ខេត្តពោធិ៍សាត់ ៖ កម្លាំងអន្តរាគមន៍របស់អធិការដ្ឋាននគរបាលស្រុកកណ្តៀង ចំនួន០៨នាក់ កាលពីវេលាម៉ោង១៤និង៣០នាទីរសៀលថ្ងៃទី២២ ខែវិច្ឆិកា ឆ្នាំ២០២២ បានសហការជាមួយ កម្លាំងប៉ុស្តិ៍នគរបាលរដ្ឋបាលអន្លង់វិល ដឹកនាំដោយលោកនាយប៉ុស្តិ៍ បានចុះបង្ក្រាបល្បែងស៊ីសងខុសច្បាប់(បៀ) នៅចំណុចផ្ទះរបស់ឈ្មោះ សំ អាត ភេទស្រី អាយុ៥៦ឆ្នាំ ស្ថិតនៅភូមិក្បាលរមាស ឃុំអន្លង់វិល ស្រុកកណ្តៀង ខេត្តពោធិ៍សាត់ ។
លោកវរសេនីយ៍ឯក អ៊ុន ស៊ី អធិការនគរបាលស្រុកកណ្ដៀង បានឲ្យដឹងថា ការចុះបង្ក្រាបល្បែងស៊ីសងខុសច្បាប់នេះសមត្ថកិច្ចបានឃាត់ខ្លួន ជនសង្ស័យចំនួន០៦នាក់ នាំយកមកអប់រំផងដែរ ។
អ្នកញៀនល្បែងស៊ីសង(បៀ) ទាំង០៦នាក់ រួមមាន ៖
១- ឈ្មោះ សំ អាត (ម្ចាស់ផ្ទះ)
២- ឈ្មោះ សាន ហ៊ុំ ភេទស្រី អាយុ៣៩ឆ្នាំ
៣- ឈ្មោះ ប៉ិ ត្រប់ ភេទស្រី អាយុ៣៨ឆ្នាំ
៤- ឈ្មោះ ជា ចាន់ ភេទស្រី អាយុ២៧ឆ្នាំ
៥- ឈ្មោះ ឈិត រុំ ភេទប្រុស អាយុ៣៥ឆ្នាំ
និង៦- ឈ្មោះ ជា ចន្ធូ ភេទស្រី អាយុ២៣ឆ្នាំ
អ្នកទាំងអស់គ្នា រស់នៅភូមិឃុំដូចខាងលើ និងដកហូតវត្ថុតាងរួមមាន ៖ បៀចំនួន ៦២សន្លឹក កម្រាលភួយចំនួន០១ កម្រាលការុងចំនួន០១ នឹងកម្រាលកន្ទេលចំនួន០១ ។
បច្ចុប្បន្ន ជនសង្ស័យ រួមនឹងវត្ថុតាងខាងលើ ត្រូវបានសមត្ថកិច្ចបានធ្វើកិច្ចសន្យាអប់រំបញ្ឈប់ការលេងល្បែងស៊ីសងខុសច្បាប់ រួចហើយឲ្យវិលត្រឡប់ទៅមូលដ្ឋានវិញ រីឯវត្ថុតាង ត្រូវបានសមត្ថកិច្ចកម្ទេចចោលនៅនឹងកន្លែង តែម្តង ៕
ចែករំលែកព័តមាននេះ