រាជធានីភ្នំពេញ ៖ ក្រសួងកសិកម្ម រុក្ខាប្រមាញ់ និងនេសាទ បានដាក់ចេញនូវយន្តការចំនួន៣ចំណុចដើម្បីពិនិត្យលើបញ្ហាតម្លៃ ការនាំចូលជ្រូកពីប្រទេសជិតខាង និងលើកកម្ពស់តម្លៃជ្រូកក្នុងស្រុក ។
រាជធានីភ្នំពេញ ៖ ក្រសួងកសិកម្ម រុក្ខាប្រមាញ់ និងនេសាទ បានដាក់ចេញនូវយន្តការចំនួន៣ចំណុចដើម្បីពិនិត្យលើបញ្ហាតម្លៃ ការនាំចូលជ្រូកពីប្រទេសជិតខាង និងលើកកម្ពស់តម្លៃជ្រូកក្នុងស្រុក ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងតាមទូរស័ព្ទបន្ទាប់ពីបើកកិច្ចប្រជុំសមាជិកជាមួយសភាពាណិជ្ជកម្ម និងក្រុមការងារវិស័យឯកជនផ្នែកកសិកម្ម និងកសិឧស្សាហកម្ម នាព្រឹកថ្ងៃទី១៦ ឧសភាថា កន្លងមក អ្នកចិញ្ចឹមជ្រូកក្នុងស្រុកតែងតែលើកឡើងពីការមិនចំណេញប្រាក់ ដោយសារប្រកួតប្រជែងជាមួយអ្នកនាំចូលមិនបាន ។ ហេតុនេះ ទើបយើងពិភាក្សាធ្វើយ៉ាងណា ឲ្យអ្នកចិញ្ចឹមក្នុងស្រុកអាចរស់បាន ។
លោកបន្តថា តាមរយៈកិច្ចប្រជុំនេះ ភាគីពាក់ព័ន្ធបានឯកភាពដាក់ចេញនូវយន្តការចំនួន៣ចំណុចដូចខាងក្រោម ៖
១-ភាគីក្រសួង និងវិស័យឯកជនបានឯកភាពអនុវត្តតាមគោលការណ៍របស់ក្រសួង លើការគ្រប់គ្រងការនាំចូលជ្រូកពីប្រទេសជិតខាង ។
២-រៀបចំយន្តការគ្រប់គ្រងតម្លៃ ដែលតម្លៃសាច់ជ្រូកមានអតិផរណាលើទីផ្សារ ខណៈការទិញជ្រូកពីអ្នកចិញ្ចឹមមានតម្លៃទាប តែការលក់លើទីផ្សារមានតម្លៃខ្ពស់ ដែលបញ្ហានេះក្រសួងសេដ្ឋកិច្ចត្រូវកោះប្រជុំទាក់ទងនឹងការងារនេះ ដើម្បីរកឲ្យឃើញថា តើភាគីណាមួយជាអ្នកកកូរកកាយតម្លៃ ។
៣-វិស័យឯកជនចង់សហការជាមួយក្រសួងតាមរយៈការផ្តល់ព័ត៌មានលើការនាំចូល ការចិញ្ចឹមជ្រូកសិប្បនិម្មិតខុសច្បាប់ ដើម្បីធ្វើយ៉ាងណាឲ្យមានតម្លាភាពលើការនាំចូល ។
លោករដ្ឋមន្ត្រីបន្តថា ៖ « វិស័យឯកជនចង់ឲ្យកាត់បន្ថយការនាំចូលជ្រូកពីប្រទេសជិតខាងជាអតិបរិមា ប៉ុន្តែខ្ញុំបានជំរុញឲ្យអ្នកពាក់ព័ន្ធធ្វើការងារជាមួយអគ្គនាយកដ្ឋានផលិតកម្ម និងបសុសត្វ ដើម្បីឲ្យប្រាកដថា អ្នកនៅក្នុងស្រុកអាចមានលទ្ធភាពគ្រប់គ្រាន់ក្នុងការផ្គត់ផ្គង់សាច់ជ្រូកលើទីផ្សារ » ។
