រាជធានីភ្នំពេញ ៖ តារាសម្តែងជើងចាស់អ្នកស្រី ឌី សាវ៉េត បានប្រកាសបើកបង្រៀនសម្តែងដោយមិនយកប្រាក់សម្រាប់យុវ័យដែលមានបំណងចង់ក្លាយជាតារាសម្តែងអាជីពនាពេលអនាគត ។
ការប្រកាស
រាជធានីភ្នំពេញ ៖ តារាសម្តែងជើងចាស់អ្នកស្រី ឌី សាវ៉េត បានប្រកាសបើកបង្រៀនសម្តែងដោយមិនយកប្រាក់សម្រាប់យុវ័យដែលមានបំណងចង់ក្លាយជាតារាសម្តែងអាជីពនាពេលអនាគត ។
ការប្រកាសរបស់អ្នកស្រី ឌី សាវ៉េត នាពេលថ្មីៗកន្លងមកនេះ ស្របពេលវិស័យសិល្បៈភាពយន្តខ្មែរនាពេលបច្ចុប្បន្នបកំពុងលូតលាស់ទៅមុខជាលំដាប់ តែតារាមួយចំនួនទេពកោសល្យសម្តែងនៅមានកម្រិតនៅឡើយ។
អ្នកស្រីឌី សាវ៉េត ថ្លែង ដោយសារតែអ្នកស្រីជាមនុស្សមានសំណាងមួយរូបអាចគេចផុតពីសម័យខ្មែរក្រហម និងបន្តរស់រានមានជីវិត ដូចនេះអ្នកស្រីតែងតែមានបំណងធ្វើអ្វីមួយ ដើម្បីជាការលើកស្ទួយដល់វិស័យសិល្បៈខ្មែរ ក្នុងនាមអ្នកស្រីធ្លាប់បម្រើវិស័យមួយនេះអស់ជាច្រើនឆ្នាំ ។
ដោយឈរលើកត្តានេះហើយ ទើបអ្នកស្រីមានបំណងបើកបង្រៀនដល់យុវវ័យជំនាន់ថ្មីពីការសម្តែងខ្សែភាពយន្ត ប្រសិនបើពួកគេស្រឡាញ់អាជីពមួយនេះ និងចង់ចេះ ចង់យល់ពីការសម្តែង ។
បច្ចុប្បន្នជាយុគសម័យដ៏ជឿនលឿន អ្នកស្រីឌី សាវ៉េត យល់ថា ការផលិតកុនក៏ជឿនលឿនតាមសម័យកាលដែរ ដែលការផលិតនេះមានការខុសគ្នាទាំងស្រុងក្នុងសម័យកាលដែលអ្នកស្រីបានសម្តែង ។ អាស្រ័យលើកត្តានេះ ទាំងបច្ចេកទេស និងតួសម្តែងក៏ត្រូវទាមទារឱ្យដើរទៅតាមសម័យកាលផងដែរ ក៏ប៉ុន្តែតាមការសង្កេតតួសម្តែងមួយចំនួនហាក់សម្តែងនៅមានកម្រិតនៅឡើយ ។
អ្នកស្រីឌី សាវ៉េត ថ្លែងថា «តួសម្តែងក្នុងសាច់រឿង នីមួយៗត្រូវទាមទារធ្វើយ៉ាងណាទាក់ចិត្តទស្សនិកជនដែលជាអ្នកទស្សនា ប្រសិនបើតួកម្សត់ គឺត្រូវធ្វើយ៉ាងណាឱ្យមានភាពក្តុកក្តួល ឬក៏យំតាម ហើយបើតួកាច គឺធ្វើយ៉ាងណាឱ្យគេស្អប់ និងតួកំប្លែងគឺត្រូវឱ្យអ្នកទស្សនាសើច។ ទាំងអស់នេះ គឺហៅថាការសម្តែងអស់ពីសមត្ថភាព ។ ការសម្តែង គឺត្រូវទាមទារការមានបទពិសោធន៍ ទើបអាចយល់ពីការសម្តែងបាន ក្នុងនោះអ្នកខ្លះយល់ថាស្រួល អ្នកខ្លះយល់ថាពិបាក ប៉ុន្តែសំខាន់យើងទាមទារការដាក់អារម្មណ៍ យល់ការសម្តែង និងរៀនសូត្រពីតារាចាស់ៗ ។ បើយើងសម្តែងគ្រាន់តែសម្តែងនោះការសម្តែងរបស់យើងមើលទៅមិនអស់ឡើយ ប៉ុន្តែប្រសិនបើយើងយកសាច់រឿងដែលយើងសម្តែងឱ្យទៅជាសាច់រឿងរបស់យើងពិតប្រាកដនោះ ការសម្តែងរបស់យើងនឹងបានល្អ ព្រមទាំងអស់ពីសមត្ថភាព» ។
អ្នកស្រីឌី សាវ៉េត លើកសរសើរតារាសម្តែងមួយចំនួនដែលសម្តែងបានល្អ ហើយស៊ីនឹងតួអង្គដែលខ្លួនសម្តែង ។ ចំណែកតារាមួយចំនួនទៀតសម្តែងមិនទាន់បានល្អបន្ថែមទៀតឡើយ ដូច្នេះទាមទារការហាត់រៀន ។
អ្នកស្រីឌី សាវ៉េត បន្តអាជីពសម្តែងមកដល់សម័យបច្ចុប្បន្ន ដោយក្នុងនោះអ្នកស្រីបង្ហាញស្នាដៃ ថ្មីៗជាបន្តបន្ទាប់តាមរយៈវីដេអូភាគ និងរឿងខ្នាតធំក្នុងនាមជាតួអង្គម្តាយ។ ក្រៅពីស្នាដៃសម្តែងភាពយន្ត អ្នកស្រីឌី សាវ៉េត ធ្វើជាគណៈកម្មការក្នុងកម្មវិធីសិល្បៈ ផ្សេងៗនៅតាមបណ្តាស្ថានីយទូរទស្សន៍នានា ។
អ្នកស្រីឌី សាវ៉េត នៅតែមានមហិច្ឆតាបន្តការសម្តែង ទៀត ដើម្បីចូលរួមជ្រោមជ្រែងវិស័យសិល្បៈភាពយន្តឱ្យរីកចម្រើនឡើង ៕
ចែករំលែកព័តមាននេះ