អាមេរិក ៖ តាមប្រភពព័ត៌មាន Metro បានឲ្យដឹងថា បុរសម្នាក់ត្រូវបានចាប់ខ្លួន ខណៈពេលនៅមន្ទីរពេទ្យសម្រាកព្យាបាលរបួស កាលពីថ្ងៃច័ន្ទ ពីបទសម្លាប់ជីវិតលោកវេជ្ជបណ្ឌិត និងប្រពន្ធរបស់គាត់ ដែលជាវេជ្ជបណ្ឌិតដូចគ្នា។
លោកវេជ្ជបណ្ឌិត Richard Field អាយុ៤៩ឆ្នាំ និងប្រពន្ធរបស់លោក គឺលោកស្រីវេជ្ជបណ្ឌិត Lina Bolanos អាយុ៣៨ឆ្នាំ ត្រូវបានគេរកឃើញថា ស្លាប់នៅក្នុងផ្ទះនាទីក្រុង Boston រដ្ឋ Massachusetts កាលពីយប់ថ្ងៃសុក្រសប្តាហ៍មុន។
តាមប្រសាសន៍របស់មេធាវីបានឲ្យដឹងថា នៅពេលមុនស្លាប់លោកវេជ្ជបណ្ឌិតបានផ្ញើសារប្រាប់មិត្តភក្តិពីរឿងរ៉ាវធ្ងន់ធ្ងរកំពុងកើតឡើងលើខ្លួនលោក ដែលមានខ្មាន់កាំភ្លើងនៅក្នុងផ្ទះ។
ក្រោយពេលនោះបន្តិច ប៉ូលិសបានមកដល់ទីតាំងនៅម៉ោង៨និង៤០នាទីយប់ ហើយចូលទៅក្នុងផ្ទះរបស់លោកវេជ្ជបណ្ឌិតដោយប្រើសោដែលបានជ្រុះនៅមុខផ្ទះ។ ពួកគេក៏បានឃើញជនសង្ស័យ ហើយក៏បាញ់ជាច្រើនគ្រាប់ទៅលើជននោះ។
ជាមួយគ្នានេះដែរ ប៉ូលិសបានឃើញកាតាបមួយដែលច្រកសុទ្ធតែគ្រឿងអលង្ការ អាវុធក្លែងក្លាយ និងកាំបិតមួយដើម។
ជនសង្ស័យនោះមានឈ្មោះថា Bampumim Teixeira អាយុ៣០ឆ្នាំ ដែលមកស្នាក់នៅព្យាបាលរបួសត្រូវគ្រាប់ចំនួន៣គ្រាប់។ ប៉ូលិសបានធ្វើការចាប់ខ្លួននៅផ្ទាល់នឹងមន្ទីរពេទ្យកាលពីថ្ងៃច័ន្ទ ពីបទឃាតុកម្មជីវិតមនុស្ស២នាក់៕
ចែករំលែកព័តមាននេះ