ក្នុងថ្ងៃតែមួយ! កំពូលកីឡាករ២រូបស្រក់ទឹកភ្នែកនៅ World Cup 2022
កាតា ៖ កំពូលខ្សែប្រយុទ្ធព័រទុយហ្គាល់ Cristiano Ronaldo និងកំពូលខ្សែប្រយុទ្ធប្រេស៊ីល Neymar បាន
កាតា ៖ កំពូលខ្សែប្រយុទ្ធព័រទុយហ្គាល់ Cristiano Ronaldo និងកំពូលខ្សែប្រយុទ្ធប្រេស៊ីល Neymar បាន
កាតា ៖ កំពូលខ្សែប្រយុទ្ធព័រទុយហ្គាល់ Cristiano Ronaldo និងកំពូលខ្សែប្រយុទ្ធប្រេស៊ីល Neymar បានស្រក់ទឹកភ្នែកនៅក្នុងការប្រកួតថ្ងៃតែមួយ និងលើកដំបូងរបស់ខ្លួននៃព្រឹត្តិការណ៍ World Cup 2022 នៅកាតា ពោលគឺនៅថ្ងៃទី២៤ ខែវិច្ឆិកា ឆ្នាំ២០២២ កន្លងទៅ។
ក្រុមបញ្ចខែលព័រទុយហ្គាល់ បានយកឈ្នះលើក្រុមផ្កាយខ្មៅហ្គាណា ដោយលទ្ធផល ៣-២ ដែលជាការប្រកួតលើកឆាកពូល H នៃព្រឹត្តិការណ៍ World Cup 2022 នៅឯកីឡដ្ឋាន Stadium 974 ។ ជ័យជម្នះរបស់ក្រុមលោកគ្រូបង្វឹក Fernando Santos រកបានដោយប្រធានក្រុម Cristiano Ronaldo នៅនាទី៦៥ ដោយការទាត់បាល់ពិន័យ ១១ម៉ែត្រ ហើយ២គ្រាប់ផ្សេងទៀត រកបានដោយកីឡាករ João Félix និង Rafael Leão នៅនាទី៧៨ និង៨០។ ខណៈ២គ្រាប់ចុងម៉ោងរបស់ហ្គាណា រកបានដោយខ្សែបម្រើស្លាប André Ayew និង Osman Bukari នៅនាទី៧៣ និង៨៩។
នៅមុនការប្រកួតនេះកើតឡើង គេកត់សម្គាល់ឃើញ Ronaldo បានសម្រក់ទឹកភ្នែកដោយក្តីរំភើបជាទីបំផុត នៅចំពោះមុខអ្នកគាំទ្រកំពុងស្រែកច្រៀង អំឡុងការគោរពភ្លេងជាតិរបស់ព័រទុយហ្គាល់។ ខ្សែប្រយុទ្ធដែលកំពុងគ្មានក្លិបលេង ក្រោយការប្រកាសចែកផ្លូវជាមួយក្លិប Manchester United កាលពីថ្មីៗរូបនេះ បានបង្កើតកំណត់ត្រាជាប្រវត្តិសាស្ត្រ ដោយក្លាយជាកីឡាករដំបូងគេបំផុតរកគ្រាប់បាល់បញ្ចូលទី នៅក្នុងការបង្ហាញខ្លួន៥លើក នៅព្រឹត្តិការណ៍ World Cup ជាប់ៗគ្នា(២០០៦,២០១០,២០១៤,២០១៨,២០២២)។
នៅក្នុងការប្រកួតទល់នឹងក្រុមហ្គាណា ម្ចាស់ពាន Ballon D’or ៥សម័យកាលវ័យ៣៧ឆ្នាំរូបនេះ បានឈ្នះពានកីឡការល្អប្រចាំការប្រកួតផងដែរ (MOTM) ធ្វើឱ្យរូបគេក្លាយជាកីឡាករដំបូងគេឈ្នះពានរង្វាន់នេះ ច្រើនជាងគេបំផុតនៅព្រឹត្តិការណ៍ World Cup ពោលចំនួន៧ដង។
