ខេត្តបាត់ដំបង ៖ នេះមិនមែនជាលើកដំបូងទេ ដែលកម្លាំងសមត្ថកិច្ចចុះបង្ក្រាបបទល្មើសនេសាទ រឹបអូសបានវត្ថុតាងយ៉ាងច្រើនសន្ធឹកសន្ធាប់រួចដុតកំទេចចោល ប៉ុន្តែពុំធ្លាប់មានជនល្មើសណាម្នាក់ ត្រូវសមត្ថកិច្ចឃាត់ខ្លួនបញ្ជូនទៅតុលាការឡើយ។ នេះបើតាមការកត់សម្គាល់លើកិច្ចប្រតិ បត្តិការបង្ក្រាបបទល្មើសនេសាទជាក់ស្ដែងរបស់សមត្ថកិច្ចនាពេលកន្លងមកនេះ។
កម្លាំងចម្រុះស្រុកមោងប្ញស្សី បានបើកិច្ចប្រតិបត្តិការ ចុះបង្ក្រាបបទល្មើសនេសាទនេះជាថ្មីទៀត កាលពីថ្ងៃទី ២៤ វិច្ឆិកា នៅតំបន់ទន្លេសាប ក្នុងទឹកដីឃុំព្រៃតូច និងឃុំកកោះ ដែលគេអះអាងថា ជាតំបន់ដែលសំបូរទៅដោយបទល្មើសនេសាទច្រើនស្អេកស្កះ ដែលជនល្មើសកំពុងសំរុកដាក់ពង្រាយស្ទាក់ចាប់ត្រីគ្រប់ប្រភេទបំពានច្បាប់។ នៅក្នុងរបាយការណ៍ដែលកោះសន្តិភាពទទួលបាន កម្លាំងសម្រុះស្រុកមោងប្ញស្សី បានរកឃើញឧបករណ៍នេសាទល្មើសច្បាប់ «បរណរ៉ាវ ឬ របាំងសាច់អ៊ួន» ជាច្រើនកន្លែង និង មានប្រវែងរាប់រយម៉ែត្រដែលជនល្មើសដាក់ពង្រាយស្ទាក់
ចាប់ត្រីនៅក្នុងទឹកដី ឃុំព្រៃតូច និងឃុំកកោះ។
សមត្ថកិច្ចបានឲ្យដឹងថា កិច្ចប្រតិបត្តិការនេះ កម្លាំងចម្រុះបានរឹបអូសវត្ថុតាង ដូចជារបាំងសាច់
អ៊ួន(បរណរ៉ាវ) បានប្រវែងសរុបចំនួន១,២០០ម៉ែត្រ បង្គោលឈើចំនួន១៩០ដើម ឡុកចាប់ត្រីចំនួន០៤គ្រឿង និង ប្រលែងកូនត្រីវិញចំនួន៥០គីឡូក្រាម។ ប៉ុន្តែរបាយការណ៏ចុះបង្ក្រាបបទល្មើសនេសាទនេះ ក៏មិនខុសពីរបាយការណ៍មុនៗដែរ គឺគេពុំឃើញមានឈ្មោះជនល្មើស ដែលប្រព្រឹត្តបទល្មើសនេសាទនៅក្នុងរបាយការណ៍ទេ សូម្បីតែម្នាក់។
គេនៅចាំបានថា តំណាងអយ្យការអមសាលាដំបូងខេត្ត ធ្លាប់បានលើកឡើងនៅក្នុងកិច្ចប្រជុំ នៃគណៈបញ្ជាការកងឯកភាពខេត្ត ដែលនិយាយពីការបង្ក្រាបបទល្មើសនេសាទនេះ និង បានសួរនាំអំពី «អត្តសញ្ញាណជនល្មើស ដែលប្រព្រឹត្តបទល្មើសនេសាទ» ដែលសមត្ថកិច្ចបង្ហាញតែរបាយការណ៏ និង វត្ថុតាង តែមិនដែលមានឈ្មោះជនល្មើសនៅក្នុងរបាយការណ៏ឡើយ ហើយក៏មិនធ្លាប់ឃើញសមត្ថកិច្ចនាំខ្លួនជនល្មើសណាម្នាក់ចូលតុលាការដែរ។
បើតាមប្រភព័ត៌មានបទល្មើសនេសាទ ដែលកំពុងកើតមានសព្វថ្ងៃនេះច្រើនបំផុត គឺជនល្មើសការប្រើប្រាសឧបករណ៍ «របាំងសាច់អ៊ួនក្រឡាញឹក» ដាក់ពង្រាយតាមតំបន់ព្រៃលិចទឹកស្ទាក់ចាប់យកត្រីចម្រុះ ដែលមួយខ្សែៗមានប្រវែងរាប់រយ រាប់ពាន់ម៉ែត្រ និងប្រើប្រាសឧបរកណ៍អគ្គិសនី«ឆក់»មានគ្រប់រូបភាព ទាំងប្រើឧបករណ៍ស្ពាយលើស្មារ«ឆក់» និងប្រើឧបករណ៍បំពាក់លើទូកឬកាណូត«ឆក់»ក្នងទ្រង់ទ្រាយធំតែម្ដង។ ប៉ុន្តែសកម្មភាពជនល្មើស ប្រើឧបរកណ៍«ឆក់»ទាំងនេះ សមត្ថកិច្ចមិនដែលបង្ក្រាបបានទេ ទើបធ្វើឲ្យជនល្មើសរឹតតែបង្កើនសកម្មភាពទ្វេដងទាំងយប់ទាំងថ្ងៃ ពាសពេញតំបន់ទន្លេសាប ។
ចែករំលែកព័តមាននេះ