រាជធានីភ្នំពេញ ៖ ស្ត្រីម្នាក់បានស្រែកយំរហូតលែងខ្មាសអៀននរណាទាំងអស់ ខណៈមកកាន់ប៉ុស្ដិ៍នគរបាលសង្កាត់កាកាប ប្ដឹងសុំឲ្យនគរបាលជួយអន្តរាគមន៍ ដោយនិយាយថា គាត់និងប្ដីរៀបការជា២០ឆ្នាំមកហើយថែមទាំងមានកូន៤នាក់ ។ ប៉ុន្តែទីបំផុត ប្ដីកំហូចលួចទៅមានស្រីនៅខាងក្រៅ និងបានបំផ្លិចបំផ្លាញទ្រព្យសម្បត្តិនៅក្នុងផ្ទះ ដូចជាយកម៉ូតូទៅលក់អស់ជាច្រើនគ្រឿង លួចលុយគាត់ និងលួចអន្ទង់ដែលគាត់ដាក់លក់នៅផ្សារទៅលក់យកលុយដើរស៊ីចាយ ព្រមទាំងរករឿងវាយបំផ្លាញទ្រព្យសម្បត្តិនៅផ្ទះខ្ទេចខ្ទីថែមទៀតផង ។ ដោយសារអត់ទ្រាំនឹងទង្វើនោះលែងបាន ទើបគាត់សម្រេចចិត្តប្តឹងឲ្យនគរបាលជួយ ។
ស្ត្រីរូបនេះ បានធ្វើដំណើរទៅកាន់ប៉ុស្ដិ៍កាកាប ខណ្ឌពោធិ៍សែនជ័យ ដើម្បីឲ្យនគរបាល ជួយ កាលពីវេលាម៉ោង១និង៤០នាទីរសៀល ថ្ងៃទី១៧ ខែឧសភា ។ នាងឈ្មោះ មាស វិជ្ជរី អាយុ៣៦ឆ្នាំ មុខរបរលក់អន្ទង់នៅផ្សារស៊ិនជូរីផ្លាហ្សា ។ ចំណែកឯបុរសជាប្ដីឈ្មោះ អឿន គន្ធា អាយុ៣៦ឆ្នាំដូចគ្នា អតីតជាមន្ត្រីកងរាជអាវុធហត្ថ ប៉ុន្តែនាងបានឲ្យឈប់ធ្វើការតាំងពីពេលរៀបការបាន៥ទៅ៦ឆ្នាំម្ល៉េះ សព្វថ្ងៃរស់នៅក្នុងភូមិត្រពាំល្វា សង្កាត់កាកាប ខណ្ឌពោធិ៍សែនជ័យ ។
ប្រភពដដែលបន្តថា ក្រោយពេលរៀបការហើយ ប្ដីបានពួតដៃគ្នារកស៊ីយ៉ាងសស្រាក់ សស្រាំមិនដែលមានបញ្ហាអ្វីទេ ប៉ុន្តែទើបតែរយៈពេល២ទៅ៣ឆ្នាំចុងក្រោយនេះដែលប្ដីនាងបែកគំនិតខិលខូចលួចទៅមានស្រីថ្មីក្បត់ចិត្តនាង ។ មិនតែប៉ុណ្ណោះ ស្រីថ្មីនោះមិនមែនជាស្ត្រីមេម៉ាយ ឬក្រមុំទេ គឺជាប្រពន្ធគេដែលមានប្ដីជាមន្ត្រីនគរបាល ហើយស្ត្រីនោះមានមុខរបរជាអ្នកលក់មាន់នៅផ្សារអូរឫស្សី ។ ក្រោយមកប្ដីរបស់ស្ត្រីនោះដឹងរឿង ហើយហាមឃាត់ប្រពន្ធរបស់ខ្លួនមិនស្ដាប់ ក៏លែងលះប្រពន្ធចោលទៀតផង ។ ចំណែកប្ដីនាង នៅតែទាក់ទងជាមួយស្ត្រីនោះរាល់ថ្ងៃ និងបាននាំគ្នាស្នាក់នៅផ្ទះជួលផងដែរ ។
ស្ត្រីខាងលើរៀបរាប់ទៀតថា ក្រោយពេលមានស្រីថ្មី ប្ដីគាត់តែងតែធ្វើបាបគាត់គ្មានល្ហែឡើយ ថ្ងៃណាក៏រករឿងឈ្លោះទាស់ដែរ។ មិនតែប៉ុណ្ណោះ បានយកម៉ូតូទៅលក់អស់ជាច្រើនគ្រឿង និងយកលុយពីផ្ទះទៅចាយ និងឲ្យស្រីស្នេហ៍ដោយមិនដែលជួយរកស៊ីអ្វីទេ ។ មិនតែប៉ុណ្ណោះនៅពេលគ្មានលុយ បានលួចយកអន្ទង់ម្ដង១០គីឡូក្រាមទៅលក់យកលុយទៀតផង ។ ជាងនេះទៀត ពេលឈ្លោះទាស់ជាមួយនាង តែងតែវាយបំផ្លាញទ្រព្យសម្បត្តិនៅក្នុងផ្ទះខ្ទេចខ្ទីអស់ ។
ដោយឡែកនៅរសៀលថ្ងៃទី១៧ ខែឧសភា ប្តីនាងបានវាយបំផ្លាញអីវា៉ន់នៅក្នុងផ្ទះ ហាក់បីដូចជាមនុស្សកំរោលចូល ដែលទង្វើបែបនេះធ្វើឲ្យនាងជាប្រពន្ធទ្រាំលែងបានតទៀតហើយ ទើបធ្វើដំណើរទៅប្ដឹងនគរបាលឲ្យជួយ ។ ប៉ុន្តែខណៈនោះ នគរបាលបានឲ្យនាងទៅប្ដឹងលោកមេភូមិ សុំឲ្យលោកមេភូមិត្រពាំងល្វា ជួយហៅប្ដីទៅធ្វើការអប់រំ ហើយនគរបាលក៏បានឲ្យលេខទូរស័ព្ទសម្រាប់ទាក់ទងពេលណាមានការប្រើហិង្សាពីសំណាក់ប្ដីផងដែរ ។
ទោះបីជាបែបណា មិនអាចស្វែងរកការបំភ្លឺពីលោក អឿន គន្ធា ដែលត្រូវប្រពន្ធចោទបានទេ ។
ចែករំលែកព័តមាននេះ