ដោយឡែក ក្រឡែកទៅកាន់ការប្រកួត១គូទៀត ដែលជាជំនួបបើកឆាកក្នុងពូល G ដោយក្រុមសាំបាប្រេស៊ីល បានយកឈ្នះលើក្រុមឥន្ទ្រីស៊ែប នៅក្នុងលទ្ធផល ២-០។ គ្រាប់បាល់ជ័យជម្នះរបស់ក្រុមម្ចាស់ជើងឯក World Cup ៥សម័យកាលមួយនេះ សម្រេចបានដោយខ្សែប្រយុទ្ធ Richarlison តែម្នាក់ឯង ដែលជាការបង្ហាញខ្លួនលើកដំបូងជាមួយប្រេស៊ីលនៅក្នុងព្រឹត្តិការណ៍ World Cup របស់ខ្សែប្រយុទ្ធក្រុមមាន់ខ្នាយមាស Tottenham Hotspur វ័យ២៥ឆ្នាំរូបនេះ។
ទោះទទួលជ័យជម្នះសម្រាប់ការប្រកួតនេះក៏ពិតមែន ប៉ុន្តែអ្នកគាំទ្រប្រេស៊ីលកំពុងបង្ហាញក្តីបារម្ភយ៉ាងខ្លាំង ចំពោះបញ្ហារបួសកំពូលខ្សែប្រយុទ្ធ Neymar របស់ពួកគេ។ Neymar បានសម្រក់ទឹកភ្នែកនៅកៅអីបម្រុង ដោយត្រូវប្តូរចេញនៅនាទី៨០ ព្រោះបញ្ហារបួសកជើងជាមួយសភាពហើមធ្ងន់ធ្ងរ បន្ទាប់ពីមានការប៉ះទង្គិចគ្នាយ៉ាងខ្លាំងជាមួយខ្សែការពារ Nikola Milenkovic របស់ស៊ែប។
ជាមួយគ្នានោះ វេជ្ជបណ្ឌិតក្រុមប្រេស៊ីលបានបញ្ជាក់ថា ខ្សែប្រយុទ្ធក្លិបអ្នកមានបារាំង PSG វ័យ៣០ឆ្នាំរូបនេះ នឹងត្រូវទទួលការពិនិត្យឡើងវិញ សារជាថ្មីម្តងទៀត នៅថ្ងៃទី២៥ ខែវិច្ឆិកានេះ។ ខណៈលោកគ្រូបង្វឹក Tite ទទូចយ៉ាងដូច្នេះថា «យើងមានទំនុកចិត្តថា Neymar នឹងបន្តលេងនៅ World Cup 2022។ ឥឡូវនេះ យើងត្រូវរង់ចាំ យើងមិនអាចធ្វើការអត្ថាធិប្បាយមុនពេលលទ្ធផលវេជ្ជបណ្ឌិតបាននោះទេ»។
នេះគឺលើកទី៣ហើយ សម្រាប់ Neymar ក្នុងការបង្ហាញខ្លួននៅ World Cup ជាមួយប្រេស៊ីល (២០១៤, ២០១៨, ២០២២) ប៉ុន្តែនៅមិនទាន់ឈ្នះជើងឯកជាមួយប្រទេសកំណើតខ្លួននៅឡើយទេ ដ្បិតប្រេស៊ីលគឺក្រុមឈ្នះជើងឯក World Cup ច្រើនជាងគេបំផុតក្នុងប្រវត្តិសាស្ត្រ ពោលចំនួន៥លើក (១៩៥៨, ១៩៦២, ១៩៧០, ១៩៩៤, ២០០២)។
ខាងក្រោមនេះ គឺជាលទ្ធផលទាំងអស់នៃការប្រកួត កាលពីថ្ងៃទី២៤ ខែវិច្ឆិកា ឆ្នាំ២០២២ ៖
-ពូល G ស្វីស ១-០ កាមេរូន
-ពូល G ប្រេស៊ីល ២-០ ស៊ែប
-ពូល H អ៊ុយរ៉ាហ្គាយ ០-០ កូរ៉េខាងត្បូង
-ពូល H ព័រទុយហ្គាល់ ៣-២ ហ្គាណា៕
ចែករំលែកព័តមាននេះ