ខេត្តកំពត + កែប ៖ រយៈពេលពីរថ្ងៃចាប់ពីថ្ងៃទី១៧ដល់ថ្ងៃទី១៨ ខែឧសភា ឆ្នាំ២០១៧ នេះ មន្ត្រីសាខាកាំកុងត្រូល សាខាកំពតកែបដឹកនាំដោយលោក ទា សារី អនុប្រធានសាខានៅព្រឹកថ្ងៃទី១៧-១៨ ខែឧសភា ឆ្នាំ២០១៧ នេះ បានសហការជាមន្ត្រីមន្ទីរពាណិជ្ជកម្មនៃខេត្តទាំងពីរបានចុះត្រួតពិនិត្យចំណីអាហារគ្រឿងកំប៉ុង និងទឹកភេសជ្ជៈជាដបជ័រ និងកំប៉ុងគ្រប់មុខដែលហួសកាលបរិច្ឆេទ និងខូចគុណភាពដូចជាកំពឹតជាដើមដែលដាក់តាំងលក់នៅតាមដេប៉ូធំៗ និងនៅតាមតូបក្នុងផ្សារទាំងពីរគឺផ្សារពងទឹក ស្រុកដំណាក់ចង្អើរ ខេត្តកែប និងផ្សារកំពង់ត្រាច ស្រុកកំពង់ត្រាច ខេត្តកំពត ។
លោក ទា សារី អនុប្រធានសាខាកាំកុងត្រូលកំពត កែប បានឲ្យអ្នកព័ត៌មានយើងដឹងថា ការចុះត្រួតពិនិត្យទំនិញខូចគុណភាព និងហួសកាលបរិច្ឆេទជាចំណីអាហារ និងជាគ្រឿងភេសជ្ជៈគ្រប់មុខ និងសម្ភារៈប្រើប្រាស់មានថ្នាំដុសធ្មេញជាដើម ដែលជាដបជ័រ និងជាកំប៉ុងដែលដាក់តាំងលក់នៅតាមដេប៉ូមួយចំនួននៅក្នុងផ្សារពងទឹក ស្ថិតក្នុងភូមិពងទឹក ឃុំពងទឹក ស្រុកដំណាក់ចង្អើរ ខេត្តកែប និងតូបតាមផ្ទះមួយចំនួនស្ថិតក្នុងផ្សារទីរួមស្រុកកំពង់ត្រាច ខេត្តកំពត ។ លោកបានឲ្យដឹងទៀតថា ក្នុងការចុះអនុវត្តន៍ត្រួតពិនិត្យទំនិញខូចគុណភាព និងហួសកាលបរិច្ឆេទខាងលើ មន្ត្រីជំនាញយើងបានចុះរយៈពេលពីរថ្ងៃគឺជំហ៊ានទី១ នៅថ្ងៃទី១៧ ខែឧសភា ឆ្នាំ២០១៧ មន្ត្រីយើងចុះពិនិត្យនៅផ្សារពងទឹក ស្រុកដំណាក់ចង្អើរ ខេត្តកែប ។ លោកបន្តទៀតថា ការចុះពិនិត្យជំហានទី១ នៅខេត្តកែបនេះ យើងរកឃើញទំនិញហួសកាលបរិច្ឆេទ និងខូចគុណភាពមួយចំនួនដូចខាងក្រោម ៖ ថ្នាំដុសធ្មេញCloseup ទម្ងន់ ១៦០ក្រាម ចំនួន១១ប្រអប់(ហួសកាលបរិច្ឆេទ) ថ្នាំដុសធ្មេញម៉ាក Cogete ៤០ក្រាម ចំនួន២៤ ប្រអប់តូច(ហួសកាលបរិច្ឆេទ) តែ Icetea មួយប្រអប់(ហួសកាលបរិច្ឆេទ) ទឹកដោះគោខាប់១កំប៉ុង (កំពឹត) កាហ្វេ៣កញ្ចប់(ហួសកាលបរិច្ឆេទ) ភេសជ្ជៈចំរុះទម្ងន់ ៣៩០ក្រាម ចំនួន២៧ដប(ហួសកាលបរិច្ឆេទ) ស្រាបៀរក្រោន និងកម្ពុជា១០កំប៉ុងខូចគុណភាព(កំពឹត) ។ លោក ទា សារី អនុប្រធានសាខាបានឲ្យដឹងបន្តទៀតថា នៅថ្ងៃទី១៨ ខែឧសភា ឆ្នាំ២០១៧ កម្លាំងយើងចុះពិនិត្យផ្សារកំពង់ត្រាច ក្នុងស្រុកកំពង់ត្រាច ខេត្តកំពត ។ ជាលទ្ធផលយើងបានរកឃើញទំនិញខូចគុណភាព និងហួសកាលបរិច្ឆេទហើយបានដកហូតដូចខាងក្រោម ៖ កាហ្វេចំនួន២កំប៉ុង ចំណុះ១៨០ml(កំពិត) ទឹកផ្លែសាវម៉ាវ ចំនួន១កំប៉ុង ទម្ងន់៥៦៥ក្រាម( កំពិត) ទឹកក្រូច Fanta ចំនួន១កំប៉ុង ចំណុះ៣៣០ml(កំពិត) Sprit ចំនួន៩កំប៉ុង ចំណុះ៣៩០ml(ហួសកាលបរិច្ឆេទ) ទឹកក្រូច Fanta ចំនួន១៨ដប ចំណុះ១២៥២ml(ហួសកាលបរិច្ឆេទ) និងទឹកដោះគោស្រស់ចំនួន៥កំប៉ុងក្រដាស ចំណុះ២០០ml(ហួសកាលបរិច្ឆេទ) ។ លោកបានបន្តទៀតថា រាល់មុខទំនិញទាំងអស់ខាងលើជាភេសជ្ជៈចំណីអាហារ ជាសម្ភារៈប្រើប្រាស់ ដែលមន្ត្រីកាំកុងត្រូលយើងពិនិត្យឃើញថាហួសកាលបរិច្ឆេទ និងខូចគុណភាពខាងលើ មន្ត្រីយើងបានធ្វើកំណត់ហេតុដកហូតយកកាន់សាខា ដើម្បីធ្វើពិធីដុតកំទេចចោលនាពេលខាងមុខ ។
លោកអនុប្រធានសាខាកាំកុងត្រូលក៏បានធ្វើការណែនាំ និងក្រើនរំលឹកដល់បងប្អូនអាជីវករដែលទទួលរាល់មុខទំនិញទាំងអស់ដែលមកដាក់តាំងលក់ជូនប្រជាពលរដ្ឋយើង សូមធ្វើយ៉ាងណាបងប្អូនត្រូវពិនិត្យនូវខែឆ្នាំផលិត និងកាលបរិច្ឆេទនៃការប្រើប្រាស់ ដើម្បីជៀសវាងការដាក់តាំងលក់ទំនិញខុសច្បាប់(ខូចគុណ និងហួសកាលបរិច្ឆេទ) ដែលជាហេតុធ្វើឲ្យប៉ះពាល់សុខភាពប្រជាពលរដ្ឋទូទៅ ឬអាចប៉ះពាល់ធ្ងន់ធ្ងរដល់អាយុជីវិតក៏មាន ដូច្នេះបងប្អូនអាជីវករទាំងអស់ត្រូវតែបង្កើន ការប្រុងប្រយ័ត្នលើបញ្ហានេះទាំងអស់គ្នា ។ លោកបានបញ្ជាក់ថា បើទំនិញណាខូចគុណភាព ឬហួសកាលបរិច្ឆេទ ត្រូវប្រមូលចេញពីកន្លែងធ្លាប់ដាក់តាំងលក់ជាបន្ទាន់ដើម្បីការពារការបន្លំលក់ទំនិញដែលហួស ឬខូចគុណភាពខាងលើ ៕
ចែករំលែកព័តមាននេះ