រាជធានីភ្នំពេញ ៖ តារាសម្ដែងអ្នកនាងខៀវ សុខារ៉ាវី បាត់មុខសាជាថ្មីម្ដងទៀតក្រោយពីចូលប្រឡូកអាជីពសិល្បៈបានមួយរយៈ កាលពីប៉ុន្មានខែមុន ។ វាជាការចាកចេញពីពិភពសិល្បៈរបស់តារាសម្ដែងខៀវ សុខារ៉ាវី ដើម្បីងាកទៅយកចិត្ដទុកដាក់លើមុខរបរផ្ទាល់ខ្លួន ។ តារាសម្ដែងស្រីរូបនេះមិនដឹងថា វិលចូលពិភពសិល្បៈវិញពេលណាទេ ។
ការបញ្ជាក់រឿងនេះនៅពេលខៀវ សុខារ៉ាវី ចូលរួមពិធីមង្គលការរបស់អ្នកនាងលីច័ន្ទ សីហា កាលពីពេល ថ្មីៗកន្លងមក ។
ខៀវ សុខារ៉ាវី និយាយថា «ការចូលសិល្បៈរបស់នាងខ្ញុំកាលពីពេលកន្លងមក គឺការងារទទួលបានធម្មតាៗមិនសូវជារវល់ឡើយ ពោលគឺទំនេរច្រើន ទើបនាងខ្ញុំសម្រេចយកពេលវេលាមករកស៊ីឱ្យបានហ្មត់ចត់ បង្កើនជីវភាពរស់នៅឱ្យល្អជាងមុនជាបន្ដទៀត ។ ទោះបីជាយ៉ាងណាក្តីចិត្ដនៅតែស្រឡាញ់សិល្បៈមិនអាចចោលបានទេ តែបើការងារខាងក្រៅមានសភាពមមាញឹកនាងខ្ញុំអត់ច្បាស់ថា ចូលសិល្បៈពេលណានោះឡើយ ។
ក្រោយពេលបញ្ចូលអារម្មណ៍ជាមួយមុខរបររកស៊ី នាងខ្ញុំបានបង្កើតមុខជំនួញថ្មីជិតពីរឆ្នាំហើយ គឺរបរទិញលក់អចលនទ្រព្យក្នុងក្រុមហ៊ុនផ្ទាល់ខ្លួនមួយដែលមានការលក់ដូរផ្ទះ ដីធ្លីមួយចំនួន ទទួលបានភាពប្រសើរគួរសម ហើយមមាញឹកត្រូវយកចិត្តទុកដាក់មើលមុខរបរថ្មីមួយនេះឲ្យល្អ ។ ជំនាញទិញ និងលក់ដីធ្លីនេះនាងខ្ញុំចេះដឹងបាន ដោយសារធ្លាប់រៀនជំនាញនេះយូរមកហើយទើបមានការយល់ឃើញ និងមើលមុខរបរទាំងនេះបាន ក្រោមការគ្រប់គ្រងពីក្រុមការងារផងដែរ ។
បន្ថែមពីនេះនាងខ្ញុំក៏ឆ្លៀតបង្កើតកន្លែងវេរលុយមួយកន្លែងទៀត ថ្មីៗនេះ ដែលនៅពុំទាន់ដំណើរការរលូននោះទេ កំពុងតែព្យាយាមពង្រឹងមុខរបរឲ្យរឹងមាំបន្ត ។
ប្រការនាងខ្ញុំទទួលបានការងារ ថ្មីៗទាំងអស់នេះ ក្រោយពីបិទហាងមួយនៅម្តុំមាត់ទន្លេមកនាងខ្ញុំយល់ថា ការងារក្រៅសិល្បៈនេះទៀមទារឲ្យមានការមើលហ្មត់ចត់ មិនអាចបណ្តោយបានទើបរឿងសិល្បៈទុកមួយឡែកសិន ដោយអត់ដឹងថាសម្តែងបានវិញពេលណាដែរ» ។
អ្នកនាងខៀវ សុខារ៉ាវី រីករាយដែលឃើញវិស័យសិល្បៈរីកចម្រើន ពិសេសសិល្បៈភាពយន្ដ៕
ចែករំលែកព័តមាននេះ