ប្រធានាធិបតីចិន Xi Jinping បានប្រាប់មេដឹកនាំកូរ៉េខាងជើង Kim Jong-un ថាទីក្រុងប៉េកាំងមានឆន្ទៈក្នុងការធ្វើការជាមួយទីក្រុងព្យុងយ៉ាងដើម្បីសន្តិភាពពិភពលោក។ នេះបើយោងតាមការចុះផ្សាយរបស់សារព័ត៌មានរដ្ឋកូរ៉េខាងជើង KCNA នៅថ្ងៃសៅរ៍…
ប្រធានាធិបតីចិន Xi Jinping បានប្រាប់មេដឹកនាំកូរ៉េខាងជើង Kim Jong-un ថាទីក្រុងប៉េកាំងមានឆន្ទៈក្នុងការធ្វើការជាមួយទីក្រុងព្យុងយ៉ាងដើម្បីសន្តិភាពពិភពលោក។ នេះបើយោងតាមការចុះផ្សាយរបស់សារព័ត៌មានរដ្ឋកូរ៉េខាងជើង KCNA នៅថ្ងៃសៅរ៍ ទី ២៦ វិច្ឆការនេះ។
សារពីមេដឹកនាំចិនកើតឡើងតែប៉ុន្មានថ្ងៃប៉ុណ្ណោះ បន្ទាប់ពីកូរ៉េខាងជើងបានបា.ញ់មីស៊ីលបាលីស្ទីកអន្តរទ្វីប ដោយរបបផ្តាច់ការនេះប្រកាសថាខ្លួននឹងប្រើនុយក្លេអែររបស់ខ្លួនដើម្បីឆ្លើយតបនឹងការគំរា.មកំហែងរបស់នុយក្លេអ៊ែរអាមេរិក។
នៅក្នុងសារទៅកាន់មេដឹកនាំកូរ៉េខាងជើង លោក Xi Jinping និយាយថា ទីក្រុងប៉េកាំងបានត្រៀមខ្លួនជាស្រេចដើម្បីធ្វើការជាមួយកូរ៉េខាងជើងដើម្បី “សន្តិភាព ស្ថិរភាព ការអភិវឌ្ឍន៍ និងវិបុលភាពនៃតំបន់ និងពិភពលោក”។
ប្រធានាធិបតីចិននិយាយទៀតថា លោកមានឆន្ទៈក្នុងការសហការជាមួយទីក្រុងព្យុងយ៉ាង ខណៈដែល «ការផ្លាស់ប្តូរក្នុងពិភពលោក ពេលវេលា និងប្រវត្តិសាស្ត្រកំពុងកើតឡើងតាមរបៀបដែលមិនធ្លាប់មានពីមុនមក»។
សូមបញ្ជាក់ថា ប៉ុន្មានថ្ងៃមុនពេលមានការបា.ញ់មីស៊ីលអន្តរទ្វីបពីកូរ៉េខាងជើង លោក Xi Jinping បានជួបគ្នាជាមួយប្រធានាធិបតីអាមេរិក Joe Biden នៅក្រៅកិច្ចប្រជុំកំពូល G20 នៅកោះ Bali ប្រទេសឥណ្ឌូនេស។ លោក Joe Biden សម្តែងការជឿជាក់ថា ទីក្រុងប៉េកាំងមិនចង់ឃើញការបង្កហេតុបន្ថែមទៀតពីសំណាក់ទីក្រុងព្យុងយ៉ាងនោះទេ។
ទីក្រុងវ៉ាស៊ីនតោននិយាយថា ខ្លួនចង់ឱ្យចិនប្រើប្រាស់ឥទ្ធិពលរបស់ខ្លួនដើម្បីជួយគ្រប់គ្រងកូរ៉េខាងជើង។ ចិនជាសម្ព័ន្ធដ៏សំខាន់បំផុតមួយរបស់កូរ៉េខាងជើង៕ (យោងតាមប្រភព៖ AFP)
ចែករំលែកព័តមាននេះ