រាជធានីភ្នំពេញ ៖ តារាសម្តែងភេទទីបី កញ្ញាប៉ុបពី នៅតែរក្សាបានភាពស្រស់ស្អាត និងល្បីឈ្មោះក្នុងសង្គមសិល្បៈ ។ តារាភេទទីបីរូបនេះបានឆ្លងកាត់រសជាតិស្នេហ៍ជាមួយបុរសមួយចំនួន ហើយបទពិសោធន៍ធ្វើឱ្យនាងយល់ថាវាអត់ប្រយោជន៍ ។ ប៉ុបពីណែនាំភេទទី៣ទាំងឡាយគួរកុំធ្វេសប្រហែសឱ្យចាញ់ល្បិចប្រុស ។
ឆ្លងកាត់ជីវិតស្នេហាមិនប្រាកដប្រជាកន្លងមក កញ្ញាប៉ុបពីដែលមានចិត្តស្រឡាញ់ស្មោះលើបុរសមួយចំនួននោះបានត្រឹមតែខកចិត្ត ។ បុរសទាំងនោះទីបំផុតតោះតើយលែងត្រូវការនាង។ រឿងនេះហើយដែលប៉ុបពី តាំងចិត្តបញ្ចប់ចិត្តស្រឡាញ់ប្រុសស្មោះត្រង់ខ្លាំងពេកដូចមុន ។ នាងចាត់ទុកបុរសទាំងនោះយករូបរាងកាយទម្រាំគ្រាន់តែជាស្ពានតោងភេទទី៣បោកស៊ីចាយសប្បាយប៉ុណ្ណោះ ។
កញ្ញាប៉ុបពីកាលពីពេល ថ្មីៗកន្លងមកនិយាយថា «ខ្ញុំមានចិត្ត មានបេះដូងស្រឡាញ់បុរសម្នាក់ជាស្វាមីមួយជីវិតដែរ ប៉ុន្តែរឿងនេះប្រហែលជាមិនអាចកើតមានក្នុងជាតិនេះទេ ព្រោះថាបុរសដែលស្រឡាញ់យើងទាំងដឹងថា យើងខុសធម្មជាតិគឺចិត្តមិនស្មោះទេ គួរថយការចូលកៀក ។
ទោះបីពេលនេះគេហាក់លើកតម្កើងភេទទី៣មែន តែយើងក៏គិតពិចារណាឱ្យច្រើន ស្រឡាញ់ខ្លួនឯងឱ្យច្រើន កុំបណ្តោយចិត្តលើស្នេហាពេក ។ ត្រូវខំរកលុយធ្វើជាមនុស្សល្អ ជួយអ្នកផ្ទះ ជួយបងប្អូនឱ្យហើយ ទាន់យើងមានកម្លាំង មានសម្រស់ធ្វើការងារកើត ។ ចេះទុកដាក់លុយកាក់ឱ្យល្អ ការពារទៅថ្ងៃក្រោយមានរវល់ ឬចាស់ទៅមានទ្រព្យសល់ជាប់ខ្លួនខ្លះ ដើម្បីដោះស្រាយចំពោះមុខ ។
នាងខ្ញុំមិនហាមរឿងមិនឱ្យមានស្នេហានោះទេ តែខ្លាចលង់ចាញ់បោកប្រុសល្អចង់បានតែពីខ្ទើយស្តាយលុយស្តាយពេលវេលា ។
សម្រាប់នាងខ្ញុំអត់ដែលមានបំណងពឹងលើមនុស្សប្រុសណាទេ ដោយនាងខ្ញុំធ្វើការសន្សំលុយ ខំធ្វើការសងគុណឪពុកម្តាយនោះហើយជាបំណងដែលនាងខ្ញុំខំធ្វើ» ។
ប៉ុបពីបានផ្តាំដល់ដល់ភេទទី៣ទាំងឡាយឱ្យចេះស្រឡាញ់គ្នា សាមគ្គីគ្នា កុំប្រកាន់បក្សពួក ឬធ្វើអំពើណាមិនសមរម្យនាំឱ្យសង្គមមើលងាយ ។ សម្រាប់រូបនាងផ្ទាល់ប្រហែលជាលែងផ្តោតរឿងស្នេហាជារឿងសំខាន់ទៀតហើយ ។
តស៊ូក្នុងមុខរបរទាំងការងារសិល្បៈមានពិធីករ ការសម្តែង និងអាជីពផាត់មុខកូនក្រមុំ ជាអ្វីដែលប៉ុបពីផ្តោតយកចិត្តទុកដាក់ ហើយសន្សំលុយទិញផ្ទះល្វែងមួយនៅម្តុំចោមចៅដាក់ជួល ។ លើសពីនេះឆ្លៀតទិញដីនៅខេត្តកំពតមួយឡូត៍ ជាដីភូមិក្បែរភ្នំសម្រាប់ទុកសម្រាកចុងសប្តាហ៍មើលទេសភាព បំបាត់ភាពនឿយហត់ ។
ដី និងផ្ទះនោះប៉ុបពីទិញជាច្រើនខែមកហើយដើម្បីទុកជាកេរចេញពីញើសឈាមរបស់ខ្លួន ។ ជាពិសេសចង់ឱ្យប៉ាម៉ាក់ និងបងប្អូននាងសប្បាយចិត្តចំពោះការខំប្រឹងប្រែងលើការងាររបស់នាង ៕
ចែករំលែកព័តមាននេះ