រាជធានីភ្នំពេញ ៖ ចាប់ពីអំឡុងខែមីនា ដល់ខែឧសភា រៀងរាល់ឆ្នាំ អ្នកធ្វើដំណើរតែងឃើញអ្នកលក់ផ្លែគុយតាមរទេះជាហូរហែនៅសងខាងផ្លូវម្ដុំសណ្ឋាគារណាហ្គាវើល ឬក្បែររង្វង់មូលសម្ដេចសង្ឃរាជ ជួន ណាត ។ ឆ្នាំនេះ គេសង្កេតឃើញថា
រាជធានីភ្នំពេញ ៖ ចាប់ពីអំឡុងខែមីនា ដល់ខែឧសភា រៀងរាល់ឆ្នាំ អ្នកធ្វើដំណើរតែងឃើញអ្នកលក់ផ្លែគុយតាមរទេះជាហូរហែនៅសងខាងផ្លូវម្ដុំសណ្ឋាគារណាហ្គាវើល ឬក្បែររង្វង់មូលសម្ដេចសង្ឃរាជ ជួន ណាត ។ ឆ្នាំនេះ គេសង្កេតឃើញថា ផ្លែគុយហាក់ដូចជាសម្បូរជាងឆ្នាំមុនៗ ដែលភាគច្រើនអ្នកលក់បានទិញពីតំបន់វាលរិញតាមរយៈឈ្មួញកណ្ដាល ។
នៅពេលដល់រដូវគុយទុំ ក៏ជាពេលវេលាដែលគេចូលចិត្តទិញញ៉ាំ ព្រោះផ្លែគុយល្អៗមានរសជាតិជូរអែមគួរឲ្យចង់ទទួលទាន ហើយតម្លៃរបស់វាក៏ថ្លៃទៅតាមតម្រូវការទីផ្សារដែរ ប៉ុន្ដែនៅពេលឈានដល់ចុងរដូវ បើទោះបីជាផ្លែគុយមិនសូវសម្បូរ ក៏អ្នកទិញហាក់ដូចជាជិនណាយលែងចាប់អារម្មណ៍ដែរ ។
អ្នកស្រី គង់ ស្រី មានស្រុកកំណើតនៅខេត្តកណ្តាល បានមកលក់ផ្លែឈើនៅម្ដុំសណ្ឋាគារណាហ្គាវើល រៀបរាប់ថា ផ្លែគុយនេះលក់ដាច់តែនៅតំបន់ណាហ្គាវើលប៉ុណ្ណោះ ក្រៅពីនេះលក់មិនដាច់ទេ ដោយសារតែនៅទីនេះមានអ្នកដើរកម្សាន្ដច្រើន ។ អ្នកស្រីបន្តថា ៖ « ខ្ញុំទិញផ្លែគុយទាំងនេះមកពីតំបន់វាលរិញពី៤០ទៅ៥០គីឡូក្រាមក្នុងមួយថ្ងៃកាលពីអំឡុងដើមរដូវ ប៉ុន្ដែឈានដល់ចុងរដូវនេះ ខ្ញុំទិញតែប្រមាណ២០គីឡូក្រាមប៉ុណ្ណោះ ដោយលក់១ថ្ងៃ ខ្ញុំអាចរកចំណូលបានពី៤ឬ៥ម៉ឺនរៀល » ។
ចំណែកអ្នកស្រី ងួន ពិសី លក់ផ្លែឈើតាមរទេះរុញនៅម្ដុំនោះដែរនិយាយថា ក្នុង១ថ្ងៃ អ្នកស្រីទិញផ្លែគុយពីឈ្មួញមកពីតំបន់វាលរិញ ប្រមាណ២០គីឡូក្រាម ដោយក្នុង១គីឡូក្រាម តម្លៃជាង១ម៉ឺនរៀល ។ នៅចុងរដូវនេះ ការលក់មិនសូវដាច់ដូចអំឡុងមុនបុណ្យចូលឆ្នាំខ្មែរទេ ។ ទោះបីយ៉ាងណា ក្នុងមួយថ្ងៃអ្នកស្រីអាចចំណេញបានចន្លោះពី៥ទៅ៧ម៉ឺនរៀលផងដែរ ។
ដោយឡែក លោក ជា វាសនា រស់នៅខេត្តកណ្តាល ដែលបានរកស៊ីលក់ផ្លែឈើនៅតំបន់ណាហ្គាវើលនោះដែរឱ្យដឹងថា កាលពីនៅដើមរដូវក្នុងអំឡុងខែមីនា ក្នុងមួយថ្ងៃលោកអាចលក់បានពី១៨ទៅ២០គីឡូក្រាម ដោយកាលនោះ លោកទិញចូលតម្លៃ១ម៉ឺន២ពាន់រៀលក្នុង១គីឡូក្រាម ឬអាចលើសបន្ដិចបន្ដួច។ ចំណែកសព្វថ្ងៃនេះ តម្លៃផ្លែគុយទិញចូលក្នុង១គីឡូក្រាមថ្លៃជាង១ម៉ឺនរៀល និងលក់ចេញវិញ មួយគីឡូក្រាមថ្លៃ១ម៉ឺន៥ពាន់រៀល ហើយលក់ដាច់តែនៅថ្ងៃសៅរ៍ និងថ្ងៃអាទិត្យប៉ុណ្ណោះ ព្រោះមានអ្នកដើរកម្សាន្តច្រើន ។
លោកបន្ដថា បើទោះបីជាលោកលក់មិនសូវបាន ប៉ុន្តែក្រោយពីការកាត់កងចំណាយរួចរាល់ ក្នុងមួយថ្ងៃអាចរកប្រាក់ចំណេញបានពី៧ទៅដល់១០ម៉ឺនរៀល ហើយបើគិតក្នុង១រដូវលក់ផ្លែគុយនេះ លោកអាចសន្សំប្រាក់បានប្រហែល៧០០ដុល្លារផ្ញើទៅស្រុកផងដែរ ។
ដោយសារតែដើមគុយផ្ដល់ផលប្រយោជន៍ច្រើនដល់ប្រជាពលរដ្ឋរស់នៅតាមតំបន់ភ្នំ កាលពីអំឡុងខែសីហា ឆ្នាំ២០១៦ កន្លងទៅ នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា ក៏បានរៀបចំផែនការដាំដើមគុយនេះក្នុងព្រៃស្ថិតនៅតំបន់រមណីយដ្ឋានអង្គរផងដែរ ដើម្បីរក្សាការពារព្រៃឈើ និងផ្ដល់ផលប្រយោជន៍ដល់ប្រជាជនរស់នៅតំបន់នោះអាចអាស្រ័យផលបាន និងរកចំណូលជួយទ្រទ្រង់សេដ្ឋកិច្ចគ្រួសារ ៕
ចែករំលែកព័តមាននេះ