោះ៕ (ដកស្រង់ចេញពី talkSPORT, SPORTbible និង Yahoo News)
ចែករំលែកព័តមាននេះ