ពិធីប្រគល់ពានព្រះនាងឥន្ទ្រទេវី ឆ្នាំ២០២២ បានធ្វើឡើងកាលពីថ្ងៃទី២៥ ខែវិច្ឆិកា ឆ្នាំ២០២២ នៅទីស្តីការក្រសួងវប្បធម៌ និងវិចិត្រសិល្បៈ។ ទាំងផ្នែកកំណាព្យរឿង និងរឿងខ្លី មានជ័យលាភីចំនួន១០នាក់ ខណៈពិធីនេះ ក្រោមអធិបតីភាពលោកជំទាវ នេត្រ ភូម៉ារី
រាជធានីភ្នំពេញ ៖ ពិធីប្រគល់ពានព្រះនាងឥន្ទ្រទេវី ឆ្នាំ២០២២ បានធ្វើឡើងកាលពីថ្ងៃទី២៥ ខែវិច្ឆិកា ឆ្នាំ២០២២ នៅទីស្តីការក្រសួងវប្បធម៌ និងវិចិត្រសិល្បៈ។ ទាំងផ្នែកកំណាព្យរឿង និងរឿងខ្លី មានជ័យលាភីចំនួន១០នាក់ ខណៈពិធីនេះ ក្រោមអធិបតីភាពលោកជំទាវ នេត្រ ភូម៉ារី រដ្ឋលេខាធិការ តំណាងលោកជំទាវបណ្ឌិត សភាចារ្យរដ្ឋមន្ត្រីក្រសួងវប្បធម៌ និងវិចិត្រសិល្បៈ។
តើអ្នកនិពន្ធណាខ្លះបានទទួលជ័យលាភី?
ផ្នែកកំណាព្យរឿងជ័យលាភីលេខ១ បានទៅរឿង «គុណការងារ» និពន្ធដោយលោក ភិរម្យ ដារ៉ា (ខេត្តស្ទឹងត្រែង)។ ជ័យលាភីលេខ២ រឿង «អ្នកគ្រូជាយដែន» និពន្ធដោយលោក មឿន សំណាង មកពីខេត្តឧត្តរមានជ័យ។ ជ័យលាភីលេខ៣ រឿង «មេស្រុក» និពន្ធដោយលោកជួន ខ្មៅ មកពីខេត្តព្រះសីហនុ។ ជ័យលាភីលេខ៤ រឿង «ព្យុះជីវិតនាងរស្មី» និពន្ធដោយលោក ចំរើន សុភ័ក្ត្រ មកពីខេត្តកំពត។ ជ័យលាភី៥ រឿង «សន្សើមសន្តិភាព» និពន្ធដោយលោក សាម សុនិត មកពីខេត្តកំពង់ចាម។
ផ្នែកប្រលោមលោកខ្នាតខ្លី ៖ ជ័យលាភីលេខ១ រឿង «បណ្តឹងសហគមន៍» ដោយលោក ហ៊ុយ សារ៉ាត់ មកពីខេត្តពោធិ៍សាត់។ ជ័យលាភីលេខ២ រឿង«សំនៀងបិឡានី» ដោយលោក សុវណ្ណ សិរីវុឌ្ឍ រស់នៅរាជធានីភ្នំពេញ។ ជ័យលាភីលេខ៣ រឿង «ថ្ងៃរះហើយពុក» ដោយលោក ពៅ មករា មកពីរាជធានីភ្នំពេញ។ ជ័យលាភីលេខ៤ រឿង «បាសាក់» ដោយលោក តុន ច័ន្ទរិទ្ធិ មកពីខេត្តបាត់ដំបង។ ជ័យលាភីលេខ៥ រឿង «ក្រាំងតាត្រៅ» ដោយលោក សៀង ឈុនលី មកពីខេត្តកំពង់ស្ពឺ។
លោកជំទាវ នេត្រ ភូម៉ារី បានថ្លែងថា «តាមរយៈរបាយការណ៍លោកប្រធាននាយកដ្ឋានសៀវភៅ និងការអាន យើងសង្កេតឃើញថា វិស័យតែងនិពន្ធនៅតែមានសន្ទុះឈានឡើងគួរឱ្យចាប់អារម្មណ៍។ បើតាមតួលេខឆ្នាំ២០២២ មានបេក្ខជនដាក់ស្នាដៃប្រកួតប្រជែងចំនួន១០៤ស្នាដៃ ក្នុងនោះប្រលោមលោកខ្នាតខ្លីមាន៧៦ស្នាដៃ និងកំណាព្យរឿង២៨ស្នាដៃ។ ជាលទ្ធផលនេះ បង្ហាញឱ្យឃើញថា ការបង្កើតស្នាដៃតែងនិពន្ធប្រលោមលោក និងកំណាព្យរឿងដែលជាវណ្ណកម្មមួយយ៉ាងសំខាន់ នៃអក្សរសាស្ត្រជាតិ ទទួលបាននូវការចូលរួមចំណែកយ៉ាងសកម្មពីកវីនិពន្ធរៀមច្បង និងអ្នកនិពន្ធជាយុវជនជំនាន់ក្រោយ។
លោកជំទាវបន្តថា ពីមួយឆ្នាំទៅមួយឆ្នាំ ក្រសួងទទួលបាននូវធនធានមនុស្សថ្មីក្នុងវិស័យតែងនិពន្ធជាបន្តបន្ទាប់។ ថ្វីដ្បិតអ្វីដែលជាសមិទ្ធផលទាំងនេះ នៅក្មេងខ្ចីមិនទាន់បានដូចសេចក្ដីប៉ងប្រាថ្នាក៏ពិតមែន ប៉ុន្តែវាជាសកម្មភាពមួយប្រកបដោយអត្ថប្រយោជន៍ដ៏ធំធេង និងជាវិភាគទានដ៏មានតម្លៃក្នុងការជួយបណ្ដុះបណ្ដាល លើកទឹកចិត្តដល់យុវជនយើងឱ្យស្រឡាញ់ចូលចិត្តការអាន ការសរសេរ ការតាក់តែងនិពន្ធ និងការបោះពុម្ពសៀវភៅ ដែលនៅក្នុងនោះបង្កប់ទៅដោយការអប់រំពី តម្លៃសីលធម៌ អត្តសញ្ញាណជាតិ និងនវានុវត្តន៍នៃសាកលភាវបនីយកម្មពិភពលោក» ។
បើតាមលោក កុក រស់ ប្រធាននាយកដ្ឋានសៀវភៅ និងការអាន នៃក្រសួងវប្បធម៌ និងវិចិត្រសិល្បៈថា លទ្ធផលជារួមដែលគណៈកម្មការបានដាក់ពិន្ទុ និងវាយតម្លៃ គឺសាច់រឿងមានការដាក់ជាបញ្ហាចោទ ការប្រើប្រាស់ពាក្យពេចន៍ និងប្រយោគប្រទាក់គ្នាបានល្អ ព្រមទាំងបានអប់រំមនុស្សឱ្យស្គាល់ពីតម្លៃរបស់ខ្លួន ចេះជួយគ្នា បំបាត់ការរើសអើងក្នុងសង្គម ដែលទាំងនេះបង្ហាញពីការអប់រំដល់សង្គម។
ទោះបីជាបែបណាក្តី ក៏មានអ្នកនិពន្ធមួយចំនួន នៅមិនទាន់យល់ច្បាស់ពីអត្ថន័យ អត្ថរស អត្ថរូប និងខ្លឹមសារនៃការបង្កើតស្នាដៃរបស់ខ្លួននៅឡើយទេ៕
ចែករំលែកព័តមាននេះ