ខេត្តកែប ៖ កាលពីព្រឹកថ្ងៃទី២៦ សីហា នៅសាលាក្រុងកែប មានរៀបចំរបាយការណ៍ស្តីពីកិច្ចប្រជុំបូកសរុបឆមាសទី១ សំរាប់៦ខែ ដើមឆ្នាំ២០១០ និងលើកទិសដៅឆមាសទី២ ដោយមានការអញ្ជើញចូលរួមជាគណៈអធិបតីពីសំណាក់លោកហាស់ សារ៉េត អភិបាលខេត្តកែប និងលោកស្រីព្រំ ចំរើន អភិបាលរងខេត្ត និងមន្ត្រីរាជការ កងកំលាំងប្រដាប់អាវុធគ្រប់ស្ថាប័ន ។ លោកងិន ងិនដា អភិបាលក្រុងកែប បានមានប្រសាសន៍ថា ក្រុងកែបមានសង្កាត់ចំនួន២ គឺសង្កាត់កែប និងសង្កាត់ព្រៃធំ ប្រជាពលរដ្ឋភាគច្រើនប្រកបរបរនេសាទ ។ នៅក្នុងពិធីប្រជុំថ្ងៃនេះដែរ មានតំណាងអង្គការផ្សេងៗ សហគមន៍មួយចំនួនចូលរួម៧៥នាក់ ដើម្បីស្តាប់លទ្ធផលនិងពិភាក្សាអំពីទិសដៅការងារទៅថ្ងៃមុខ ។
លោកអភិបាលក្រុងកែបថ្លែងថា បញ្ហាសកម្មភាពចោរលួចចោរប្លន់ គឺមិនមានកើតឡើងនោះទេ ឬកើតមានតិចតួចបំផុត ។ បើនិយាយពីវិស័យទេសចរណ៍វិញ ភ្ញៀវជាតិ និងអន្តរជាតិមានកំណើនខ្ពស់ជាងឆ្នាំ២០០៩ ដោយឡែកផ្ទះសំណាក់ និងសណ្ឋាគារមានចំនួន២៨ និងកោះចំនួន១៣សំរាប់បំរើសេវាដល់ភ្ញៀវទេសចរដែលទៅកំសាន្ត និងស្នាក់អាស្រ័យនៅក្នុងខេត្តនេះ ហើយកោះចំនួន១៣ភ្ញៀវទេសចរអាចជិះទូកទៅលេងបានគ្រប់កោះ ។
លោក ហាស់ សារ៉េត អភិបាលខេត្តកែប បានមានប្រសាសន៍ថា ខេត្តកែបជាខេត្តតូចមែន ប៉ុន្តែខេត្តនេះមានឈ្មោះបោះសំលេងតាំងពីជំនាន់ដើម ហើយការអភិវឌ្ឍន៍រយៈពេលប៉ុន្មានឆ្នាំចុងក្រោយនេះ ក្រុងកែបមានការរីកចំរើនលើគ្រប់វិស័យតាមយុទ្ធសាស្ត្រចតុកោណដំណាក់ កាលទី២ របស់រាជរដ្ឋាភិបាល និងតាមការដឹកនាំដ៏ឈ្លៀសវៃរបស់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ឆ្នាំ២០០៩ ភ្ញៀវជាតិ និងអន្តរជាតិបានមកកំសាន្តនៅខេត្តកែបមានចំនួន៣៥ម៉ឺននាក់ ហើយជាការឆ្លើយតប យើងបានជំរុញឱ្យមន្ត្រីរាជការនៅតាមមូលដ្ឋានរហូតដល់ស្រុក-ខេត្ត ចូលរួមចលនាប្រជាពលរដ្ឋឱ្យដាំដើមឈើលំអនៅតាមដងផ្លូវនិងនៅតាម កន្លែងផ្សេងៗដែលអាចលើកសោភ័ណភាពក្រុង និងខេត្ត ព្រោះភ្ញៀវទេសចរកាលណាគេមមកលេងនៅខេត្តកែប តែងតែមើលគ្រប់ទិសទី បើមើលទៅឃើញកខ្វក់កន្លែងណាមួយ ក៏គេមិនចាត់ទុកថា ជាទីក្រុងស្អាតដែរ ។ លោកអភិបាលខេត្តបញ្ជាក់ថា យើងតម្រូវឱ្យមន្ត្រីរាជការប្រឹងយ៉ាងណាឱ្យក្រុងកែបក្លាយជាទី ក្រុងធម្មជាតិ និងមានតំបន់វប្បធម៌ខ្លះៗ ទើបភ្ញៀវមកលេងកាន់តែច្រើន ហើយពលរដ្ឋអ្នកលក់ដូរកាន់តែមានជីវភាពធូរធារ ៕
ចែករំលែកព័តមាននេះ