អយ្យការនៅខេត្តអាសេ ប្រទេសឥណ្ឌូណេស៊ីបានបង្ហើបឱ្យដឹងថា បុរស២នាក់ត្រូវនាំខ្លួនទៅបើកសវនការក្នុងតុលាការក្រោមច្បាប់«សារីអា»(Sharia)អាចទទួលទោសដោយដាក់ទណ្ឌកម្មវាយចំនួន៨០រំពាត់ពីបទរួមរ័កភេទដូចគ្នា ។
កាលពីពេល ថ្មីៗកន្លងមកក្រុមអយ្យការបញ្ជាក់ថា បុរស២នាក់អាយុ២០ឆ្នាំ និង២៣ឆ្នាំ សារភាពថាពួកគេរួមរ័កជាមួយគ្នាដោយមានតឹកតាងជាវីដេអូឃ្លីប រួមទាំងភស្តុតាងផ្សេងទៀតដែលប្រទះឃើញនៅក្នុងបន្ទប់ជួលរបស់ពួកគេ ។
សមត្ថកិច្ចចាប់ខ្លួនបុរសទាំង២នាក់ កាលពីចុងខែមីនា ក្រោយពីពលរដ្ឋនៅទីប្រជុំជនBandaAcehចោទថាពួកគេគឺជាដៃគូស្រឡាញ់ភេទដូចគ្នា ។ ការចាប់ខ្លួនរួមទាំងតឹកតាង ខណៈពេលពួកគេកំពុងរួមរ័ក ។ នៅក្នុងវីដេអូឃ្លីបថតដោយទូរស័ព្ទ និងបង្ហោះក្នុងវេបសាយ បង្ហាញឱ្យឃើញបុរសម្នាក់ស្រាតននល និងទូរស័ព្ទសុំការជួយសង្គ្រោះពីអាជ្ញាធរ ប៉ុន្តែបុរសម្នាក់ទៀតចូលសង្គ្រុបកំឱ្យរត់ចេញពីបន្ទប់ ។
ប្រសិនបើតុលាការសម្រេចថា មានកំហុសពិតមែនពួកគេនឹងក្លាយជាករណីដំបូងត្រូវទទួលទោសដោយធ្វើទារុណកម្មតាមច្បាប់Shariaដែលចាប់ផ្តើមប្រើនៅក្នុងខេត្តអាសេកាលពី២ឆ្នាំមុន ។
អាសេជាខេត្តមួយនៅឥណ្ឌូណេស៊ីប្រើច្បាប់Shariaដើម្បីបញ្ឈប់ការប្រយុទ្ធគ្នាជាមួយក្រុមឧទ្ទាមបែងចែកទឹកដី ។ ច្បាប់នេះបានកំណត់ឱ្យមានការធ្វើទារុណកម្មវាយនឹងរំពាត់កុំឱ្យលើសពី១០០រំពាត់ដល់អ្នកប្រព្រឹត្តខុសនឹងសីលធម៌ដូចជាការរួមរ័ករបស់អ្នកស្រឡាញ់ភេទដូចគ្នាការមានសហាយស្មន់ ភ្នាល់ល្បែង ពិសាស្រានិងនារីដែលពាក់អាវរឹបរាងជាដើម ៕
ចែករំលែកព័តមាននេះ