ជនសង្ស័យ២នាក់បានធ្វើសកម្មភាពឆក់ខ្សែ.កមាស១ខ្សែពីស្ត្រីម្នាក់បានសម្រេច បន្ទាប់មកបានព្យាយាមគេចខ្លួន ប៉ុន្តែរត់អត់រួច ដោយត្រូវជនរងគ្រោះស្រែកថា «ចោរៗ» បង្កឲ្យមានការភ្ញាក់ផ្អើល ខណៈពេលនោះ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យ២នាក់បានធ្វើសកម្មភាពឆក់ខ្សែ.កមាស១ខ្សែពីស្ត្រីម្នាក់បានសម្រេច បន្ទាប់មកបានព្យាយាមគេចខ្លួន ប៉ុន្តែរត់អត់រួច ដោយត្រូវជនរងគ្រោះស្រែកថា «ចោរៗ» បង្កឲ្យមានការភ្ញាក់ផ្អើល ខណៈពេលនោះនគរបាលប៉ុស្តិ៍សំរោងក្រោម ដេញតាមចាប់បានតែម្តង។ ហេតុការណ៍នេះបានកើតឡើងកាលពីវេលាម៉ោង១១និង៥០នាទីព្រឹក ថ្ងៃទី២៥ ខែវិច្ឆិកា ឆ្នាំ២០២២ នៅតាមផ្លូវបេតុង ស្ថិតក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
សេចក្តីរាយការណ៍បន្តថា ជនសង្ស័យទាំង២នាក់នោះ ពុំទាន់ត្រូវបានស្គាល់អត្តសញ្ញាណនៅឡើយទេ ចំណែកស្ត្រីរងគ្រោះក៏ពុំបានប្រាប់ឲ្យដឹងឈ្មោះដែរ ចំណែកខ្សែ.ករបស់គាត់ដែលត្រូវជនសង្ស័យឆក់បានសម្រេចនោះ គឺមានទម្ងន់ជាង១តម្លឹង។
បើតាមអ្នកឃើញហេតុការណ៍បាននិយាយឱ្យថា នៅមុនពេលកើតហេតុ ស្ត្រីរងគ្រោះបានពាក់ខ្សែ.ក រួចជិះម៉ូតូម៉ាកហុងដាស្កូបពី ពណ៌ក្រហម១គ្រឿង ធ្វើដំណើរតាមផ្លូវបេតុង ស្ថិតក្នុងភូមិចាក់ជ្រូក ក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុ ស្រាប់តែជនសង្ស័យខាងលើ ជិះម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ឌុបគ្នាតាមពីក្រោយដេញតាមឆក់យកខ្សែ.កពីស្ត្រីរងគ្រោះបានសម្រេច រួចគេចខ្លួនបាត់ស្រមោល។
ប្រភពដដែលបានប្រាប់ឲ្យដឹងបន្តទៀតថា បន្ទាប់មក ស្ត្រីរូបនោះ ក៏បានព្យាយាមជិះម៉ូតូដេញតាម និងស្រែកថា «ចោរៗ» ដើម្បីឲ្យអ្នកដំណើរជួយ បង្កឲ្យមានការភ្ញាក់ផ្អើលពេញភូមិ។ ស្របពេលនោះដែរ កម្លាំងនគរបាលប៉ុស្តិ៍សំរោងក្រោម បានជួយដេញតាម រហូតដល់ក្នុងបុរីឈូកវ៉ា២ ស្ថិតនៅក្នុងភូមិតិក្ខបញ្ញោ សង្កាត់សំរោងក្រោម ខណ្ឌពោធិ៍សែនជ័យ ទើបចាប់ខ្លួនបានជនសង្ស័យទាំង២នាក់ រួចនាំយកទៅសាកសួរនៅប៉ុស្តិ៍សំរោងក្រោម ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់៕
ចែករំលែកព័តមាននេះ