តាមការសិក្សារបស់ក្រសួងកសិកម្មរកឃើញថា កម្ពុជាត្រូវការជ្រូកចំនួន១.២៥០ក្បាលក្នុងមួយថ្ងៃ ក្នុងនោះ៤០ទៅ៥០% ជាជ្រូកនាំចូលពីប្រទេសជិតខាង ។
លោក វេង សាខុន បន្តថា ៖ « ការងារទប់ស្កាត់ការនាំជ្រូកចូល ក្រសួងមិនអាចធ្វើតែម្នាក់ឯងទេ ទាក់ទងនឹងយន្តការត្រួតពិនិត្យបច្ចេកទេស និងភូតគាមអនាម័យ គឺទាមទារឲ្យអាជ្ញាធរ ពិសេសអភិបាលខេត្តនីមួយៗដែលជាប់ព្រំដែនចូលរួមសហការ » ។ លោកបន្តថា ៖ « អ្វីសំខាន់បន្ថែមទៀត គឺខាងគយ និងរដ្ឋាករត្រូវរឹតបន្តឹងការនាំចូល និងប្រមូលពន្ធឲ្យអស់ » ។
ក្រសួងកសិកម្ម ក៏គ្រោងបង្កើតក្រុមការងារបច្ចេកទេសពិនិត្យលើការនាំចូលជ្រូកតាំងពីដើមទី ពាក់កណ្តាលទី និងចុងទី ដើម្បីធ្វើឲ្យប្រាកដថា សាច់ជ្រូកនាំចូលគ្មានបញ្ហាអ្វីប៉ះពាល់ដល់សុខភាពអ្នកបរិភោគ ។
លោកឧកញ៉ា ម៉ុង ឫទ្ធី សហប្រធានក្រុមការងារកសិកម្ម និងកសិ-ឧស្សាហកម្មផ្នែកឯកជន និងជាអ្នកមានកសិដ្ឋានចិញ្ចឹមជ្រូកធំមួយនៅតំបន់កែវផុស លើកឡើងថា ក្រោយពីបញ្ចប់កិច្ចប្រជុំ សភាពការណ៍បានធូរស្រាល៦០% ព្រោះពីមុនមកអ្នកចិញ្ចឹមជ្រូកក្នុងស្រុក និងអ្នកនាំចូល តែងតែចោទគ្នាទៅវិញទៅមក ប៉ុន្តែកិច្ចប្រជុំសុំឲ្យធ្វើយ៉ាងណា កុំឲ្យមានលើសកូតាដែលបានកំណត់ ហើយសូមខាងគយយកពន្ធតាមការកំណត់របស់ច្បាប់ ។
លោកឧកញ៉ាបន្តថា ៖ « យើងជិះទូកជាមួយគ្នា បើលិចគឺលិចទាំងអស់គ្នា បើអណ្តែតគឺអណ្តែតទាំងអស់គ្នាហើយ ។ ដូច្នេះ យើងនឹងដោះស្រាយបញ្ហានៅសល់៤០%ទៀត » ។ លោកបន្តថា ៖ « បច្ចុប្បន្ន តម្លៃជ្រូករបស់អ្នកចិញ្ចឹមបានចុះថ្លៃ ប៉ុន្តែសាច់ជ្រូកលក់លើទៅផ្សារនៅតែថ្លៃ ។ នេះជាបញ្ហានៅសល់៤០% ដែលវាត្រូវការពេលវេលាបន្ថែមទៀត » ។
លោកឧកញ៉ា ម៉ុង ឫទ្ធី បន្ថែមថា ផ្នែកបច្ចេកទេសក្រសួងកសិកម្ម នឹងកោះប្រជុំរវាងកុងស៊ី ឈ្មួញកាប់ជ្រូក និងអ្នកចែកចាយសាច់ជ្រូកលើទីផ្សារដើម្បីរកមូលហេតុដែលជ្រូកចិញ្ចឹមចុះថ្លៃ ប៉ុន្តែសាច់ជ្រូកនៅតែថ្លៃ ។ វានឹងធ្វើឲ្យប៉ះពាល់ដល់អ្នកបរិភោគ ហេតុនេះ ការដោះស្រាយបញ្ហានឹងធ្វើជាបន្តបន្ទាប់ ៕
ចែករំលែកព័តមាននេះ